Buku Jeremia

Jeremia ᯝᯩᯒᯩᯔᯪᯀ 1

1:1 On do angka hata ni si Jeremia, anak ni si Hilkia, sian malim angka na di Anatot di luat Benjamin. ᯀᯉᯬ᯲ ᯑᯬ ᯀᯰᯄ᯦ ᯂᯖ ᯉᯪ ᯘᯪ ᯐᯩᯒᯩᯔᯪᯀ ᯀ ᯉᯄ᯦᯲ ᯉᯪ ᯘᯪ ᯂᯞᯪ᯲ᯄ᯦ᯪᯀ ᯘᯪᯀᯉ᯲ ᯔᯞᯔᯪ᯲ ᯀᯰᯄ᯦ ᯉ ᯑᯪ ᯀᯉᯖᯖᯬ᯲ ᯑᯪ ᯞᯮᯀᯖ᯲ ᯅᯉᯩ᯲ᯐᯔᯉᯪ᯲

1:2 Di na ro hata ni Jahowa tu ibana uju di angka ari ni si Josia, anak ni si Amon, raja ni Juda, pasampulutolutaonhon hinarajaonna i.

1:3 Dung i ro muse di angka ari ni si Joiakim, anak ni si Josia, raja sian Juda sahat ro di ujung ni pasampulusada taonhon hinarajahon ni si Sedekia, anak ni si Josia, raja ni Juda, sahat ro di habubuang ni Jerusalem palimabulanhon.

1:4 Jadi na ro ma hata ni Jahowa tu ahu mandok songon on:

1:5 Tagan so hujadihon dope ho di bortian, nunga hutanda hian ho; jala tagan so ruar dope ho sian ampuan ni natorasmu, nunga huparbadiai hian ho: Hupabangkit ho gabe panurirang tu angka bangso.

1:6 Dung i ningku ma: Iale Tuhan Jahowa, ida ma, * ndang huboto mangkatai, ai na bajar dope ahu.

1:7 Jadi ninna Jahowa ma mandok ahu: Unang dok: Na bajar dope ahu. Ai manang tudia pe ho husuru, ingkon tusi ho laho, jala manang aha hutonahon tu ho, ingkon i do hatahononmu.

1:8 Unang ho mabiar maradophon nasida, ai sai ahu do donganmu, paluahon ho, ninna Jahowa.

1:9 Dung i dipatoltol Jahowa ma tanganna, jala * dijama pamanganku, jala ninna Jahowa mandok ahu: Ida ma * nunga sahat hulehon angka hatangku tu bagasan pamanganmu.

1:10 Ida ma, hupabangkit do ho sadarion mangaranapi angka bangso dohot angka harajaon, laho mangurati dohot maniaphon, mangago dohot mangaloha, paulihon dohot manuan.

1:11 Dung i ro muse hata ni Tuhan Jahowa tu ahu mandok songon on: Aha na niidam, ale Jeremia? Jadi ningku ma: Dangka ni hau na rata do huida.

1:12 Jadi ninna Jahowa ma mandok ahu: Sintong do parnidam; ai sai * dungo ma ahu pamasa hatangku.

1:13 Dung i ro ma hata ni Jahowa tu ahu paduahalihon mandok songon on: Aha do na niidam? Jadi ningku ma: Hudon na gurgur do huida, jala sian utara haroroanna.

1:14 Dung i ninna Jahowa ma mandok ahu: Sian utara do pul jea tu sandok isi ni tano on.

1:15 Ai ida ma, marhara ma ahu tu sandok angka marga ni harajaon, angka na tungkan utara, ninna Jahowa, asa ro be nasida pajongjong habangsana tu jolo ni angka bahal ni Jerusalem dohot dompak sude angka parikna humaliang, dohot dompak sude angka huta ni Juda.

1:16 Jadi dabuonku ma angka uhumhu tu nasida taringot tu sude hajahatonnasida i, ala naung tinadingkonnasida i ahu, jala manutung daupa tu angka debata sileban, jala marsomba nasida tu jadijadian ni tangannasida i.

1:17 Alai anggo ho, hohos i hian ma gotingmu, jala borhat ma ho, jala hatahon ma tu nasida sude, na hutonahon i tu ho. Unang ma tarsonggot roham, maradophon nasida asa unang tung hubunu ho di jolo nasida.

1:18 Alai anggo ahu, ida ma, bahenonku ma ho sadarion gabe huta na ganting, dohot gabe tiang bosi, dohot gabe parik haksa dompak sandok tano i, dompak angka raja ni Juda, dompak angka sintuana, dompak angka malimna dohot dompak situan na torop ni luat i.

1:19 Jadi musuannasida ma ho, alai nda tung hahuaonna ho, ai ahu do donganmu, ninna Jahowa, paluahon ho.

Jeremia 2

2:1 Dung i ro muse hata ni Jahowa mandok tu ahu songon on:

2:2 Laho ma ho, jala tingtingkon tu pinggol ni isi ni Jerusalem songon on: Boti hata ni Jahowa: Sai hupaingotingot basar ni sidakdanakonmu, holong ni roham tagan oroan ho, uju diihuthon ho ahu di halongonan, di tano na so sinaburan.

2:3 Habadiaon ni Jahowa do Israel uju i, patumonaan ni na niulana; nasa na manganhon ibana, ingkon marutang do, ro do jea mangonai tu nasida, ninna Jahowa.

2:4 Tangihon ma hata ni Jahowa, hamu ale pinompar ni si Jakkob dohot sude marga ni pinompar ni Israel.

2:5 Boti hata ni Jahowa: Tung aha ma na so uhum jumpang angka ompumuna di ahu, umbahen mandaodao nasida sian ahu, jala diihuthon Debata na so hasea, gabe so gabeak ia nasida.

2:6 Jala ndang didok nasida: Didia do Jahowa, na manogihon hita ruar sian tano Misir, na manogunogu hita di halongonan, di tano na tungil, jala na marlombang, di tano hasang, jala linggoman ni hamatean, di tano na so binolus ni halak, jala ndang adong jolma maringan disi.

2:7 Dung i hupatolhas hamu tu tano na lunak, asa dipangan hamu parbuena dohot gogona, hape ro hamu mangaramuni tanongku, gabe hagigian partalianku dibahen hamu.

2:8 Ndang didok angka malim: Didia do Jahowa? Jala ndang ditanda angka na mangaradoti patik i ahu, jala marbalik do angka parmahan sian ahu; jala angka panurirang manurirangi marhitehite Baal, jala diihuthon nasida do angka na so margogo mangurupi.

2:9 Dibahen i ndang tarjua ahu be so mambadai hamu, ninna Jahowa, ro di ninimuna sai badaanku do.

2:10 Ai tung topot hamu ma angka pulo ni halak Kitim, jala tingkir hamu disi; jala suru hamu ma tu Kedar pamanathon situtu, jala ida hamu, manang dung masa sisongon i disi.

2:11 Tung adong ma bangso na pasambarhon Debatana, atik pe so tutu Debata? Alai anggo bangsongku, tung * dipasambar do hamuliaonna tu na so margogo mangurupi.

2:12 Longang ma hamu angka banuaginjang alani, jala manonditnondit, tarsonggot situtu tahe, ninna Tuhan Jahowa.

2:13 Ai dua do jea binahen ni bangsongku: Ahu, * mual ni hangoluan ditadingkon nasida, laho mangkali di nasida sumursumur, sumur angka na marruang, na so marisi aek.

2:14 Tung hatoban do Israel ulaning, manang tubu ni hatoban? Boasa tung gabe tabantaban ibana?

2:15 Patungoromon do angka babiat dompak ibana, dipangiar soaranasida, gabe halongonan do tanona dibahen nasida, angka hutana disurbu nasida, gabe so marisi be.

2:16 Nang angka anak ni * Nob dohot Tahpanhes manggatgat pakpak ni ulum.

2:17 Nda panadingkonmu di Jahowa, Debatamu * mambahen songon i tu ho, uju tinogutoguna ho di dalan.

2:18 On pe, tung aha ma labam di dalan laho tu Misir, naeng minum aek ni Nil? Jala tung aha ma labam di dalan laho tu Assur, naeng minum aek sian batang aek Euprat?

2:19 Sai hinajahatmu do maminsang ho, jala panundalim manginsombut tu ho, asa tung diboto jala diida ho jahatna dohot paetna panadingkonmu di Jahowa Debatam, ala na so dihatondithon roham ahu, ninna Tuhan Jahowa Zebaot.

2:20 Ai sian na robi dope sai dipansuakkon ho augam dirapui ho angka tompim, jala didok ho: Ndang olo ahu parhatobanon. Ai * di atas ni sude robean na timbo, jala ditoru ni nasa hau rata do ho peak masiamangamang.

2:21 Alai anggo ahu nunga nian husuan ho gabe hau anggur na denggan, boni hasintongan, hape gabe lambang do ho di porlak anggur ni halak sileban!

2:22 Ai nang pe dipangke ho sira masiu mamburi ho, jala dipagodang ho sabun di ho, sai tong do tartanda hajahatonmu di jolongku, ninna Tuhan Jahowa.

2:23 Tung dia ma tardok ho: Ndang ramun ahu; ndang hupaihutihut angka Baal! Ida ma dalanmu di rura! Tanda ma na binahenmi, ho ale unto boruboru na hijang, na pasebutsebut dalanna.

2:24 Ho ale halode boruboru, na somal di halongonan, na mangkosahon alogo dibahen hahisapon ni rohana i, tung ise ma mangambat pangimbungna i? Basa na mangalului ibana, ndang pola loja; sai jumpang nasida do ibana di bulan hasomalanna i.

2:25 Sai otapi ma patmu, unang tung so marsarung dohot tolonanmu, asa unang mauas! Hape nimmu do: Ndang marniula, ndang adong labana! Ai huhaholongi do angka na pulik, sai ihutihutongku do nasida.

2:26 Songon haurahon ni panangko, ia tardapot ibana, songon i do tarurak pinompar ni Israel: Nasida, angka rajanasida, partoginasida, malimnasida dohot panurirangnasida.

2:27 Angka na mandok tu hau: Damang do ho, jala tu batu: Ho do manubuhon ahu! Ai tangkuhukna didompakkon tu ahu, ndada bohina; hape ia di tingki hinamagonasida, angka ninna do: Hehe ma ho ale Tuhan, jala palua hami!

2:28 Alai didia do * Debatam, angka na binahenmi di ho? Angka nasida nian hehe! Tung paluaon nasida do ho ulaning di tingki hinamagom? Ai doshon bilangan ni hutam do angka Debatam, ale Juda.

2:29 Boasa ma tung ahu badaanmuna? Tung saluhut do hamu marbalik sian ahu, ninna Jahowa.

2:30 Tung na so marnosan do, na hulinsingi angka anakmuna, ndang * dijangkon nasida pinsangpinsang. Podangmuna do manganhon * panurirangmuna, songon babiat panoro.

2:31 Oe hamu, na sansundut on! Parateatehon hamu ma hata ni Jahowa: Tung halongonan do ahu di Israel, manang tung tano hagolapon? Boasa tung dohonon ni bangsongku: Mompasompas ma hami, ndang olo be hami manopot ho.

2:32 Tung tarhalupahon namarbaju ma pangkeanna, manang oroan i hohosna? Alai anggo bangsongku nunga dihalupahon ahu, ndang be habilangan lelengna.

2:33 Boasa sai dipalemeslemes ho dalanmu mangalului bangunan ni roham? Dibahen i huhut umbahen disomali ho angka dalanmu di hajahaton.

2:34 Jumpang do huhut di angka sampesampe mudar ni halak na pogos, angka na so marpipot. Ndang manang disihabunian jumpang ahu, tung di na andar do.

2:35 Hape nimmu dope: Ndang marpipot ahu. Nunga tahe sumurut rimasna sian ahu. Ida ma, sai * dabuonku do uhum tu ho, ala na nidokmu: Ndang mardosa ahu.

2:36 Sai mulakulak do ho paimbarhon dalanmu. Nang binahen ni Misir tarurak do ho, suang songon haurahonmu binahen ni Assur.

2:37 Sian i pe, ingkon ruar do ho, huhut manjujung tanganmu manimbasnimbas. Ai nunga dipesanhon Jahowa haposan ni roham, gabe ndang manjadi tahim tu nasida.

Jeremia 3

3:1 Dung i ninna do songon on: Tung sura * dipaulak baoa jolmana, gabe laho boruboru i sian ibana marsinonduk mangan tu na asing, tung tagamon mulak ma ibana tu boruboru i? Nda ramun situtu ma luat bongkai? Alai anggo ho, atik pe naung torop mangalangkup ho, sai mulak ma tu ahu, ninna Jahowa.

3:2 Manaili ma ho dompak angka robean, jala ida! Didia na so maruhum na jat ho? Hundul do ho di pinggol ni angka dalan paimaimahon nasida, songon halak Arab di halongonan, gabe diramuni ho tano i marhitehite parsibabijalangonmu dohot hajahatonmu.

3:3 Jadi alani tarambat udan sipaha pitu, jala ndang ro udan sipaha sada. Alai marpardompahan sibabijalang do ho, ndang diboto ho na maila.

3:4 Nda joujou do ho olat ni rasirasa nuaeng mandok tu ahu: Ale amang, partogingku do ho olat ni sidakdanakonku!

3:5 Tung salelenglelengna do ulaning ibana manjujur, jala marsunisunian tongtong? Ida ma, songon i do hatam, alai diulahon ho do angka hajahaton, lam ditambai ho dope.

3:6 Dung i ninna Jahowa ma mandok ahu uju di ngolu ni raja Josia: Diida ho do, na binahen ni Israel na marbalik i? Tung laho do ibana tu * nasa dolok na buntul dohot tu toru ni nasa hau na rata, jala maruhum na jat disi.

3:7 Jadi ningku ma, nang dung diulahon sude angka i: Sai mulak ma ho tu ahu! Alai ndang olo ibana mulak. Jadi diida anggina, Juda na marbalik i ma i.

3:8 Alai huida, atik pe hupaulak * Israel na marbalik i, na maruhum na jati, ala ni saluhutna i, jala hulehon surat patilaho tu ibana, hape ndang mabiar anggo * anggina Juda na so maruhum i, lam laho do dohot ibana maruhum na jat.

3:9 Jadi sian soara ni parsibabijalangonna tarramun ma tano i, jala maruhum na jat ibana tu batu dohot tu hau.

3:10 Alai songon i pe angka i sudena, laos so mulak tu ahu anggina, Juda na so maruhum i sian nasa rohana, marpangansi do tahe, ninna Jahowa.

3:11 Dibahen i umbahen didok Jahowa mandok ahu: Tigoran dope roha ni Israel na marbalik i sian Juda na so maruhum i.

3:12 Laho ma ho, jala tingtingkon angka hata on dompak utara, jala dok ma: Sai mulak ma ho, ale Israel na marbalik i, ninna Jahowa; unang pe huparupi bohingku mida hamu, ai * pardengganbasa do ahu, ninna Jahowa, ndang manjujur ahu salelenglelengna.

3:13 Asal ditanda ho hajahatonmu, na tinundalanmu Jahowa Debatam, jala mulahulak ho tu angka debata sileban di toru ni saluhut hau na rata, jala ndang ditangihon hamu soarangku, ninna Jahowa.

3:14 Sai mulak ma, hamu ale angka anak na marbalik i, ninna Jahowa, ai * ahu do harajaanmuna hian, jala alaponku do hamu * sahalak sian sada huta, jala dua halak sian sada marga, jala togihononku do hamu tu Sion.

3:15 Jala lehononku tu hamu angka parmahan, hombar tu lomo ni rohangku, jadi marparbinotoan, jala marroha nasida marmahan hamu.

3:16 Dung i masa ma, ia dung torop jala mabue hamu di tano i di angka ari sogot, ninna Jahowa, ndang be dohonon ni halak: Poti parpadanan ni Jahowa! Ai ndang be tubu di roha ni manang ise, manang paingotingotonna, jala ndang be lulululuanna manang bahenonna na asing.

3:17 Goaron ni halak ma Jerusalem di tingki na sasada i: Habangsa ni Jahowa, jala * marpungu tusi sude angka parbegu, tu goar ni Jahowa na di Jerusalem, jala ndang be * paihutonnasida hatangkangon ni rohanasida na jati.

3:18 Di angka ari i laho ma pinompar ni Juda tu pinompar ni Israel jala rap ro nasida sian tano na di utara tu tano na huturpukhon tu ompumuna mambahen teanteananna.

3:19 Jala nunga pola hudok: Sai pagabeonku do ho di anak, jala lehononku tu ho tano hasudungan ni roha, * partalian hamuliaon di tongatonga ni angka parangan sian angka parbegu! Jala nunga pola hudok: * Damang do ahu goaronmu, jala ndang be tundalanmu ahu.

3:20 Alai tongon tahe, songon panadingkon ni parompuan di puangna, songon i do panadingkonmuna di ahu, ho ale pinompar ni Israel, ninna Jahowa.

3:21 Tarbege do suara di angka robean, partatangison ni anak ni Israel, ala diparoa nasida dalannasida, ala dihalupahon nasida Jahowa Debatanasida i.

3:22 Sai mulak ma, hamu ale angka anak na marbalik i, asa hupamalum panundalionmuna i! * Ida ma, na ro ma hami manopot ho, ai ho do Jahowa Debatanami.

3:23 Tongon tahe, ndang adong hirimon hatuaon sian angka robean, manang sian angka dolokdolok, ai holan sian Jahowa Debatanta ro hatuaon ni Israel.

3:24 Alai haurahon do manganhon na hinangaluthon ni angka ompunta sian sidakdanahonta: Birubirunasida dohot jongginasida, anaknasida dohot boruna.

3:25 Marpangkean do hita di haurahonta, jala dihungkupi haleaonta do hita, ala mardosa hita dompak Jahowa Debatanta, hita tahe dohot ompunta sian sidakdanahonta rasirasa sadarion, jala ndang itatangihon soara ni Jahowa Debatanta.

Jeremia 4

4:1 Molo tung mulak ho, ale Israel, ninna Jahowa, tu ahu ma ho mulak; jala molo tung dipadao ho angka hasogiron pineopmu sian jolongku, ndang tagamon mompasompas ho.

4:2 * Marmangmang ma ho tu Jahowa na mangolu i di bagasan hasintongan, di bagasan uhum dohot di bagasan hatigoran jadi pasupasuon ni angka parbegu dirina di bagasan ibana jala mamujimuji mida ibana.

4:3 Ai songon on do hata ni Jahowa tu angka baoa sian Juda dohot tu isi ni Jerusalem: * Rabi hamu ma tombak an di hamu, jala unang hamu manabur tu tongatonga ni sihupi.

4:4 * Sunati hamu ma dirimuna di Jahowa, jala padao hamu hulup ni rohamuna, hamu baoa sian Juda dohot hamu isi ni Jerusalem, asa unang manombo rimashu songon api, jala marsigorgor, hape ndang adong na tuk mangintopi, ala ni hinajahat ni angka pambahenanmuna.

4:5 Baritahon hamu ma di Juda, jala patubegehon hamu di Jerusalem, jala dok hamu: Palu hamu ma sarune di luat i; pangiar hamu ma soaramuna maningtingkon: Marpungu ma hamu, asa itatopot angka huta na gonting.

4:6 Patindang hamu ma partonggol dingkan Sion, rim ma hamu maporus, unang ngongong, ai * paroonku ma jea sian utara dohot hamagoan bolon.

4:7 Nunga nangkok singa i sian pangaropanna, jala nunga borhat siago angka parbegu, ruar sian ingananna i mambahen halongonan tano i, jala tarulang angka hutam, soada be pangisina.

4:8 Dibahen i hohoshon hamu ma abit tangki mananangisi jala mangandungi ma hamu, ai ndang tagamon mulak parpiar ni muruk ni Jahowa sian hita.

4:9 Jadi masa ma di ari bongkai, ninna Jahowa, tarjepol ma roha ni raja dohot roha ni angka partogi, jala tarhatotong angka malim, jala tarsonggot angka panurirang.

4:10 Ianggo ahu ningku: Oe, ale Tuhan Jahowa! Songon ma sipaotooto situtu dibahen ho tu bangso on dohot tu isi ni Jerusalem, di na nidokmu: * Mardamedame ma hamu! Hape tolpus ro di ateate podang i.

4:11 Di tingki uju i dohonon ma tu bangso on dohot tu isi ni Jerusalem: Ro do alogo na mohop sian angka robean ni halongonan, tumulus dalan dompak boru ni bangsongku ndada laho marsege manang paiashon.

4:12 Alogo na gumogo sian nasida ro sian ahu. Dohot ma ahu nuaeng mardabudabu dohot nasida.

4:13 Ida ma, manaek do ibana, songon ombun, jala songon halisungsung angka huretana; dumoras do angka hodana sian lali. Marjea ma hita on, ai nunga pesan hita.

4:14 * Buri ma roham sian hajahaton i, ale Jerusalem, asa maruli panumpahion ho. Sadia leleng on marmalam angka sangkap ni jeam di bagasan roham.

4:15 Ai nunga tarbege barita sian Dan, jala adong na patubegehon jea sian dolok Epraim.

4:16 Pabotohon hamu ma tu angka parbegu, ida ma, tingtingkon hamu ma tu Jerusalem: Nunga ro angka ari partungkum sian tano na dao, angka na marsurak dompak angka huta ni Juda.

4:17 Doshon angka pamuro di ladang * pangkalianginasida di ho, ala dialo nasida ahu, ninna Jahowa.

4:18 Dalanmu dohot pambahenanmu mangkorhon angka i di ho, jea ni roham do i, umbahen tolhas ro di pusupusum na paet i.

4:19 Inang butuhangkon, butuhangkon! Hansitnai huhilala ateatengku di bagasan, sai mulbahulbak do pusupusungku, ndang tarbahen ahu sip, ala naung hubege soara ni sarune, dohot hariburon ni hamusuon.

4:20 Mardapotdapot angka barita hataluan di tingtingkon; tung sandok tano i tarulang do; sompong do maloha angka soposopongku, di na satongkin do angka undungundungku.

4:21 Sadia leleng on idaonku partonggol i, begeonku soara ni sarune?

4:22 Ai na oto do bangsongku; ia ahu, ndang ditanda nasida, angka anak na oto do nasida jala ndang marroha; angka na bisuk do nasida mambahen na jat, alai mambahen na denggan ndang diboto nasida.

4:23 Hutailihon tano i, jala ida ma, halongonan dohot halalanga! Hubereng dompak langit i, hape ndang marhatiuron.

4:24 Hubereng angka dolok, jadi ida ma, humuntal do sudena i jala humutur do sude angka robean.

4:25 Hubereng humaliang, jadi ida ma, ndang adong jolma, jala nunga marpurpur sude pidong angka na martongatonga langit.

4:26 Hubereng hauma bosar, jadi ida ma, nunga gabe halongonan, jala nunga maloha sude angka huta maradophon Jahowa, maradophon parpiar ni rimasna.

4:27 Ai songon on do hata ni Jahowa: Gabe halongonan do sandok tano i, alai * nda tung laos siap bahenonku.

4:28 Dibahen i margudompong sandok tano i, jala mangkolom langit i di ginjang ala naung hudok jala husangkapi, jala ndang husolsoli rohangku, jala ndang be mulak rohangku sian i.

4:29 Maradophon soara ni angka parsihundul dohot jolma panior, maporus do sandok isi ni huta i, dibongoti do angka parholipholipan, jala dipanaek do angka sapsap bire; tung langa do sandok huta i, ndang adong be jolma pangisina.

4:30 Ia ho ale na tartaban, aha do bahenonmu? Nang pe disolukkon ho siangmalam, jala marpangkean horunghorung sere, jala marpangiri ho pasihar panailim, laos so marniula do panjengkarim; sai na marhu ni roha do angka haholonganmu mida ho, angka ditahi nasida do hosam.

4:31 Ai hubege do soara songon soara ni boruboru na mangae posoposo, soara hagogotan songon na tumubuhon buhabaju; soara ni boru Sion, na marhoi pahortanghortangkon tanganna mandok: Soro ni aringkon, ai mandate ma annon tondingku bahenon ni angka pamunu.

Jeremia 5

5:1 Liati hamu angka alaman ni Jerusalem, sai ida jala tanda jala diori hamu di angka alamanna i manang tung jumpang hamu sada jolma, manang tung adong ma sada na mangulahon uhum, na usouso di hasintongan, asa marpamuati rohangku di huta i.

5:2 Jala nang pe didok nasida: Songon sintongna mangolu Jahowa, manolon na tutu do nasida disi.

5:3 Ale Jahowa, * nda tu hasintongan do matam laho? * Nunga nian dilinsingi Ho nasida, alai ndang mangilala nasida disi; nunga nian disiaphon Ho nasida, tong do nasida manjua manjangkon sipodaon; tung umpir do bohinasida sian dolok batu, manjua do nasida paubahon rohana.

5:4 Ianggo Ahu, ningku do: Holan angka na pogos do nasida, angka na pinaotooto! Ala ndang ditanda nasida dalan ni Jahowa, uhum ni Debatanasida i.

5:5 Dung i laho ma ahu tu angka na sangap, jala mangkatai dohot nasida, ai anggo nasida, diboto nasida do dalan ni Jahowa, uhum ni Debatanasida i. Hape rap do nasida * mamonggoli auga, angka dirapui do angka tompina i.

5:6 Dibahen i bunuon ni sada singa sian tombak nasida, gompul harangan mangago nasida; martaronggop ma di lambung hutanasida; ganup na laho ruar sian i soroonna do; ai sai lam ganda do pangalaosionnasida, panundalionna pe ndang habilangan.

5:7 Tung beha ma pamuati ni rohangku di ho? Ditadingkon angka anakmu do Ahu, jala marmangmang nasida tu na so debata, jala dung butong nasida hubahen, gabe mangalangkup nasida, marrongoman tu bagas parmainanon.

5:8 Angka hoda tunggal na mokmok do nasida, angka na mompasompas, mariheihe be do tu jolma ni donganna.

5:9 Tung * so luluhononku angka sisongon i, ninna Jahowa manang tung so sudolhonon ni rohangku tu bangso sisongon i.

5:10 Panaek hamu ma parikna, jala gargari hamu, alai * unang tung siap bahen hamu! Tultuli hamu ma angka rantingna, ai ndada Jahowa nampuna nasida.

5:11 Ai marbalik situtu do dompak ahu, pinompar ni Israel dohot pinompar ni Juda, ninna Jahowa.

5:12 Nunga disoadahon nasida Jahowa, jala didok: Ndang adong ibana, jala ndang tagamon ro tu hami jea, nang podang manang haleon, ndang tagamon idaonnami.

5:13 Jala angka panurirang gabe alogo, jala ndang adong hata ni Jahowa di bagasan nasida; songgop tu nasida sandiri do songon i.

5:14 Dibahen i songon on do hata ni Jahowa, Debata Zebaot: Ala songon i hatamuna i, ida ma lehononku ma angka hatangku tu bagasan pamanganmu gabe api, jala bangso on gabe hau, asa suda nasida dipangan.

5:15 Ida ma, paroonku ma dompak hamu * sada bangso sian na dao, ho ale pinompar ni Israel, ninna Jahowa; sada bangso na tang do i, bangso sian na robi, bangso na marpangkuling na so binoto, jala ndang antusanmu manang aha nidokna.

5:16 Tudoshon tanoman na talak do parsumbiaanna, sude do nasida ulubalang.

5:17 Panganonna do sigotilonmu dohot rotim; panganonnasida do angka anakmu dohot angka borum; sohalanna do angka birubirum dohot angka lombum, sudahononna do parbue ni hau anggurmu dohot antajaum; tabanonna do hutam angka na gonting i, haposan ni roham na sai laon marhitehite podang.

5:18 Alai nang di angka ari bongkai, ninna Jahowa, ndang laos siap hamu bahenonku.

5:19 Jala molo didok hamu: Ala ni aha umbahen saluhutna i dibahen Jahowa Debatanami tu hami? Dohononmu ma tu nasida: Songon panadingkonmuna di ahu mangoloi angka debata sileban di tanomuna, laos songon i do parhatobanon ni halak na pulik hamu di tano na so hamu nampunasa.

5:20 Baritahon hamu ma i tu pinompar ni si Jakkob, jala tingtingkon hamu ma i di Juda, mandok songon on:

5:21 Ua * tangihon ma on, ho ale bangso na oto, jala na so marroha! Angka na marmata nian, hape ndang marnida, angka na marpinggol nian, hape ndang marbinege.

5:22 Tung so pola habiaranmuna ahu, ninna Jahowa, manang so pola parbalohan ni laut, bahen patik salelenglelengna, na so tupa laosanna; jala nang pe gunsang, ndang hahuaonna, nang pe marhasakhasak angka galumbangna, laos so pulhaonna do.

5:23 Alai anggo bangso on parroha na marbalik do, jala na manggunturi, marbalik do nasida, laos laho songon i.

5:24 Jala ndang dung didok di bagasan rohana: Ua itahabiari ma Jahowa Debatanta, * na mangalehon udan di tingkina, na mangaramoti di hita minggu angka na pinatik tu gotilon.

5:25 Alai angka hajahatonmuna palipehon sisongon i, jala angka * dosamuna mangambat na denggan i sian hamu.

5:26 Ai jumpang do di tongatonga ni bangsongku angka parjahat, angka na manisipi, songon angka parsambil, angka na manaon jorgong padapot jolma.

5:27 Songon huruhuruan na gok pidong, songon i do bagasnasida gok sipaotooto. Dibahen i timbul, jala mamora nasida.

5:28 * Marmiak jala marlinolino nasida, huhut binsat nasida dibahen angka pambahenan na jahat, ndang mandabu uhum na sintong nasida, * uhum tu na sopot so marama, hape sai manjadi do sangkapnasida; jala ndang diuhum nasida angka na pogos hombar tu uhum.

5:29 Tung so luluhononku angka sisongon i, ninna Jahowa? Tung so sudolhononku ma tu bangso na songon on.

5:30 Masa do di tano i hasogiron na sogir jala na jorbut.

5:31 Angka panurirang manurirangi ansiansi, jala angka malim gumomgom tangannasida, jala bangsongku mangkaholongi sisongon i. Alai aha ma bahenonmuna apala parpudi?

Jeremia 6

6:1 Maporus ma, hamu ale angka anak ni si Benjamin sian tongatonga ni Jerusalem, jala palu ma sangka di Tekoa, jala patindang ma tonggol di atas Bethakkerem; ai sian utara mangondam ro hamagoan dohot jea bolon.

6:2 Tudoshon porlak na uli, jala na angonangon do ho, ale boru Sion.

6:3 Ro ma tusi angka parmahan rap dohot punguannasida; pagohononna ma angka * undungundungna mangkaliangi Sion, jala jampalonna ma ingananna be.

6:4 Parbadiai hamu ma hamusuon dompak nasida! Beta hita nangkok di hos ni ari! Marjea ma hita, ai nunga manihir ari, ai lam ganjang halinu potangna i.

6:5 Beta hita nangkok bornginna i, asa itaago angka bagas bolon di nasida.

6:6 Ai songon on do hata ni Jahowa Zebaot: Taba ma angka hau, jala bahen hamu hubu manungkum Jerusalem humaliang! I ma huta sitoruan, ai * tung pangarupaon situtu masa di tongatongana.

6:7 Songon mual na marbullakkon aekna, songon i dibullakkon huta i hajahatonna; pangarupaon dohot gogo tarbege di bagasan, parsahiton dohot pardangolan masa tongtong di jolo ni bohingku.

6:8 Sai olo ma ho ajaran, ale Jerusalem, asa unang marsiruntus rohangku sian ho, unang hubahen ho, gabe halongonan, gabe tano na so marpangisi!

6:9 Songon on do hata ni Jahowa Zebaot: Sai jomputon do na teba sian Israel, songon parbue ni hau anggur. Ulahi pabongot tanganmu, songon halak siseat parbue ni anggur tu bagasan angka tong.

6:10 Tung tu ise ulaning ahu mandok hata dohot mangkatindangkon, asa dibege nasida? Ida ma tung na tangkang do rohanasida, jala ndang tarbahen nasida mananginangi. Ida ma, hata ni Jahowa gabe sirehereheon di nasida, ndang lomo rohanasida disi.

6:11 Dibahen i gok rimas ni Jahowa do rohangku, ndang hatiopan ahu be ateatengku. Usehon ma rimasmu tu dakdanak angka di alaman dohot tu saluhut dolidoli, angka na marpungu; ai ingkon rap tartangkup do baoa dohot boruboru, na ubanon rap dohot na sarimatua.

6:12 Jala saluhut bagasnasida, ingkon sahat tu na asing do ro di haumana dohot jolmana saluhut, ai patoltolonku ma tanganku dompak pangisi ni tano i, ninna Jahowa.

6:13 Ai sian na ummetmet sahat ro di na umbalga, luhut nasida sai * masilaba do, jala sian panurirang sahat ro di malim, luhut nasida mambahen sipaotooto.

6:14 Jala leap do pandaoninasida di bugang ni boru ni bangsongku, ninna do: * Dame, dame! Hape ndang adong dame.

6:15 Patut tarurak nasida, ai hasogiron do diula nasida, hape laos so dihailahon nasida dope, jala ndang diboto be na maila. Dibahen i ingkon rage nasida rap dohot angka na rage, di tingki pangaluluhonku marragean nasida, ninna Jahowa.

6:16 Songon on do hata ni Jahowa: Jongjong ma hamu tu angka dalan, jala tangkasi hamu, jala usouso hamu di angka dalan na robi, manang didia dalan na denggan i, i ma dalan i hamu, asa * jumpang hamu hasonangan ni rohamuna! Hape didok nasida do: * Ndang olo hami mardalan sian i.

6:17 Jadi hupatindang tu hamu angka * parjaga. Tangihon hamu ma soara ni sarune! Alai ninna nasida ma: Ndang olo hami manangihon.

6:18 Dibahen i tangihon ma, hamu ale angka bangso parbegu, jala boto ma ho ale parluhutan, na masa di tongatonganasida.

6:19 Tangihon ma, ho ale tano on! Ida ma, paroonku ma jea tu bangso on, parbue ni sangkapnasida. Ai ndang ditangihon nasida angka hatangku, jala ditoishon nasida do patikku.

6:20 Tu dihangku ma daupa na ro sian Seba dohot ulumamis na denggan sian tano na dao? Ndang huhalomohon peleanmuna situtungon, jala ndang las rohangku mida peleanmuna sipotongon.

6:21 Dibahen i songon on do hata ni Jahowa: Ida ma, bahenonku ma bangso on angka partuktuhan, asa martinggangan disi amaama rap dohot dakdanak jolma na marsahuta dohot alealena rap mago do.

6:22 Songon on do hata ni Jahowa: Ida ma, ro do sada bangso * sian tano na tungkan utara, sada bangso na bolon hehe sian angka ujung ni tano on.

6:23 Sior dohot hujur diboan nasida, jorbut do bangso i, jala ndang maralangalang; soara nasida marhasak do songon laut, jala marsihundul be nasida di hoda, marsinjata be, songon halak parmusu mangaromrom ho, ale boru Sion.

6:24 Nunga hubege hami baritana; nunga pola lenduk tangannami, targogot hami dibahen, rianon songon boruboru na laho mangintubu.

6:25 Unang laho hamu tu ladang, jala unang mardalani hamu di balian, ai disi do podang ni musu jala habiaran humaliang.

6:26 Ho ale boru ni bangsongku, * hohoshon ma tangki tu gontingmu, jala margulu ho di sirabun, mangandung sidangolon ma ho, * songon na na mate anak sasada, ai so pangkiriman do ro sipangago tu hita.

6:27 Nunga hubahen ho gabe siuji bangsongku dohot partanobatoan, asa diboto jala diuji ho dalannasida.

6:28 Tung saluhut do nasida manggunturi situtu, angka na mangadangadangkon sipaotooto, tung * tombaga jala bosi do nasida, saluhut nasida halak pangago.

6:29 Marbujogo pandusdusan i tung suda do simbora i dibahen api, ndang marniula sai datdatan lalaan, ai ndang olo mamulik angka parjahat i.

6:30 Perak na ambolong do nasida targoar, ai nunga di ambolongkon Jahowa nasida!

Jeremia 7

7:1 On ma hata na ro tu si Jeremia sian Jahowa songon on:

7:2 Laho ma ho jongjong tu pintu ni bagas ni Jahowa, jala tingtingkon disi hata on, jala dok ma: Tangihon ma hata ni Jahowa, ho ale sandok Juda, angka na bongot tu bagasan pintu on laho marsomba tu Jahowa.

7:3 Songon on do hata ni Jahowa Zebaot, Debata ni Israel: Padenggan hamu ma dalanmuna dohot pambahenanmuna, asa hupaian hamu di inganan on marsonangsonang.

7:4 Unang ma marhaposan hamu di angka hata sipaotooto, angka na mandok: Joro ni Jahowa, joro ni Jahowa, joro ni Jahowa do on!

7:5 Alai molo dipadenggan hamu situtu dalanmuna dohot pambahenanmuna; molo dibahen hamu uhum hatigoran ganup baoa tu donganna.

7:6 Molo so dirupa hamu * halak na buro, na tading di lampin, boruboru na mabalu, jala unang usehon hamu mudar na so marpipot di inganan on jala unang ihuthon hamu angka debata sileban, gabe hamagoan di hamu.

7:7 Jadi paianonku ma hamu di inganan on, di tano naung hubasabasahon tu ompumuna sian na robi, ro di saleleng ni lelengna.

7:8 Alai tahe ida ma, marhaposan tu angka hata sipaotooto do hamu, angka na so marguna.

7:9 Tung beha ma partorangna? Manangko hamu mambunu, mangalangkup, manolon na tutu, manutung daupa tu Baal, jala mangihuthon tu debata sileban angka na so tinandamuna hian.

7:10 Dung i angka ro hamu tindang di jolongku, di bagasan joro on na targoar tu goarhu, jala didok hamu: * Nunga malua hami laho mambahen saluhut angka hasogiron on.

7:11 Tung gabe * liang ni angka pandobo do joro on, na targoar tu goarhu di rohamuna? Ahu pe, nunga tangkas huida, ninna Jahowa.

7:12 Ua tung laho hamu tu ingananku na jolo, na di * Silo, parmianan ni goarhu hubahen di na robi, jala ida hamu na hubahen tusi ala hajahaton ni bangsongku Israel.

7:13 Nuaeng pe, ala diulahon hamu saluhut angka pambahenan on, ninna Jahowa, jala * hupasogot mangkulingi hamu, hape ndang olo hamu manangihon, jala hujou hamu, hape ndang olo hamu mangalusi.

7:14 Jadi * bahenonku ma tu joro, na targoar tu goarhu, na pinangasahonmuna, jala bahenonku do tu inganan na hubasabasahon tu ompumuna, suang songon na hubahen tu Silo na jolo.

7:15 Jala bolongkononku ma hamu sian jolongku, * songon na hubolongkon saluhut hahaanggimuna, i ma sandok pinompar ni Epraim.

7:16 Ia ho, unang ondihon bangso on, jala unang pangiar angguhangguk dohot tangiangmu mangondihon nasida, jala unang sai datdati mangido tu ahu, ai ndang olo ahu tumangihon ho.

7:17 Ndang diida ho huroha na binahennasida di angka huta ni Juda dohot di angka alaman ni Jerusalem?

7:18 Papungupungu soban angka dakdanak i, mangopan api angka amaama, mandogili na niudi angka inaina laho mambahen juada di * langit, jala diusehon nasida tuak tangkasan di angka debata sileban laho mangarsahi ahu.

7:19 Tung ahu ma na niarsahannasida disi? Ninna Jahowa. Nda laos nasida niarsahanna bahen haurahon ni bohinasida i?

7:20 Dibahen i songon on do hata ni Tuhan Jahowa: Ida ma, usehononku ma murukku dohot parpiar ni rimashu tu inganan on, tu jolma dohot tu pinahan dohot tu hau di ladang dohot parbue ni tano i, asa marsigorgor, jala ndang adong na mangintopi.

7:21 Songon on do hata ni Jahowa Zebaot, Debata ni Israel: Tambai hamu angka pelean situtungon dohot sipotongon, jala pangan hamu ma juhut.

7:22 Ai ndang hudokkon ompumuna, jala ndang hutonahon tu nasida, uju di ari na hutogihon nasida ruar sian tano Misir, taringot tu pangalaho ni pelean situtungon, manang pelean sipotongon.

7:23 Alai hata on do na hutonahon tu nasida, songon on: Sai tangihon hamu ma soarangku, asa ahu gabe Debatamuna, jala hamu gabe bangsongku; antong dalan i hamu ma saluhut dalan, angka na hutonahon tu hamu, asa marsonangsonang hamu.

7:24 Alai ndang olo nasida manangihon, jala ndang ditarehon nasida pinggolnasida i, alai sai mardalani nasida di bagasan sangkapsangkap dohot hatangkangon ni rohanasida na jahat i, jala sai ditundali nasida do ahu, ndada didompakkon.

7:25 Olat ni ari haruruar ni ompumuna sian tano Misir, sahat ro di ari on, sai husuru do tu hamu saluhut naposongku, angka panurirang i, ariari sai hudatdati marsuru nasida.

7:26 Alai ndang ditangihon nasida ahu, jala ndang ditarehon pinggolnasida, tung ditangkangi nasida do tangkuhukna, na manjahati tahe nasida sian ompunasida i.

7:27 Dihatahon ho pe tu nasida saluhut hata on, ndang tagamon tangihononnasida ho, dijouhon ho pe tu nasida, ndang tagamon alusanna.

7:28 Dibahen i dohononmu ma tu nasida: On ma sada bangso na so tumangihon soara ni Jahowa Debatana, jala na so olo manjalo pangajaran. Nunga mago * hasintongan, jala siap sian pamanganna.

7:29 Antong nabungi ma obuk ni ulum, jala reongkon, jala pangiar soaram mangandungi di angka robean, ai nunga diambolongkon Jahowa, jala ditadingkon sundut na ni rimasanna i.

7:30 Ai diulahon anak ni Juda do na roa di adopanku, ninna Jahowa; dipatindang nasida do hasogironnasida tu bagasan joro na targoar tu goarhu laho paramunhon.

7:31 Jala dipauli nasida pantilpantil di * Topet na di rura ni angka anak ni si Hinnom laho mamurun * anaknasida dohot borunasida di bagasan api, na so dung hutonahon, manang na so dung tubu di bagasan rohangku.

7:32 Dibahen i, ida ma, ro do angka ari sogot, ninna Jahowa, ndang be dohonon ni halak Topet, manang rura ni angka anak ni si Hinnom, tung rura pamunuan na ma, laos tartanom halak di Topet, ala soada inganan na asing.

7:33 Ia bangke ni bangso on, gabe panganon di pidong angka na martongatonga langit dohot di pinahan ni tano on, jala ndang adong na manggorahon.

7:34 Jadi mansohot bahenonku sian angka huta ni Juda dohot sian alaman ni Jerusalem soara las ni roha dohot olopolop, soara ni pangoli dohot soara ni oroan, ai ingkon gabe halongonan tano i.

Jeremia 8

8:1 Di tingki uju i, ninna Jahowa, huaron ni halak ma holiholi ni angka raja ni Juda dohot holiholi ni angka indukna, dohot holiholi ni angka malim dohot holiholi ni angka panurirang, dohot holiholi ni pangisi ni Jerusalem sian tanomanna be.

8:2 Jala panserakhononna asa didadang mata ni ari dohot bulan ro di saluhut parangan di langit, * angka na hinaholonganna, angka naung nioloanna, jala niihuthonna, angka naung niluluanna, jala marsomba tusi jala ndang papunguon muse manang * tanomon, tung gabe napa do i pasombuon di sisik ni tano on.

8:3 Tagonan hamatean asa hangoluan pilliton ni saluhut angka na tading i, sian sundut na jahat on, di saluhut inganan habalian ni angka na tading, ninna Jahowa Zebaot.

8:4 Jala dok ma tu nasida: Songon on do hata ni Jahowa: Tung adong ma halak tinggang, gabe so naeng hehe muse? Tung adong ma na lilu sian dalan, gabe so naeng mulak muse?

8:5 Boasa tung muba ia bangso on di Jerusalem tongtong nasida manundali jala marsigantung di sipaotooto, tung dijua nasida do mulak!

8:6 Hupaeleng pinggolhu, jala hutangitangi, hape na so hasea dipahatahata nasida; ndang adong manang ise na sumolsoli rohana ala hajahatonna, na mandok nian: Tung aha do na hubahen on? Tung saluhut do nasida marbalik di parlojongonna, songon hoda na manahopi tongtangan.

8:7 Gari pidong siboru tasik na martongatonga langit, diboto do tingkina; jala anduhur dohot leangleang dohot situbiak marningot tingki harorona; alai anggo bangsongku, ndang diboto uhum ni Jahowa.

8:8 Beha pambahenmu mandok: Angka na pistar do hami, jala di hami do patik ni Jahowa! Tongon do, ida ma, holan sipaotooto do na binahen ni panurat sipaotooto ni angka juaratulis.

8:9 Leak ma tarurak angka na pistar, tarsonggot nasida jala tartangkup; ida ma, nunga tung dibolongkon nasida hata ni Jahowa, tung hapistaran dia ma di nasida?

8:10 Dibahen i lehononku ma jolmanasida tu halak na asing, angka ladangnasida tu halak partaban, ai sian na metmet sahat ro di na magodang, saluhut do nasida * masilaba, sian panurirang sahat ro di malim, saluhut do nasida mangulahon sipaotooto.

8:11 Rausraus do pandaonina, ia di bugang ni boru ni bangsongku, ninna do: Dame, dame! Hape ndang adong dame.

8:12 Jadi tarurak ma nasida, ai hasogiron do diula nasida; hape ndang diboto nasida be na maila, manang marlangan mida haurahon. Dibahen i marragean ma nasida rap dohot angka na rage; di tingki partubolan tu nasida martinggangan nasida, ninna Jahowa.

8:13 Duduhonku ma nasida, ninna Jahowa. Ndang adong be parbue ni hau anggur di hau anggur, ndang adong be antajau di hau antajau, malos do nang bulung i, jala pasahatonku do nasida tu angka na mangaluntakluntak nasida.

8:14 Ala ni aha hita maringanan disi? Beta hita marpungu, jala laho tu huta angka na gonting, siap disi ma hita! Ai Jahowa, Debatanta maniaphon hita, jala dipainum tu hita * aek rasun, ai dompak Jahowa do hita mardosa.

8:15 Sai maimaima do * hatuaon do hita, hape ndang adong ro na denggan; di tingki hamalumon, hape ida ma: Hasonggoton do.

8:16 Sian Dan tarbege parngongos ni angka hodana, sian soara pariheiheon ni angka hodana tunggal humuntal sandok tano on. Solaon nasida ma tano i, jala lamotanna ro di isina, huta i ro di pangisina di bagasan.

8:17 Ai ida ma, suruonku ma tu tongatongamuna angka * ulok dari, hala angka na so * tarpamuli utiutian, angka i ma mamarguti hamu, ninna Jahowa.

8:18 Aut ni dapot ahu nian apulapul ali ni pardangolan! Hape mandate do rohangku di bagasan.

8:19 Tarbege do soara angguhangguk ni boru ni bangsongku sian tano na dao: Beha ndang be Jahowa di Sion, ndang be disi ia rajana? Boasa tung digitik nasida ahu marhitehite ganaganaannasida, angka na tinuang, marhitehite angka debata sileban!

8:20 Nunga pola salpu gotilon, nunga pola salpu partaonan logo ni ari, hape laos so dapotan haluaon hami!

8:21 Tung magege do ateatengku binahen ni bugang ni boru ni bangsongku; martujung ahu, tung tarhatos do huhilala.

8:22 Tung na so adong be ulaning * miak di Gilead, manang so adong be pandaoni disi? Boasa tung so naek hahisaron ni boru ni bangsongku?

8:23 Aut ni gabe aek nian ulungku, jala matangku gabe mual pariluiluan, asa hutatangisi nian arian dohot borngin, angka na rage sian boru ni bangsongku.

Jeremia 9

9:1 Aut ni adong nian di ahu di halongonan sada bagas parmalaman ni pangallung, asa hutadingkon bangsongku, asa bungkas ahu tumadingkon nasida, ai saluhut nasida angka pangalangkup do, luhutan ni angka pangoseose.

9:2 Tangging do dila nasida songon sior maniorhon sipaotooto, jala ndang dihajongjongkon nasida hasintongan di tano i, ai mardapotdapot hajahaton diula nasida, alai anggo ahu, ndang ditanda nasida, ninna Jahowa.

9:3 Sai diramoti be ma dirina maradophon donganna, jala unang marhaposan tu dongan manang ise pe, ganup dongan marbisukbisuk, jala ganup pedan mangkata tundal.

9:4 Tung masipaotootoan do na marpedan jala ndang di hatahon hasintongan; nunga dipasomal dila nasida mandok sipaotooto, jala marngalutan dihilala nasida manjahati.

9:5 Di tongatonga ni sipaotooto do ingananmu, jala ala ni sipaotooto i manjua do nasida mananda ahu, ninna Jahowa.

9:6 Dibahen i songon on do hata ni Jahowa Zebaot: Ida ma: Lalaonku ma nasida, jala ujionku, ai tung aha dope ulaning bahenonku maradophon boru ni bangsongku?

9:7 Sumbia na ginarahon do dilanasida mangkatahon sipaotooto; hata dame dipaboa ianggo dilana tu donganna, hape mangonggop ianggo rohana di bagasan.

9:8 Tung so marlulu ahu dompak nasida alani? Ninna Jahowa; tung so marsudolsudol rohangku mida bangso sisongon i?

9:9 Di atas ni angka dolok ma bahenonku partatangison dohot angguhangguk, jala di angka jampalan di halongonan sada ende andung, ala naung siap, so adong pamolus nanggo sahalak, jala ndang be tarbege soara ni pinahan. * Pidong na martongatonga langit pe ro di pinahan, tung purpur do saluhutna.

9:10 Bahenonku do huhut Jerusalem gabe pantilpantil batu, paronggopan ni angka antuasu, jala angka huta ni Juda bahenonku gabe halongonan so adong pangisina.

9:11 Tung ise ulaning baoa * na pistar, jala na mangantusi hata on? Jala ise ibana na pinangkulingan ni Jahowa, asa baritahononna? Boasa tung siap tano on, doshon halongonan raharna, so adong pamolus.

9:12 Dung i ninna Jahowa ma: Ala na tinadingkon nasida i patikki, na hulehon tu jolonasida, jala na so tinangihon nasida soarangku, jala ndang marparange hombar tusi.

9:13 Tung tagonan * hatangkangon ni rohanasida paihutihutonna mangihuthon tu Baal, angka na niajarhon ni ompunasida i.

9:14 Dibahen i songon on do hata ni Jahowa Zebaot, Debata ni Israel: Ida ma, ahu papanganhon tu bangso i pogu jala ahu painumhon aek rasun tu nasida.

9:15 Jala ahu paserakkon nasida tu tongatonga ni bangso angka na so tinandanasida, manang ompunasida pe, jala ahu manongos podang sian pudinasida, paima sun siap nasida hubahen.

9:16 Songon on do hata ni Jahowa Zebaot: Tangihon jala jou hamu angka sibaso pangandung, asa ro nasida, jala suru hamu mangalapi angka boruboru pangarunding.

9:17 Asa dihalaputi nasida mambahen sada andung di hita, asa mabakbak iluilu sian matanta, jala mabaor aek sian imbulu ni matanta.

9:18 Ai tarbege do soara andung sian Sion: Nunga mago hita, nunga tarurak situtu hita, ai nunga bungkas hita sian tanonta, ai nunga di pangarumpakkon nasida angka bagasta!

9:19 Antong hamu inaina, tangihon hamu ma hata ni Jahowa, jala ditangkup pinggolmuna ma hata na ruar sian pamanganna, jala ajarhon hamu ma andung tu borumuna, jala ganup mangajarhon andung tu pedanna.

9:20 Ai nunga manjangkit hamatean sian pandiloannami, nunga pola dibongoti angka bagasnami, asa diragehon angka dakdanak sian alaman, angka dolidoli sian onan.

9:21 Dok ma, songon on do hata ni Jahowa: Marragean ma * bangke ni jolma, songon napa di ladang, jala songon tibalan di pudi ni panabi, jala ndang adong na papunguhon.

9:22 Songon on do hata ni Jahowa: Sai unang ma ditengahon na bisuk habisukonna, sai unang ma ditengahon na gogo hagogoonna, sai unang ma ditengahon na mora hamoraonna.

ᯘᯬᯝᯉᯬ᯲ ᯀᯉᯬ᯲ ᯑᯬ ᯂᯖ ᯉᯪ ᯐᯂᯬᯋ: ᯘᯤ ᯥᯉᯰ ᯔ ᯑᯪᯖᯩᯝᯂᯉᯬ᯲ ᯉ ᯅᯪᯘᯂᯮ᯲ ᯂᯅᯪᯘᯮᯂᯉᯬ᯲ᯉ, ᯘᯤ ᯥᯉᯰ ᯔ ᯑᯪᯖᯩᯝᯂᯉᯬ᯲ ᯉ ᯎᯬᯎᯬ ᯂᯎᯬᯎᯬᯀᯉᯬ᯲ᯉ, ᯘᯤ ᯥᯉᯰ ᯔ ᯑᯪᯖᯩᯝᯂᯉᯬ᯲ ᯉ ᯔᯬᯒ ᯂᯔᯬᯒᯀᯉᯬ᯲ᯉ.

9:23 Manang ise na naeng mamuji dirina, * on ma dipujihon: Na marroha i ibana, jala na tinandana i ahu, ai ahu do Jahowa, parasi roha na mangkajongjongkon uhum dohot hatigoran di tano on, ai angka ido lomo ni rohangku, ninna Jahowa.

9:24 Ida ma, na ro do angka ari sogot, ninna Jahowa, marlulu ma ahu dompak nasa parsunaton mardongan sibursibur.

9:25 Dompak halak Misir, dompak halak Jahudi, dompak halak Edom, dompak halak Amon, dompak halak Moab dohot dompak saluhut * na marulu na ginorbang, angka na maringan di halongonan. Ai saluhut angka parbegu ndang marsunat, alai anggo sandok pinompar ni Israel * marroha na so sinunat do.

Jeremia 10

10:1 Tangihon ma hata na hinatahon ni Jahowa tu hamu, ale pinompar ni si Israel!

10:2 Songon on do hata ni Jahowa: Unang tung guruhon hamu dalan ni angka parbegu, jala unang hasonggothon hamu angka tanda di langit, ala tarsonggot angka parbegu disi.

10:3 Ai tung alogo sambing do patikpatik ni angka bangso; ai tung * hau tombak hian ditaba marhitehite tangke, sipandean ni tangan ni pande.

10:4 Dipajagarjagar muse marhitehite perak dohot sere, dipalohot muse marhitehite labang dohot nanggar, asa unang tarhutik.

10:5 Songon pohung di parjelohan do nasida, ndang diboto mangkatai; ingkon usungon do nasida, ai ndang diboto mangalangka. Unang mabiar hamu mida nasida, ai ndang diboto mambahen na roa, manang na denggan.

10:6 Ndang adong manang ise tudoshon ho ale Jahowa! Na timbul do ho, jala na timbul goarmu marhitehite hagogoon.

10:7 Ise ma tung so habiaranna ho, ale raja ni angka bangso, ai i do na tama maradophon ho; ai di tongatonga ni saluhut angka na pistar di angka bangso, jala di saluhut harajaonna, nda tung adong tudoshon ho.

10:8 Tung saluhut do nasida angka na bodo dohot na oto: Tung hau sallobong sambing do, gabe poda na so marguna di nasida.

10:9 Perak na ninanggaran binoan ni halak sian Tarsis, dohot sere sian Upas, jadijadian ni panopa dohot tangan ni panuang; marpangkean na sinombul jala na tinubaran do i, jadijadian ni pande do saluhutna i.

10:10 Alai anggo Jahowa, i ma Debata ni hasintongan, ibana Debata na mangolu, jala raja saleleng ni lelengna! Humuntal do tano on maradophon murukna, jala ndang manahan angka bangso maradophon rimasna.

10:11 Songon on ma dohononmuna tu nasida: Ianggo debata sileban, angka na so tumompa langit dohot tano on, ingkon siap nasida sogot sian tano on dohot sian toru ni langit.

10:12 Alai anggo Debatanta ibana manjadihon tano on marhitehite gogona, ibana paojakkon liat portibi on marhitehite habisukonna, jala dipahembang langit i marhitehite hapistaranna.

10:13 Binahen ni soarana marhasak angka aek di toru ni langit, jala manaek angka ombun sian ujung ni tano on; ibana manjadihon angka hilap gabe udan, jala diparuar alogo sian parpeopanna.

10:14 Na bodo do saluhut jolma, ndang marparbinotoan; tung tarurak do saluhut situang ganaganaan, ai sipaotooto do tuanganna jala ndang adong hosana di bagasan.

10:15 Alogo sambing nasida, jadijadian haliluon; jumpang tingki partubolon, siap ma nasida.

10:16 Alai ndang songon angka nasida ianggo ibana * partalian ni Jakkob, ai ibana do Sijadi sandok na adong, jala Israel do * marga ni partalianna. Jahowa Zebaot do goarna.

10:17 Papungu ma ugasanmu sian tano i, ho ale isi ni huta na gonting.

10:18 Ai songon on do hata ni Jahowa: Ida ma, ambolongkon ma angka isi ni tano i sahalion, jala targogot nasida bahenonku, asa didapot nasida rohanasida i.

10:19 Soro ni aringkon ala ni bugangkon! Hansitnai bugangkon! Jadi ningku na ma: Ingkon i na ma sahithu, * antong huta on na ma.

10:20 Nunga tarulang ia undungundungku, jala saluhut angka talina nunga matos; nunga ditadingkon angka anakku ahu, jala ndang adong be nasida. Ndang adong be na pahembang undungundungku, manang na pahire rimberimbengku.

10:21 Tung na oto do angka parmahan i, jala ndang dilului nasida ianggo Jahowa. Dibahen i ndang marhapistaran pambahennasida, jala sandok punguannasida marserak do.

10:22 Tarbege do sada soara barita, ida na ro ma hagunturon bolon sian tano na tungkan utara, laho mambahen angka huta ni Juda gabe halongonan, parmianan ni antuasu.

10:23 Nunga huboto, ale Jahowa, ndada guru di jolma dalanna, ndada guru di baoa pardalandalan, pahothon langkana.

10:24 Pinsang ahu, ale Jahowa, asal marpangondam, unang di bagasan rimasmu, asa unang tung siap ahu!

10:25 * Usehon ma murukmu tu bangso parbegu angka na so tumanda ho, dohot tu bangso angka na so manjou goarmu, ai nunga dipangan nasida Jakkob, jala disudahon ibana, jala tarulang ingananna dibahen nasida.

Jeremia 11

11:1 On do hata na ro tu si Jeremia sian Jahowa, songon on:

11:2 Tangihon ma angka hata ni padan on, jala hatahon tu halak Juda dohot tu isi ni Jerusalem.

11:3 Jala dok ma tu nasida: Songon on do hata ni Jahowa, Debata ni Israel: * Hona bura ma ganup na so tumangihon angka hata ni padan on.

11:4 Na hutonahon i tu ompumuna uju na hutogihon nasida ruar sian tano Misir, sian liang pamurunan bosi, gabe hudok: Tangihon hamu ma soarangki, jala patupa hamu hombar tu sandok na hutonahon i tu hamu asa gabe bangsongku hamu, jala ahu gabe Debatamuna.

11:5 Asa * hupahot uari na huuarihon tu ompumuna, mangalehon tu nasida * sada tano na binsat dibahen susu dohot situak ni loba, songon na masa di ari on. Jadi ningku ma mangalusi: Songon i ma, ale Jahowa!

11:6 Dung i ninna Jahowa ma mandok ahu: Tingtingkon ma saluhut hata i di angka huta ni Juda, dohot di angka alaman ni Jerusalem, songon on: Tangihon hamu ma angka hata ni padan on, jala ulahon hamu!

11:7 Ai huhatindangkon situtu tu ompumuna olat ni ari uju ahu manogihon nasida ruar sian tano Misir sahat ro di ari on, tibu hian huhatindangkon songon on: Sai tangihon hamu ma soarangku!

11:8 Alai ndang ditangihon nasida, jala ndang ditarehon pinggolna, ganup masitondong dalanna be di hatatangkang ni rohana na jahat i; jadi huparo ma tu nasida saluhut hata ni padan on na hutonahon i sibahenonnasida, hape ndang dibahen.

11:9 Dung i ninna Jahowa mandok ahu: Nunga masa parbulanan di angka baoa sian Juda dohot di angka isi ni Jerusalem.

11:10 Nunga marbalik nasida mulak tu hajahaton ni ompunasida parjolo i, angka na manjua tumangihon angka hatangki, jala diihuthon nasida do debata sileban angka na nioloannasida i. Nunga mangose pinompar ni Israel dohot pinompar ni Juda di padan na hupahot tu ompunasida.

11:11 Dibahen i songon on do hata ni Jahowa: Ida ma, paroonku ma tu nasida hamagoan, na so tarbahen nasida malua sian i; * joujou pe nasida tu ahu, ndang tangihononku nasida.

11:12 Dung i laho ma disi angka huta ni Juda dohot isi ni Jerusalem, jala joujou tu debata sileban, angka na nidaupaannasida, * hape ndang haurupansa nasida di tingki hamagoannasida i.

11:13 Ai manjujur bilangan ni angka hutam do torop ni angka debatam ale Juda, jala mangihuthon bilangan ni angka alaman ni Jerusalem do torop ni langgatan, angka na binahenmuna bahen haurahon, angka langgatan pardaupaan tu Baal.

11:14 Alai anggo ho, * unang tangiangkon bangso on, jala unang ulahon hoihoi manang tangiang mangondihon nasida; ai ndang tangihononku, molo joujou nasida tu ahu ala parsorionnasida i.

11:15 Tung aha do na niula ni hasianku di jorongku! Ai mangulahon hailaon do na torop i; tung juhut na badia i ma tagamon pasalpuhon sian ho hamagoanmi? Leak ma marolopolop ho!

11:16 Hau jetun na rata, na uli marparbue, jala marrupa, digoar Jahowa goarmu, alai mardongan soara ni ronggur na mallatas dipagalak api tusi, gabe gas angka dangkana.

11:17 Ai Jahowa Zebaot na manuan ho, nunga dilumbahon hian hamagoan tu ho ala ni hajahaton ni pinompar ni si Israel dohot pinompar ni si Juda, angka na binahennasida pahehe murukku, laho manutung daupa tu Baal.

11:18 Jadi nunga Tuhan Jahowa pabotohon i tu ahu, umbahen huboto; dipataridahon ho do uju i tu ahu pambahenannasida.

11:19 Alai anggo ahu tudoshon * birubiru, na tinogu tu pamotongan, jala ndang mamoto rohangku ahu do hape tinuntunnasida i mandok: Tole itaago ma hau i rap dohot parbuena, jala itasiaphon ibana sian tano ni angka na mangolu, asa unang be ditaringoti halak goarna.

11:20 Alai paruhum na tigor do anggo ho, ale Jahowa Zebaot, ho do * siuji piapia dohot roha. Sai na idaonku do * partubolanmu tu nasida, ai nunga tu ho hugiling parbadaanku.

11:21 Dibahen i songon on do hata ni Jahowa tu baoa angka na sian * Anatot, angka na mamburu hosam, angka ninna do: Unang be ho manurirangi marhitehite goar ni Jahowa, asa unang dibunu tangannami ho.

11:22 Dibahen i songon on do hata ni Jahowa Zebaot: Ida ma, marlulu ma ahu dompak nasida; ingkon mate ma angka dolidoli bunuon ni podang; mate anturaparon huhut anaknasida dohot borunasida.

11:23 Jala ndang adong teba di nasida, ai paroonku ma jea tu baoa angka sian Anatot, di taon partubolan dompak nasida.

Jeremia 12

12:1 Na tigor do anggo ho, ale Jahowa, tung sura naeng manarita ahu dompak ho; asal angka uhum naeng taringotanku tu ho: Boasa tung * mardohar dalan ni angka parjahat? Boasa tung marsonangsonang saluhut angka pangoseose?

12:2 Nunga disuan ho nasida, huhut marurat nasida; lam ganda nasida huhut marparbue. Talpe do ho di pamangannasida, alai holang do anggo sian bagasan rohanasida.

12:3 Alai di tanda ho do anggo ahu, ale Jahowa; bereng ahu jala uji rohangkon maradophon ho! Sai toltoli ma nasida songon birubiru tu pamotongan, jala parbadiai nasida tu ari pamunuan.

12:4 Sadia leleng on hasang tano i, jala malos suansuanan di sandok ladang? Binahen ni hajahaton ni pangisina, purpur do angka pinahan dohot * pidong, ai didok nasida do: Ndang tagamon idaonna pangapudiannami.

12:5 Molo mardalan ho rap dohot angka na mardalan pat, jala loja ho dibahen nasida, beha ma pambahenmu mangihuthon angka na marhoda? Marsonangsonang do ho di tano pardemahan, alai beha ma pambahenmu di habibinsat ni Jordan.

12:6 Ai dohot do angka hahaanggim ro di pinompar ni amam, nasida pe sai mangoseose dompak ho; nasida pe marsuraksurak do di pudim. Unang porsea roham mida nasida, nang pe na denggan di pandok tu ho.

12:7 Nunga hutadingkon jorongku, nunga hutulakkon partalianku; nunga hupasahat hasudungan ni rohangku tu tangan ni angka musuna.

12:8 Ia partalianku gabe tudoshon babiat di tombak maradophon ahu; patungoromon dompak ahu, ala ni do huhasomorhon nasida.

12:9 Tung gabe pidong siganding partalianku di ahu? Tung angka pidong mangkaliangi ibana? Antong laho ma hamu, papungu hamu ma saluhut binatang di ladang, olat hamu ma laho manohali.

12:10 Torop do angka parmahan mangago porlak anggurhu, diluntakluntak nasida do partalianku, gabe halongonan do partalian hasudungan ni rohangku dibahen.

12:11 Gabe halongonan tutu dibahen nasida, hasang do songon halongonan maradophon ahu. Tung saluhut tano i tarulang, ai ndang adong manang ise na marateatehonsa.

12:12 Tu saluhut dolokdolok, angka na di halongonan nunga sahat angka pangago, ai podang ni Jahowa manganhon saluhutna sian ujung ni tano i na sada, sahat ro di ujungna na sadanari, ndang jumpangan hasonangan nanggo sahalak.

12:13 Nunga nian disabur nasida eme, hape duri gotilonna; marngalutan nasida, hape ndang marlaba; tung tarurak do hamu marhite sian na niulamuna, binahen ni parpiar ni rimas ni Jahowa.

12:14 Songon on ma hata ni Jahowa tu saluhut hombar balok, angka na jahat i, angka na mangago partalian, na huturpukhon tu bangsongku Israel: Ida ma, sintahonku ma nasida sian tanonasida i, jala bagas ni Juda sintahonku sian tongatonganasida i.

12:15 Jadi ia dung husintak nasida, mulak ma ahu asa marpangulahi rohangku tu nasida, jala togihononku ma nasida mulak ganup tu partalianna jala ganup tu tanona.

12:16 Jadi ia dung diguruhon nasida angka dalan ni bangsongku, jala * marmangmang tu goarhu: Songon tutuna mangolu Jahowa, ia songon i diajari nasida bangsongku marmangmang tu Baal, suang songon i hona pauli nasida di tongatonga ni bangsongku.

12:17 Alai molo so ditangihon nasida, siaphononku ma bangso sisongon i, jala agoonku, ninna Jahowa.

Jeremia 13

13:1 Songon on do hata ni Jahowa tu ahu: Laho ma ho, jala tuhor di ho sada hohos sian hori, jala hohoshon tu gantingmu, alai unang hona aek bahen.

13:2 Dung i hutuhor ma sada hohos, hombar tu hata ni Jahowa, jala hubahen tu gontingku.

13:3 Dung i ro ma hata ni Jahowa tu ahu paduahalihon, songon on:

13:4 Buat ma hohos na tinuhormi, na di gantingmi, jala borhat ma ho laho tu batang aek Euprat, jala tabunihon hohos i disi, di bagasan ronggang ni dolok batu.

13:5 Dung i laho ma ahu, jala hutabunihon hohos i di topi ni Euprat, hombar tu na nidokkon ni Jahowa tu ahu.

13:6 Dung i di laonlaon ni ari, ninna Jahowa ma tu ahu: Borhat ma ho, laho tu Euprat, jala alap sian i hohos i, na hudokkon i tu ho tabunihononmu disi.

13:7 Dung i laho ma ahu tu Euprat, gabe huhali, jala hubuat hohos i sian inganan parsitabunianna i disi. Hape ida ma, nunga metep hohos i, ndang be hasea tu manang aha.

13:8 Dung i ro muse hata ni Jahowa tu ahu ninna ma:

13:9 Songon on do hata ni Jahowa: Laos songon i do agoonku hamuliaon ni Juda dohot hamuliaon ni Jerusalem na balga i.

13:10 Tung bangso na jahat do i, angka na manjua tumangihon hatangku, tung * hatangkangon ni rohanasida sandiri do di paihutihut, jala angka debata sileban diihuthon nasida, mangoloi jala marsomba tusi, ingkon tudoshon hohos on na so marguna i be nasida sogot.

13:11 Ai songon hohos i na lilit tu ganting ni baoa, songon i do hulilithon tu ahu sandok pinompar ni si Israel dohot sandok pinompar ni si Juda, ninna Jahowa, asa gabe bangsongku nasida bahen baritangku, pujipujianku dohot hamuliaonku, hape ndang ditangihon nasida.

13:12 Jadi dohononmu ma tu nasida: Songon on do hata ni Jahowa, Debata ni Israel: Nasa guriguri gok anggur sogot. Jadi dohononnasida ma tu ho: Tung so botoonnami ma, gok anggur sogot nasa guriguri?

13:13 Jadi dohononmu ma tu nasida: Songon on do hata ni Jahowa: Ida ma, * gok hamabukon bahenonku saluhut isi ni tano on, ro di raja angka na marhabangsa di habangsa ni si Daud, ro di angka malim, angka panurirang dohot saluhut isi ni Jerusalem.

13:14 Jala masitanggoan nasida bahenonku, angka amaama dohot anakna, ninna Jahowa. Ndang olanangku, ndang marhabot ni roha ahu, manang marpangulahi rohangku, ingkon mago nasida bahenonku.

13:15 Tangihon hamu, jala tarehon hamu pinggolmuna! Unang ginjang rohamu! Ai Jahowa do mangkuling.

13:16 Lehon hamu ma di Jahowa, Debatamuna i hamuliaon, tagan so dijadihon dope haholomon, tagan so tartuktuk dope patmuna tu angka dolok hagolapon, paimaimahon hatiuron hamu, hape linggoman ni hamatean dijadihon ibana, dohot hagolapon marimpotimpot.

13:17 Alai molo so ditangihon hamu, tumatangis ma rohangku di sihabunian ala ni haginjangon ni rohamu, jala mariluilu matangku, pola * mabakbak iluilu i, ala tarbuang punguan ni Jahowa.

13:18 Dok ma tu rajai dohot tu rajai boruboru: Patoruk hamu ma parhundulmu, ai nunga * madabu tumpal ni hamuliaonmuna sian ulumuna.

13:19 Angka huta tungkan dangsina nunga tarhinsu, jala ndang adong na mangungkap; nunga tarbuang sandok Juda, tung tarbuang situtu do.

13:20 Manaili ma matamuna, jala ida hamu angka na ro sian utara! Didia do punguan birubiru naung pinalumehon tu ho, angka birubiru hamuliaonmu?

13:21 Tung aha ma dohononmu, molo dipabangkit ibana gumomgom ho, angka naung pinarpedanpedanmu hian, bahen indukmu? Tung so marrian situtu ma ho, songon boruboru na naeng mangintubu?

13:22 Jala molo dohononmu di bagasan roham: * Boasa tung dumatang angka sisongon i tu ahu? Binahen ni hinadeak ni hajahatonmu do tarsintak * rambu ni ulosmu hona pangarupaon tambihulmu.

13:23 Tung tarpaimbar halak Kus ma sisikna, manang tung tarpauba babiat tulisna? Tung * tarbahen hamu ma huhut mambahen na denggan, hamu angka na somal manjahati?

13:24 Dibahen i panserakhononku ma nasida, songon hurangkam na pinurpurhon ni alogo sian halongonan.

13:25 On do partalianmu, bagianmu na husuhathon di ho, ninna Jahowa ala naung di halupahon roham Ahu, jala marhaposan ho tu sipaotooto.

13:26 Ahu pe antong, nunga husintak rambu ni ulosmu sahat tu bohim, asa tarida hailaonmu.

13:27 Angka pangalangkuponmu dohot pariheiheonmu, hajahaton ni harorangonmu di atas ni angka dolokdolok, di ladang pe huida do hasogiron angka na niulam! Jeami, ale Jerusalem, ndang tagamon pita ho huroha? Sadia laon nari dope songon i!

Jeremia 14

14:1 On do hata ni Jahowa na ro tu si Jeremia taringot tu logo ni ari.

14:2 Marsak do ia Juda, angka harbanganna pe jomba do margudompong tu tano, maungaung tu ginjang do angguhangguk ni Jerusalem.

14:3 Disuru angka na sangap sian nasida angka situan na torop mangalului aek. Tolhas nasida tu angka sumur, ndang adong jumpangsa aek disi, mulak boti nasida, ndang marisi hudonna, maila nasida jala tarurak, pola dihungkupi ulu nasida.

14:4 Ala angka rigat tanona, ai ndang adong ro udan tu tano i, murak do angka parumauma, pola di hungkupi do ulu nasida.

14:5 Ai ursa tini pe di ladang, naung maranak poso, gabe ditadingkon do i, ala so adong duhut na martumbur.

14:6 Halode harangan pe angka na jongjong di atas ni robean na palpal, marhosahosa songon naga, homur do mata nasida, ala so adong duhut na martumbur.

14:7 Molo hajahatonnami manindangi dompak hami, ale Jahowa bahen ma hombar tu goarmu, ai torop do panundalionnami, dompak ho do hami mardosa.

14:8 Ho ale haposan ni Israel sipalua ibana di tingki hagogotan, boasa tung gabe doshon halak na buro ho di tano on, jala songon halak pardalandalan, na mambahen undungundung parmalaman.

14:9 Boasa tung ho gabe doshon halak na tarhatotong, songon ulubalang na so margogo mangurupi? Alai di tongatonganami do ho ale Jahowa, jala * targoar tu goarmu do hami; dibahen i unang tung tadingkon hami!

14:10 Songon on do hata ni Jahowa tu bangso on: Madoado boti do di haholongi rohanasida, ndang diontohi ia patnasida i; alai ndang lomo roha ni Jahowa mida nasida ingotonna ma nuaeng hajahaton nasida, jala luluhononna angka dosanasida i.

14:11 Dung i ninna Jahowa ma tu ahu: * Unang be ondihon bangso on tu na denggan!

14:12 Molo marpuasa nasida, ndang tangihononku angguhangguknasida, jala nang pe di pelehon nasida pelean situtungon dohot sipanganon, ndang lomo rohangku di nasida; ingkon ripashononku nasida marhitehite podang, haraparon dohot begu antuk.

14:13 Dung i ningku ma mangalusi: Iale Tuhan Jahowa! Ida ma, angka panurirang i mandok tu nasida: Ndang tagamon idaonmuna podang, jala tagamon haraparon hamu, ai hasonangan manongtong lehononku tu hamu di inganan on.

14:14 Dung i ninna Jahowa ma tu ahu: Sipaotooto do * di surirangkon angka panurirang i marhitehite goarhu, ndada ahu marsuru nasida, ndada ahu martona tu nasida, ndada ahu mandok tu nasida; alatan sipaotooto dohot pangarundingon dohot na so marguna dohot sipaotooto di rohanasida sandiri di surirangkon nasida tu hamu.

14:15 Dibahen i songon on do hata ni Jahowa dompak panurirang, angka na manurirangi * marhitehite goarhu, atik pe so ahu marsuru nasida, angka na mandok: Ndang tagamon masa podang manang haraparon di bagasan luaton! Ingkon marhitehite podang dohot haraparon rendep angka panurirang i.

14:16 Alai anggo bangso na sinurirangannasida i, ingkon mampar marambolongan do di angka alaman ni Jerusalem, binahen ni haraparon dohot podang, jala ndang adong * na mananom nasida, tole nasida, tole jolmanasida, tole anaknasida dohot borunasida; usehononku ma tu nasida hajahatonnasida i.

14:17 Dibahen i dohononmu ma tu nasida hata on: Ingkon * dumarede iluilu ni matangku borngin dohot arian, ndang marpansadian, ai pasang do bugang ni boru ni bangsongku, tung na bernit situtu do bugangna i diae.

14:18 Molo ruar ahu tu ladang, ida ma, angka na rage binahen ni podang; molo mulak ahu tu huta, ida ma, angka na marranggangan binahen ni haleon; ai tole panurirang, tole malim mardalani tu tano na so tinandana.

14:19 Beha, nunga tung diambolongkon ho situtu Juda? Manang naung gialan roham di Sion? Boasa tung songon i hami pungkulonmu, gabe so adong be di hami hahisaron? Sai * maimaima hami di hatuaon, hape ndang adong na denggan, sai maimaima hami di tingki hamalumon, hape ida ma, holan hasonggotan do.

14:20 Nunga hutanda hami, ale Jahowa, hajahatonnami, hasalaan ni ompunami, ai dompak ho do hami mardosa.

14:21 Unang tung ambolongkon hami ala ni goarmu; unang tung paurak habangsa ni hamuliaonmu; sai paingotingot, unang tung muba padan na binahenmu tu hami.

14:22 Tung adong ma di tongatonga ni debata ni parbegu angka na so hasea tarbahen paro udan? Manang tung tarbahen langit i mangalehon udan sian dirina? Nda ho do, ale Jahowa Debatanami dohot haposan ni rohanami, ai ho do jumadihon saluhutna i.

Jeremia 15

15:1 Dung i ninna Jahowa ma tu ahu: Tung sura pe jongjong si * Musa dohot si Samuel di jolongku, laos so tagamon marpangulahi rohangku tu bangso on; usir ma nasida sian jolo ni bohingku, paruar ma nasida!

15:2 Jadi molo didok nasida tu ho: Tung tudia ma hami laho? Dohononmu ma tu nasida: Songon on do hata ni Jahowa: * Manang ise na tu hamatean, tu hamatean ma tutu, manang ise na tu podang, tu podang ma tutu, jala manang ise na tu haraparon, tu haraparon ma tutu, jala manang ise na tu habuangan, tu habuangan ma tutu.

15:3 Ai pasonggoponku ma tu nasida * opat mansam torutoru, ninna Jahowa: Podang laho mambunu nasida dohot angka biang laho mangkaharati, dohot angka * pidong martongatonga langit dohot angka binatang di tano i, laho manganhon dohot mangago nasida.

15:4 Jadi bahenonku ma nasida gabe hasonggoton di saluhut harajaon angka na di tano on, * ala ni si Manasse, anak ni si Hiskia, raja di Juda, ala ni naung binahenna di Jerusalem.

15:5 Ai tung ise ma marpangulahi rohana mida ho, ale Jerusalem? Jala tung ise ma marasi ni roha mida ho? Jala tung ise ma manirpang mangidohon hadameon di ho?

15:6 Nunga ditadingkon ho ahu, ninna Jahowa, nunga manginsurut tu pudi ho. Dibahen i patoltolonku ma tanganku dompak ho laho mangago ho, nunga mandate ahu sumolsoli rohangku.

15:7 Jadi * piaranku ma nasida di anduri di angka harbangan ni tano i; bahenonku ma punu bangsongku, jala agoonku, ala so mulak nasida sian dalannasida i.

15:8 Tung dumeak do angka na mabalu di nasida bahenonku sian horsik ni laut; paroonku ma tu nasida, tu ina ni na pinillit sada pangago di hos ni ari; dabuhononku tu ibana hagogotan dohot hasonggoton so pangkirimanna.

15:9 Mandate ma parompuan naung maranak pitu, tos ma hosana; nunga sundut * mata ni arina tagan arian dope; nunga tung maila ibana jala tarurak. Ianggo angka na teba sian nasida pasahatonku ma tu podang di jolo ni musunasida, ninna Jahowa.

15:10 Oe * ale dainang on! Tung ditubuhon ho ahu, baoa sibadaan dohot baoa sironuan di sandok tano i; so manang mangurang ahu manang paurangkonsa, hape luhut nasida mamburai ahu.

15:11 Hata ni Jahowa: Tongon do, sai na paluaonku do ho asa sonang; tongon do, sai na marhuraja tu ho do musu i di tingki pardangolan dohot di tingki hagogotan.

15:12 Tung adong ma dapot bosi na mamonggolhon bosi na sian utara, manang haksa?

15:13 Lehononku ma ugasanmu dohot artam gabe tabantaban, ndang marali, ala ni saluhut dosam do i di saluhut parbalohanmu.

15:14 Jala patariparonku ma ho rap dohot musum tu tano na so tinandam, ai nunga nahit sada api di bagasan rimashu, marnalanala do i di atas hamu.

15:15 Diboto ho do i, ale Jahowa, antong sai ingot ahu, sai luluhon ma ahu, jala tubolhon ahu tu angka na mangalele ahu; unang butbut ahu hombar tu lambas ni roham; sai parateatehon ma, ala ho do ahu manaon insahinsak.

15:16 Dung jumpang ahu * hatamu, gabe husohali do i, jala hatamu do lomo dohot las ni rohangku ala naung targoar ahu tu goarmu, ale Jahowa Debata Zebaot!

15:17 * Ndang dung hundulhundul ahu di parpunguan ni halak pangarehe, asa mariaia ahu. Punjung do ahu hundul maradophon tanganmu, ai gok piripiri do rohangku dibahen ho.

15:18 Boasa tung tongtong parniahapanku, jala tung targisik * bugangku, so hataoaran, tung gabe songon sunge sipaotooto ma ho di ahu, songon aek na so sintong?

15:19 Dibahen i songon on do hata ni Jahowa: Molo mulak ho tu ahu, mulak ma ahu tu ho, jongjong ho muse di jolongku marhalado, jala molo dipapulik ho na arga sian na roa, jadi hira ho pamangan di ahu. Ingkon mulak nasida tu ho, sitongka do ianggo tung ho mulak tu nasida.

15:20 Dung i * lehononku ma ho di bangso on gabe parik haksa na togu, nang pe marmusu nasida dompak ho, laos so tartaluhon nasida ho, ai donganmu do ahu laho paluahon ho dohot mangaramoti, ninna Jahowa.

15:21 Jala paluaonku do ho sian tangan ni parjahat, jala paluaonku ho sian tangan ni pangarupa.

Jeremia 16

16:1 Dung i ro ma hata ni Jahowa tu ahu songon on:

16:2 Ndang jadi ho mambuat boru bahen jolmam, jala ndang jadi adong anakmu, manang borum di inganan on.

16:3 Ai songon on do hata ni Jahowa taringot tu angka anak dohot taringot tu boru, angka na tubu di inganan on, nang taringot tu inanasida, angka na tumubuhon nasida dohot taringot tu amanasida, angka na tumubuhon nasida di tano on.

16:4 Ingkon mate marsingkor nasida, ndang jadi andungan manang tanomon nasida, ingkon gabe napa nasida di sisik ni tano i, ingkon marragean nasida marhitehite podang dohot haraparon, jala bangkenasida gabe sipanganon di pidong, angka na martongatonga langit dohot di binatang na di tano i.

16:5 Ai songon on do hata ni Jahowa: Ndang jadi bongotanmu bagas parondasan, jala ndang jadi ho laho mananangisi, manang mangkabothon nasida, ai nunga huunsat damengku sian bangso on, ninna Jahowa ro di denggan basa dohot angka asi ni roha.

16:6 Ingkon mate nang angka na magodang, nang angka na metmet di tano on, ndang sitanomon nasida, jala ndang siandungan, jala ndang rarihon manang nabungon ni manang ise uluna ala nasida.

16:7 Jala ndang ponggolanna sagusagu di nasida mangapuli na matean i nian di habot ni rohana; jala ndang lehononna tu nasida panginuman pangapulon taringot tu amana dohot taringot tu inana.

16:8 Jala ndang jadi bongotanmu bagas partamueon hundul rap dohot nasida laho mangan minum.

16:9 Ai songon on do hata ni Jahowa Zebaot, Debata ni Israel: Ida ma, * pasohotonku ma sian inganan on di jolo ni matamuna dohot di angka arimuna suara olopolop dohot soara hariburon, soara ni pangoli dohot soara ni oroan.

16:10 Jadi ia dung dipatolhas ho tu bangso on saluhut angka hata i, dohononnasida ma tu ho: Ala ni aha umbahen dilumbahon Jahowa saluhut jea na godang i tu hami? Aha do salanami, jala aha do dosanami, angka naung hubahen hami dompak Jahowa Debatanami?

16:11 Jadi dohononmu ma tu nasida: Dibahen naung tinadingkon ni ompumuna ahu, ninna Jahowa, jala diihuthon nasida angka debata sileban, angka na nioloannasida, jala marsomba tusi, alai anggo ahu ditadingkon nasida do, jala ndang diradoti patikku.

16:12 Gumodang dope tahe na jat dibahen hamu sian ompumuna, ai ganup sian hamu manondong dalanna be, hombar tu tangkang ni rohana na jati, ndang ditangihon anggo ahu.

16:13 Dibahen i ambolongkon ma hamu sian tano on tu tano na so tinandamuna, nang hamu, nang ompumuna, jadi disi ma ingkon oloanmuna angka debata sileban arian dohot borngin, ai ndang olo be ahu mangalehon asiasi tu hamu.

16:14 Dibahen i ida ma, na ro do angka ari sogot, ninna Jahowa, ndang be dohonon ni halak: Songon tutuna mangolu Jahowa na manogihon halak Israel ruar sian tano Misir!

16:15 Alai tahe: Songon tutu mangolu Jahowa, na manogihon halak Israel ruar sian tano na tungkan utara dohot sian saluhut tano haambolongannasida i! Ai boanonku do nasida mulak tu tanonasida naung hulehon hian tu ompunasida i.

16:16 Ida ma, suruonku ma torop angka panjala, ninna Jahowa, angka na manjala nasida. Dung i suruhononku ma torop parburu, angka na mamburu nasida sian saluhut dolok dohot sian saluhut robean dohot sian saluhut barungbung ni angka dolok batu.

16:17 Ai diranapi matangku do saluhut dalannasida, ndang holip nasida sian jolongku, jala ndang buni hajahatonnasida sian jolo ni matangku.

16:18 Alai jolo balosonku do silompit dua hajahatonnasida dohot dosanasida, ala na niramunan nasida tanongku marhitehite bangke ni hasogiron nasida, jala digohi partalianku dohot hagatalon ni rohanasida.

16:19 Ale Jahowa, ho do hagogoonku dohot partanobatoanku dohot haporusanku di ari hagogotan! Ingkon ro tu ho do sogot angka parbegu sian angka ujung ni tano on, jala dohononnasida do: Sipaotooto sambing do hape na hinasomalhon ni angka ompunami, alogo sambing do tahe angka na so margogo mangurupi.

16:20 Tung tarbahen jolma ma mambahen angka debata di ibana? So manang tutu angka debata nasida!

16:21 Dibahen i ida ma, pabotohononku ma sahalion tu nasida, pabotohononku ma tu nasida tanganku dohot hagogoonku, asa tung diboto nasida Jahowa do goarhu.

Jeremia 17

17:1 Ia dosa ni Juda nunga tarsurat marpanurat bosi, marujung mata intan taruhir tu batu panuratan ni rohanasida dohot tu saluhut tanduk ni langgatannasida.

17:2 Songon parningot ni angka anaknasida di angka langgatanna dohot di angka sombaonnasida, di toru ni hau na rata, di punsu ni dolok angka na timbo.

17:3 Ia dolokku rap dohot tanona, sinamotmu ro di saluhut artamu lehononku ma i gabe tabantaban, nang angka panggungmu ala ni dosa angka na masa di saluhut parbalohanmu.

17:4 Jadi pabalionna ma ho sian partalianmu na hulehon tu ho, bahenonku ma ho gabe hatoban ni musum di tano na so tinandam, ai nunga * dipagalak hamu sada api di bagasan murukku, marnalanala ma i ro di saleleng ni lelengna.

17:5 Songon on do hata ni Jahowa: Marjea ma baoa na marhaposan tu jolma, manang tu bolon ni botohonna, gabe dipasurut rohana sian Jahowa.

17:6 Songon halak * parbahudung di tano na mahiang do ibana, ndang tagamon idaonna ro na denggan i, jala maringan ibana di * tano bangkalbangkal di halongonan, di tano na ansim na so hinundulan ni halak.

17:7 Alai martua ma baoa na marhaposan tu Jahowa, jala Jahowa haporusanna dibahen.

17:8 Tudos do ibana tu hau na sinuan di topi ni batang aek, jala manjarar uratna di lambung batang aek, jala ndang mabiar ibana molo ro hamohopon, jala tongtong rata bulungna, jala ndang holsoan ibana di taon haraharon, jala ndang mansohot marparbue.

17:9 Tung na angkal situtu do roha ni jolma, jala na ganggu, tung ise ma na tuk mandodoisa?

17:10 Ahu Jahowa do * Sidodo roha, siuji piapia jala * mangalehon tu ganup jolma hombar tu dalanna, hombar tu parbue ni pambahenanna.

17:11 Songon manuk harangan na mamodomhon pira angka na so pinirahonna, songon i do halak na papunguhon arta sian dalan na so turut. Di parsitongaan ni angka arina, tadingkononna ma i jala di ujungna gabe halak na oto ibana.

17:12 Oe habangsa ni hamuliaon, hatimboon sian mulamula, hajongjongan ni habadiaonnami!

17:13 Ale Jahowa, ho do pangkirimon ni Israel! Saluhut angka na tumadingkon ho gabe tarurak; angka na marbalik sian ahu, ingkon tarsurat goarna tu tano, ala * tinadingkonnasida mual ni aek hangoluan, i ma Jahowa.

17:14 Sai ho ma pamalum ahu, ale Jahowa, asa tung malum huhilala; sai ho ma mangurupi ahu, asa tung dapotan pangurupion ahu, ai ho do pujipujionku.

17:15 Ida ma, angka nasida mandok tu ahu: Didia do hata ni Jahowa i? Uaro ma nian nuaeng!

17:16 Alai anggo ahu, ndang husonsonhon gabe parmahan ahu mangihuthon ho, jala ndang huhalomohon ari na marjea i, ho do umbotosa; hata na ruar sian bibirhu pe patar do i di jolo ni bohim.

17:17 Unang tung gabe hasonggoton ho di ahu, ho do haporusanku di ari hasusaan.

17:18 Ingkon tarurak nian angka na mangalele ahu, alai unang tarurak anggo ahu; ingkon tarsonggot nasida, alai unang tarsonggot anggu ahu, paro ma tu atasnasida ari hinamago, jala silompit dua hapipidomnasida i.

17:19 Songon on do hata ni Jahowa tu ahu: Laho ma ho, tindang ma ho di bagasan bahal ni angka anak ni bangso i, marmeang muli sian i angka raja ni Juda, tongon tahe di bagasan saluhut angka bahal ni Jerusalem.

17:20 Dung i dohononmu ma tu nasida: Tangihon ma hata ni Jahowa, hamu angka raja ni Juda, dohot sandok Juda ro di sude isi ni Jerusalem, angka na masuk sian angka bahal on.

17:21 Songon on do hata ni Jahowa: Sai jamoti hamu ma tondimuna i, unang usung hamu siusungon di ari Sabbat, jala unang boan hamu sian angka bahal ni Jerusalem.

17:22 Jala unang paruar hamu siusungon sian bagasmuna di * ari Sabbat, jala unang bahen nanggo sada ulaon, sai parbadiai hamu ma ari Sabbat i, songon na hutonahon tu ompumuna.

17:23 Alai ndang ditangihon nasida jala ndang dipaeleng pinggolna, lam dipajogal tahe tangkuhukna, unang marbinege, jala ndang dijalo pangajaran.

17:24 Alai molo tung ditangihon hamu ahu, unang mamboan siusungon sian bahal ni huta on di ari Sabbat laho pabadiahon ari Sabbat i, unang dibahen hamu disi manang aha ulaon.

17:25 Jadi bongot ma sian angka bahal ni huta on angka raja dohot angka induk, angka na hundul di habangsa ni si Daud, marsihundul di hureta dohot di hoda do nasida, dohot induknasida i, angka halak Juda dohot isi ni Jerusalem, jala ingananna huta on ro di saleleng ni lelengna.

17:26 Ro do huhut sian angka huta ni Juda dohot sian humaliang Jerusalem dohot sian tano Benjamin dohot sian tano adaran dohot sian dolok dohot sian dangsina angka na mamboan pelean situtungon dohot sipotongon dohot sipanganon dohot daupa dohot pujipujian tu bagasan joro ni Jahowa.

17:27 Alai molo so ditangihon hamu ahu laho pabadiahon ari Sabbat i taringot tu na mangusung siusungon dohot masuk sian angka bahal ni Jerusalem di ari Sabbat, pagalahonku ma sada api di bahalmuna gabe suda panganonna angka bagas bolon ni Jerusalem, jala ndang haintopan.

Jeremia 18

18:1 On do hata naung ro tu si Jeremia sian Jahowa, songon on:

18:2 Hehe ma ho jala tuat tu bagas ni sitopa hudon, disi ma patubegehononku tu ho.

18:3 Dung i tuat ma ahu tu bagas ni sitopa hudon i, jadi ida ma, tongon ibana mambahen sada ulaon di atas pamutoran.

18:4 Hape ndang manjadi hudon na pinaulina i, songon sangkimpal tano di bagasan tangan ni sitopa hudon i; gabe mangulahi ibana paulihon sada inganan na asing, guru lomo ni roha ni sitopa hudon i mambahensa.

18:5 Dung i ro ma hata ni Jahowa tu ahu songon on:

18:6 Tung na so tarbahen ahu huroha, songon sitopa hudon on mambahen tu hamu, ale pinompar ni Israel? ninna Jahowa. Ida ma, songon tano hudon di bagasan tangan ni sitopa hudon, songon i do hamu di bagasan tanganku ale pinompar ni Israel.

18:7 Satongkin ahu martahi dompak sada bangso dohot dompak, sada harajaon naeng mangurati dohot naeng mamansingkon dohot naeng mangago.

18:8 Alai molo mulak bangso naung hupalumba i sian hajahatonna, gabe marpangulahi rohangku taringot tu hamagoan naung husangkapi naeng bahenonku tu ibana.

18:9 Jala satongkinnari ahu martahi taringot tu sada bangso dohot taringot tu sada harajaon naeng paulihon dohot pahothon.

18:10 Alai molo dibahen na jat di jolo ni matangku, gabe ndang ditangihon soarangku, jadi solsolanku ma rohangku taringot tu na denggan i, naung hubagabagahon naeng bahenonku tu ibana.

18:11 On pe, ua dok ma tu halak Juda dohot tu isi ni Jerusalem: Songon on do hata ni Jahowa: Ida ma, ahu jumadihon hinamago tu hamu jala sumangkap tahi dompak hamu; ua * mulak ma hamu ganup sian dalanna na roa i, jala padenggan hamu dalanmuna dohot pambahenanmuna.

18:12 Alai dohononnasida ma: Pinabotoboto i! * Ai mangihuthon sangkap ni rohanami sandiri hami naeng, jala ganup hami naeng mambahen * hajungkaton ni rohana be na jahat i.

18:13 Dibahen i songon on do hata ni Jahowa: Ua usouso ma hamu di tongatonga ni angka parbegu, tung ise ma umbege sisongon i? Tung na sogir situtu do na niula ni boru Israel.

18:14 Tung tagamon ma mansohot ambolas ni Libanon mabaor sian dolok batu tu adaran? Manang tagamon marsik ma aek angka na bolon, angka na manorus angka na mabaor?

18:15 Alai tahe anggo bangsongku tung di halupahon do ahu, tung dalannasida, dalan angka sian na robi, gabe mardalan nasida di angka dalan na so pinauli.

18:16 Laho mambahen tanonasida gabe halongonan, gabe sireherehean saleleng ni lelengna, tung ganup na mamolus sian i tarhalomong do jala mangupirupir uluna marnidasa.

18:17 Marhite sian alogo sian purba panserakhononku nasida maradophon musu, * tangkuhuk tahe, ndada bohi paidahononku tu nasida di ari hamagoannasida i.

18:18 Dung i ninna nasida ma: Beta hita martuptup dompak si Jeremia, ai ndang mago patik i sian malim, manang panuturion sian na bisuk, manang hata sian panurirang. Beta hita tabunu ibana marhitehite dila, asa unang be ingkon patangitangion luhut angka hatana.

18:19 Ale Jahowa, sai tiroi ahu, jala tangihon soara ni angka na mambadai ahu.

18:20 Tung tama ma na jat bahenon balos ni na denggan umbahen * dihali nasida sada godung di tondingku? Sai ingot manang songon dia ahu jongjong di jolomi laho mangkatahon tu nasida na denggan, manampar rimasmu nian sian nasida.

18:21 Dibahen i sai pasahat ma anaknasida tu haraparon jala ragehon nasida marhite sian podang! Sai punu ma jolmanasida jala angka mabalu, jala baoa nasida marmatean dibahen begu antuk, ia dolidolinasida marragean dibahen podang di hamusuon.

18:22 Sai tarbege ma angguhangguk sian bagasnasida, molo diparo ho dompak nasida parangan marhoronhoron so pangkirimanna, ala naung dihali nasida sada godung laho manangkup ahu, jala marsibuni ditaon nasida angka jorgong di pathu.

18:23 Alai anggo ho ale Jahowa, diboto ho do saluhut tahinasida naeng mambunu ahu; sai unang ma marpangulahi roham taringot tu hajahatonnasida, sai * unang ma sesa dosanasida sian jolo ni bohim, asa tung martimpalan nasida di jolom. Bahen ma songon i tu nasida di tingki hamamasa ni rimasmu.

Jeremia 19

19:1 Songon on ma muse hata ni Jahowa: Laho ma ho jala tuhor sada guriguri tano sian sitopa hudon, boan ma i rap dohot angka sintua ni bangso i dohot sintua ni angka malim.

19:2 Dung i ruar ma ho tu * rura ni angka anak ni si Hinnom na di lambung ni pintu harbangan ni sitopa hudon, jala tingtingkon ma disi hata angka sipaboaonku tu ho.

19:3 Jala dohononmu ma: Tangihon ma hata ni Jahowa, hamu ale angka raja ni Juda dohot isi ni Jerusalem! Songon on do hata ni Jahowa Zebaot, Debata ni Israel: Ida ma ahu parohon * sada hamagoan tu inganan on, ganup na umbegesa marnginging pinggolna hilalaonna.

19:4 Ala na tinadingkonnasida ahu, jala ditoisi nasida inganan on, jala manutung daupa nasida disi tu angka debata sileban angka na so tinandanasida manang ompunasida manang angka raja ni Juda pe, jala digohi nasida inganan on dohot mudar ni angka na so marpipot.

19:5 Jala dipauli nasida angka panggungpanggung ni Baal laho manutung * anaknasida di bagasan api bahen pelean situtungon tu Baal, na so hutonahon manang hudokkon, manang dung tubu pe di bagasan rohangku.

19:6 Dibahen i, ida ma, na ro do angka ari sogot, ninna Jahowa, ndang be targoar Topet manang rura ni angka anak ni si Hinnom inganan on, ingkon rura pamunumunuan na ma.

19:7 Ai sundat bahenonku di inganan on sangkap ni Juda dohot Jerusalem, asa marragean nasida binahen ni podang maradophon musunasida dohot binahen ni tangan ni angka na tumahi hosanasida, jala lehononku ma * bangkenasida bahen sipanganon ni pidong angka na di toru ni langit dohot binatang di tano on.

19:8 Jala bahenonku do huta on, gabe halongonan dohot sirehereheon; * ganup na mamolus sian i muningan do jala mangarehe taringot tu saluhut jea angka na mangonai tusi.

19:9 * Papanganhononku ma tu nasida sibuk ni anaknasida dohot sibuk ni borunasida, jala ganup nasida manganhon sibuk ni donganna, binahen ni hagogotan, dohot hasosahan, na pinasosaksosak ni musu i nasida i, angka na tumahi hosanasida i.

19:10 Dung i ingkon bolahononmu ma guriguri i di adopan ni baoa angka na mardalan rap dohot ho.

19:11 Jala dohononmu ma tu nasida: Songon on do hata ni Jahowa Zebaot: Suang le songon i ponggolhononku bangso on dohot huta on, * songon na binolahon hudon ni sitopa hudon, na so tarpaulisa be, jala di * Topet nasida tartanom, ala soada inganan bahen tanoman.

19:12 Laos songon i bahenonku tu inganan on, ninna Jahowa, dohot tu pangisina i, bahenonku do huta on songon Topet.

19:13 Ia angka * bagas ni Jerusalem dohot angka bagas ni raja ni Juda, ingkon gabe ramun songon inganan ni Topet, saluhut angka bagas panutungan daupa di atas ni * tarupna tu saluhut parangan di langit, jala diusehon pelean siinumon tu angka debata sileban.

19:14 Dung i mulak ma si Jeremia sian Topet, tinopotna i sinuru ni Jahowa manurirangi disi, jadi jongjong ma ibana di alaman ni bagas ni Jahowa, jala didok ma tu sandok bangso i.

19:15 Songon on do hata ni Jahowa Zebaot, Debata ni Israel: Ida ma, ahu parohon tu huta on dohot tu saluhut huta humaliang luhut jea naung hulumbahon tusi; ai dipajogal nasida do tangkuhuknasida, ndang ditangihon anggo angka hatangku.

Jeremia 20

20:1 Jadi dung dibege malim Pashur, anak ni si Immer, jala sintua ni induk do ibana di bagasan joro ni Jahowa, angka hata panurirangon ni si Jeremia.

20:2 Jadi dipungkul si Pashur ma panurirang Jeremia jala dibahen ibana tu hurungan na di harbangan Benjamin parjulu i, di bagasan bagas ni Jahowa.

20:3 Dung i marsogotna i diparuar si Pashur ma muse si Jeremia sian hurungan i. Jadi didok si Jeremia ma tu ibana: Ndang be si Pashur goarmu digoar Jahowa, ingkon biar humaliang nama.

20:4 Ai songon on do hata ni Jahowa: Ida ma, ahu mangalehon ho, gabe biar di ho dohot di sude angka na mangkaholongi ho, gabe marragean nasida binahen ni podang ni musunasida, jala matami marnidasa. Pasahatonku ma huhut sandok Juda tu tangan ni raja ni Babel, asa ibana mambuangkon nasida tu Babel, jala mambunu nasida marhitehite podang.

20:5 Jala pasahatonku huhut saluhut sinamot ni huta on ro di saluhut na niomoomona dohot * barang angka na arga ro di saluhut arta ni angka raja ni Juda, lehononku ma tu tangan ni musunasida, angka na mamupusi nasida, dohot manangkup laho mamboan nasida tu Babel.

20:6 Alai anggo ho ale * Pashur ro di sude isi ni bagasmu, ingkon tarbuang hamu tu Babel, laos mate disi jala tartanom, ho ro di sude angka na mangkaholongi ho, angka na pinaotootom marhite sian panurirangonmu.

20:7 * Dihata i ho ahu ale Jahowa, jala olo ahu hataanmu. Gumogo do ho sian ahu jala monang do ho; hape gabe sirehereon ahu ganup ari; tung saluhut nasida mangarehe ahu.

20:8 Ai ganup mangkuling ahu, ingkon anggukkononku do: Pangarupaon dohot hamagoan; ai hata ni Jahowa manjadi di ahu gabe pangareheon dohot insahinsak ganup ari.

20:9 Jadi ningku ma: Ndang be taringotanku ibana, jala ndang be ahu marjamita marhitehite goarna, hape gabe songon api na marsigorgor di bagasan rohangku huhilala, tarhurung di bagasan holiholingku, siol mandate ahu mangotapotapi, hape ndang tarbahen.

20:10 Ai hubege do hatahata ni torop halak: Biar humaliang! Tuduhon ibana! Itatuduhon ma ibana! Saluhut jolma alealengku mangonggop di lambungku: Anggiat tung tartangkup ibana, asa itapatunduk ibana, jala martubol hita tu ibana.

20:11 Alai Jahowa do * mandongani ahu, songon ulubalang na begu, tagamon monang; * murak situtu do nasida tahe, ai ndang mardohar nasida, haurahon na saleleng ni lelengna, na so tagamon lupa mangonai tu nasida.

20:12 Tongon tahe ale Jahowa Zebaot, ho do na * manguji halak na tigor, na marnida piapia dohot ateate. Sai idaonku do partubolanmu songgop tu nasida, ai nunga tu ho hugiling parbadaanku.

20:13 Marende ma hamu di Jahowa, puji ma Jahowa, ai nunga dipalua ibana tondi ni halak na pogos sian tangan ni angka parjahat.

20:14 Siburaan ma nian ari hatutubungku! Ari panubuhon ni dainang di ahu, unang nian hona pasupasu.

20:15 Siburaan ma nian jolma na mamaritahon tu damang songon on: Nunga tubu di ho sada anak palas situtu rohana nian.

20:16 Masa ma tu baoa i, * songon tu huta, angka na binungkar ni Jahowa so maralangalang, jala begeonna ma nian angguhangguk manogotna i, jala suraksurak ni hamusuon di hos ni ari.

20:17 Ala na so binununa i ahu di bortian, asa laos dainang i nian gabe tanomanku, jala gabegabean nian bortianna saleleng ni lelengna.

20:18 Boasa tung ruar ahu sian bortian laho marnida hangaluton dohot haarsahon, jala marsalpusalpuan ariaringku di bagasan haurahon.

Jeremia 21

21:1 On ma hata na ro tu si Jeremia sian Jahowa, uju na sinuru ni raja Sedekia tu ibana si Pashur, anak ni si Malkia dohot malim * Sepania, anak ni si Maaslia mandok songon on:

21:2 Ua sungkunhon ma tu Jahowa taringot tu hami, ai marmusu do si Nebukadnesar, raja ni Babel dompak hami, anggiat tung olo Jahowa mambahen tu hami hombar tu saluhut halongangan binahenna i na jolo, asa tung muli ibana sian hami.

21:3 Jadi ninna si Jeremia ma tu nasida: Songon on ma dohononmuna tu si Sedekia:

21:4 Boti hata ni Jahowa, Debata ni Israel: Ida ma, ahu pabalikkon sinjata hamusuon, angka na di tanganmuna, angka na pinangkemuna marmusu dompak raja ni Babel dohot dompak halak Kasdim, angka na manosaknosak hamu sian balian mangonjar tu parik, jala papunguonku ma nasida tu parsitongaan ni huta on.

21:5 Asa ahu sandiri marmusu dompak hamu marhitehite tangan na toltol dohot marhitehite botohon na gogo, marhitehite rimas dohot parpiarpiar ni hamuruhon godang.

21:6 Jala bunuonku ma angka isi ni huta on, nang jolma, nang pinahan, gabe marmatean nasida marhitehite begu antuk na rahat.

21:7 Dung i muse, songon on pandok ni Jahowa, pasahatonku ma si Sedekia, raja ni Juda dohot angka naposona ro di situan na torop, angka na teba di huta on sian begu antuk, sian podang dohot sian haleon, tu tangan ni si Nebukadnesar, raja ni Babel, dohot tu tangan ni angka musunasida, dohot tu tangan ni angka na tumahi hosanasida; jadi bunuonna ma nasida marhitehite baba ni podang, ndang tagamon olananna nasida, ndang marpangulahi rohana, jala ndang maralangalang.

21:8 Angkup ni dohononmu ma tu bangso on: Boti hata ni Jahowa: Ida ma, ahu * mambahen tu jolomuna dalan hangoluan dohot dalan hamatean.

21:9 Manang ise na tading di bagasan huta on, ingkon mate ibana marhitehite podang, haraparon, manang begu antuk; alai manang ise na ruar, asa bali tu halak Kasdim, angka na martungkum hamu, mangolu ma ibana, jala tondina i bahen rintahanna.

21:10 Ai nunga hudompakkon bohingku dompak huta on laho mangago, ndada mambahen na denggan, ninna Jahowa; ingkon tu tangan ni raja sian Babel ma pasahatonku huta i, asa tung dipurun marhitehite api.

21:11 Angkup ni dohononmu ma tu pinompar ni raja sian Juda: Tangihon hamu ma hata ni Jahowa!

21:12 Ale pinompar ni si Daud! Boti hata ni Jahowa: Dabu hamu ma uhum na sintong manogotna i, jala * palua hamu jolma na tarsamun i sian tangan ni halak pangarupa, asa unang ruar * rimashu songon api jala marsigorgor, so adong na mangintopi, ala ni hinajahat ni pambahenanmuna.

21:13 Ida ma, dompak ho ma ahu ale isi ni rura i, dolok batu di adaran, ninna Jahowa! Hamu angka na mandok: Tung ise ma tagamon tuat tu hami on? Manang tung ise ma tagamon ro mambongoti inganannami na gantingi?

21:14 Alai marlulu ma ahu dompak hamu, hombar tu parbue ni pambahenmuna, ninna Jahowa, jala ahu manganahiti sada api di bagasan tombakna, asa disudahon saluhut na humaliang.

Jeremia 22

22:1 Boti hata ni Jahowa: Tuat ma ho tu bagas ni raja sian Juda, jala hatahon ma disi hata on.

22:2 Dohononmu ma: Tangihon ma hata ni Jahowa, ale raja ni Juda, na hundul di atas habangsa ni si Daud, ho dohot angka naposom dohot na nirajaanmu angka na bongot tu angka harbangan on.

22:3 Boti hata ni Jahowa: Radoti hamu ma uhum dohot hatigoran, jala palua hamu na tarsamun i sian tangan ni halak pangarupa; jala unang mangarupa hamu manang mambahen gogo tu halak dagang, tu na tading di lampin dohot tu na mabalu, jala unang durushon hamu mudar na so marpipot di inganan on.

22:4 Ai molo diradoti hamu hata ondeng, sai adong do masuk tu pintupintu ni bagasan raja angka na marhabangsa di habangsa ni si Daud, angka na marsihundul di hureta dohot di hoda, nang ibana, nang angka naposona dohot na nirajaanna.

22:5 Alai molo so ditangihon hamu angka hata on, nunga pola maruari ahu tu diringku, ninna Jahowa, ingkon gabe halongonan bagas on.

22:6 Ai songon on do hata ni Jahowa taringot tu bagas ni raja sian Juda: Gilead do ho nian di ahu, ale punsu ni Libanon! Ingkon gabe halongonan do ho bahenonku, gabe huta angka na so marpangisi.

22:7 Jala ahu padirihon dompak ho angka jolma pangago mangalo ho, ganup mardongan sinjata, nasida manaba hau ares angka na pinillitmu jala manimpalhon tu bagasan api.

22:8 Jala torop bangso mamolus sian lambung ni huta on, jala didok be ganup tu donganna: Boasa tung songon i bahenon ni Jahowa tu huta on na sai bolon?

22:9 Jadi dohononnasida ma: Ala na tinadingkonnasida padan tu Jahowa, Debatanasida i, jala marsomba tu angka debata sileban huhut mangoloi nasida.

22:10 Unang tatangisi hamu na mate, jala unang andungi hamu ibana; tumatangis ma hamu tagonan taringot tu ibana na laho tarbuang, ai ndang tagamon mulak be ibana, jala ndang idaonna be tano hatubuanna.

22:11 Ai boti hata ni Jahowa taringot tu si Sallum, anak ni si Josia, raja sian Juda, na mangarajai singkat ni si Josia amana i, * na ruar sian inganan on: Ndang tagamon mulak be ibana tusi.

22:12 Ingkon laos di habuanganna i ibana mate, jala ndang be idaonna tano on.

22:13 Marjea ma manang ise na pauli * bagasna so marhitehite hatigoran dohot bonggarbonggarna so marhitehite uhum, sibolongbolong ulaon ni donganna dibahen, jala ndang * dilehon upa ni ulaonna.

22:14 Lam ninna muse dope: Paulionku ma di ahu sada bagas na bolon, marbonggarbonggar paranginanginan; dibahen huhut angka pandiloan jala dilampis dohot hau ares, jala salenggam sampangna dibahen.

22:15 Tung tagamon ma ho raja, ala manengahon hau ares ho? Ia amam, ndang mangan manang minum huroha, huhut mangkajongjongkon uhum dohot hatigoran, jadi sonang ma dihilala uju i?

22:16 Pasintong uhum ibana tu na parir dohot tu na pogos, jadi sonang ibana; ndai do parbue ni parbinotoan di ahu? ninna Jahowa.

22:17 Alai anggo matam dohot roham, holan laho tu labam do dohot laho mangusehon mudar na so marpipot, huhut mangarupa dohot mambahen uhum gogo.

22:18 Dibahen i songon on hata ni Jahowa dompak si Joiakim, anak ni si Josia, raja sian Juda, ndang tagamon andungkonon ni halak ibana mandok: Oe hahang, oe ito! Ndang tagamon andungkononna ibana mandok: Oe ale tuan! Manang oe ale rajanami!

22:19 Ingkon tanomonna ibana songon halode, saratonna jala timpalhononna ibana dao sian angka bahal ni Jerusalem.

22:20 Nangkok ma ho tu Libanon jala joujou, pangiar ma soaram di Basan jala joujou, ma ho sian Abarim, ai nunga pesan saluhut angka pedanmu.

22:21 Nunga hupalumba ho hian uju di hasonanganmu, alai nimmu do: Ndang olo ahu manangihon. I do antong dalanmu sian haposoonmu, matua so ditangihon ho soarangku.

22:22 Saluhut angka siparmahan ho, purpurhonon ni alogo do, jala saluhut pedanmu ingkon tarboan tu habuangan; jadi * maila jala tarurak situtu ma ho disi ala ni saluhut hajahatonmu.

22:23 Ho ale na hundul di atas ni Libanon! Jala na marasar di angka hau ares! Tung songon dia ma orongorongmu, molo ro tu ho rian, songon boruboru na mangae posoposo.

22:24 Songon tutuna ahu mangolu, ninna Jahowa, tung sura pe * si Konia, anak ni si Joiakim, raja sian Juda, gabe tintin sahap di tanganku siamun, sai na umpatonku do ho sian i.

22:25 Jala pasahatonku ma ho tu tangan ni angka na paburuburu hosam, dohot tu tangan ni angka na hinabiaranmu na sai laon, dohot tu tangan ni si Nebukadnesar, raja sian Babel, dohot tu tangan ni halak Kasdim.

22:26 Jala ahu mangareongkon * ho dohot inangmu, na tumubuhon ho tu tano na asing, na so hatubuanmuna, laos mate disi ma hamu.

22:27 Alai anggo tu tano, na hinalungunhon ni rohanasida naeng mulak tusi, ndang tagamon mulak nasida tusi.

22:28 Tung guriguri na matapor jala na lea do halak si Konia? Manang tung ulaula na so hinalomohon do ibana? Boasa tung direongkon ibana ro di pinomparna, jala ambolong nasida tu tano na so tinandanasida i?

22:29 O tano, tano, tangihon ma hata ni Jahowa!

22:30 Boti hata ni Jahowa: Surathon ma baoa on, so marpinompar; baoa na so mardohar saleleng mangolu; ai ndang tagamon manjadi sian pinomparna nanggo sahalak marhabangsa di habangsa ni si Daud manang mangarajai di Juda tu joloan on.

Jeremia 23

23:1 Marjea ma * parmahan, angka na mangago dohot paserakkon birubiru na huparmahani, ninna Jahowa.

23:2 Dibahen i boti hata ni Jahowa, Debata ni Israel dompak parmahan, angka na marmahan bangsongku: Nunga dipaserak hamu punguanku, jala dionjar hamu, jala ndang dimatamatahon hamu nasida. Ida ma, luluhononku ma tu hamu hinajahat ni pambahenmuna, ninna Jahowa.

23:3 Jala papunguonku ma pasipasi ni punguanki sian saluhut luat haambolongannasida i, jala aduonku nasida mulak tu panjampalannasida i, asa matorop mabue nasida.

23:4 Jala patindangonku tu nasida parmahan angka na marmahan nasida, asa unang be tahuton nasida manang tarsonggot, jala ndang mago nanggo sada, ninna Jahowa.

23:5 Ida ma, na ro do angka ari sogot, ninna Jahowa, patindangonku ma di si Daud * sada tumbur na tigor, na bangkit * raja jala na pistar, jala hajongjongkononna ma uhum dohot hatigoran di tano i.

23:6 Di angka arina dapotan tua ma Juda, jala Israel marsonangsonang di ingananna; jala on do goarna dohonon ni halak: Jahowa parpintoranta.

23:7 Dibahen i ida ma, * na ro do angka ari sogot, ninna Jahowa, ndang be dohononnasida: Songon tutuna mangolu Jahowa, naung manogihon pinompar ni Israel ruar sian tano Misir.

23:8 Ingkon: Songon tutuna mangolu Jahowa, naung manogihon jala naung mamboan pinompar ni Israel mulak sian tano na tungkan utara dohot sian saluhut luat haambolongannasida na hubahen i, asa maringan nasida muse di tanonasida i.

23:9 Dompak angka panurirang. Tung ditostos do rohangku di bagasan andorangku, angka hitir do saluhut holiholingku, jala songon halak na mabuk do pangalahongku, jala songon baoa na pinatunduk ni anggur ala Jahowa dohot humongkop angka hata habadiaonna i.

23:10 Ai gok angka pangalangkup do tano i, gabe hasang tano i binahen ni sapata, marpirang angka panjampalan di halongonan, ala na roa do pangalahonasida, jala gogonasida ndang turut.

23:11 Ai nang panurirang, nang malim rap ramun do; gari di bagasan jorongku dapot ahu do hajahatonnasida, ninna Jahowa.

23:12 Dibahen i * dalannasida, ingkon gabe sapsap bire na landit bagasan; ai paroonku ma tu atasnasida hamagoan di taon pamaloson tu nasida, ninna Jahowa.

23:13 Nang di angka panurirang ni Samaria nunga huida hasogiron: Manurirangi do nasida marhitehite Baal, jala dililuhon nasida bangsongku Israel.

23:14 Alai anggo di angka panurirang di Jerusalem, nunga huida hasogiron: Pangalangkupon jala marpangalahohon gabus do nasida, jala * dipargogoi nasida do tangan ni angka parjahat, asa unang mulak nasida ganup sian hajahatonna. Tung saluhut do nasida di ahu * songon Sodom, jala pangisina i songon Gumora.

23:15 Dibahen i boti hata ni Jahowa Zebaot taringot tu angka panurirang i: Ida ma, * ahu papanganhon tu nasida raru, jala painumhon tu nasida aek rasun, ai sian angka panurirang di Jerusalem nunga ruar haramunon tu sandok tano i.

23:16 Boti hata ni Jahowa Zebaot: Unang tangihon hamu hatahata ni panurirang, angka na manurirangi tu hamu! * Na paotootohon hamu do nasida. Alatan ni rohanasida sandiri do dihatahon, ndada na sian pamangan ni Jahowa.

23:17 Sai didok nasida do tu angka na mangelesi ahu: Nunga didok Jahowa, sai na sonang do hamu! Jala tu ganup na marpangalahohon * hatangkangon ni rohana didok nasida do: Ndang tagamon ro hamagoan tu hamu nanggo sada.

23:18 Ai manang ise naung tindang di partuptupan ni Jahowa, i ma na marnida dohot umbege hatana; manang ise naung marateatehon hatana, i ma dibaritahon.

23:19 Ida ma, ruar do sada habahaba sian Jahowa, parpiarpiar ni murukna, jala sada habahaba poting baliung martahop mangonai tu ulu ni angka parjahat.

23:20 Ndang tagamon sumurut muruk ni Jahowa, paima dipatupa jala di hajongjongkon angka sangkap ni rohana. Di ujung ni angka ari sogot pe antusanmuna situtu hata i.

23:21 Ndada ahu marsuru angka panurirang i, hape marlojong do nasida; ndada ahu mangkatahon tu nasida, hape manurirangi do nasida.

23:22 Alai tung sura naung tindang nasida di partuptupanki patubegehononnasida ma nian angka hatangku tu bangsongku, jala mulak bangsongku bahenonna sian dalannasida, angka na jahat i dohot sian hinaroa ni pambahennasida.

23:23 Tung holan Debata sian na jonok do ahu, ninna Jahowa, ndada huhut Debata sian na dao?

23:24 Tung tarbahen ma martabuni manang ise di parsitabunian, so dapot idaonku ibana? ninna Jahowa. Nda ahu do na manggohi langit dohot tano on? ninna Jahowa.

23:25 Nunga tangkas hubege hata na hinatahon ni angka panurirang, angka na manurirangkon sipaotooto marhitehite goarhu, ninna do: Nunga marnipi ahu, nunga marnipi ahu!

23:26 Sadia leleng nari songon i di bagasan roha ni panurirang, angka na manurirangkon sipaotooto, angka na manurirangkon angkal ni rohanasida sandiri?

23:27 Angka na sumangkapi mambahen lupa bangsongku di goarhu marhitehite nipinasida, angka na hinatahonna ganup tu donganna, songon pangkalupahon ni ompunasida di goarhu binahen ni Baal.

23:28 Panurirang hasahatan ni nipi, nipi ma dihatahon; alai anggo hasahatan ni hatangki ibana, hatangki ma sintong dihatahon. Tung aha ma pasaoron ni hurangkam tu eme? ninna Jahowa.

23:29 Nda songon api do hatangki? ninna Jahowa, jala songon nanggar na mangarosahi batu mamak?

23:30 Dibahen i ida ma, marlulu ma ahu ninna Jahowa dompak angka panurirang, angka na manangkoi hatangki, ganup sian donganna.

23:31 Ida ma, marlulu ma ahu, ninna Jahowa dompak angka panurirang, angka na pasomal dilanasida mandok songon on: Jahowa do na martona.

23:32 Ida ma, marlulu ma ahu, ninna Jahowa dompak angka na manurirangkon nipi sipaotooto, angka na hinatahonnasida laho mangaliluhon bangsongku marhitehite sipaotootonasida dohot marhitehite panengaonnasida. Hape ndang dung ahu marsuru nasida, jala ndang dung ahu martona tu nasida, jala ndang marguna nasida di bangso on ninna Jahowa.

23:33 Molo tung manungkun bangso on, manang panurirang manang malim tu ho songon on: Aha do uhum ni Jahowa? Jadi dohononmu ma tu nasida, songon on ma uhum ni Jahowa: Ambolongkon ma hamu, ninna Jahowa.

23:34 Ia adong panurirang manang malim, manang bangso, na mandok songon on: Pinabotoboto uhum ni Jahowa! Marlulu ma ahu tu baoa i dohot tu pinomparna.

23:35 Songon on ma dohononmuna, ganup tu donganna, jala ganup tu hahaanggina: Dia do alus ni Jahowa? Manang: Aha do na nidok ni Jahowa?

23:36 Alai anggo uhum ni Jahowa, ndang jadi be sitaringotanmuna, ai apala hata elesna sandiri, gabe uhum tu ganup, ala naung dipabalik hamu angka hata ni Debata na mangolu i, Jahowa Zebaot Debatanta i.

23:37 Boti dohononmu tu panurirang: Dia do alus ni Jahowa tu ho? Manang: Aha do na nidok ni Jahowa?

23:38 Alai molo sai ehetonmuna uhum ni Jahowa! Ala ni umbahen songon on hata ni Jahowa: Dibahen na sai diehet hamu hata on: Uhum ni Jahowa, atik pe naung husuru tu hamu mandok songon on: Ndang jadi ehetonmuna be uhum ni Jahowa.

23:39 Dibahen i ida ma, tangkuponku ma hamu laho mangareongkon hamu sian adopan ni bohingku, nang huta on na hulehon tu hamu dohot tu ompumuna.

23:40 Jala ampehononku ma tu hamu * haurahon saleleng ni lelengna dohot haleaon saleleng ni lelengna, na so tagamon halupahononhon.

Jeremia 24

24:1 Dung i dipataridahon Jahowa ma tu ahu dua hirang na marisi parbue ni hau ara, peak di jolo ni joro ni Jahowa, dung tarbuang dibahen * si Nebukadnesar raja sian Babel si Jekonya anak ni si Joiakim, raja sian Juda, ro di angka induk ni halak Juda dohot angka pande hau dohot pande bosi, jala tarboan nasida sian Jerusalem tu Babel.

24:2 Hirang na sada marisi parbue ni hau ara angka na denggan situtu, songon parbue ni hau ara patumonaan; alai hirang na sadanari marisi parbue ni hau ara angka na roa situtu, angka na so tarpangan dibahen hinaroana.

24:3 Jadi ninna Jahowa ma tu ahu: * Aha do na niidam ale Jeremia? Gabe ningku ma: Angka parbue ni hau ara; ia parbue ni hau ara angka na denggan i, tung na denggan situtu do, alai angka na roa i tung na roa situtu do, angka na so tarpangan dibahen hinaroanna.

24:4 Dung i ro ma hata ni Jahowa tu ahu songon on:

24:5 Boti hata ni Jahowa, Debata ni Israel: Songon parbue ni hau ara angka na denggan i, songon i do angka na tarbuang sian Juda, angka naung hupaunsat sian inganan on tu tano ni halak Kasdim, tataponku ma nasida tu na denggan.

24:6 Tataponku ma nasida tutu tu na denggan, jala mulak nasida boanonku tu tano on, jala * paulionku nasida, ndada laos lohaonku, jala lopokhononku nasida, ndada laos butbutonku.

24:7 Jala lehononku tu nasida roha na tumanda ahu, na marhatutuhon ahu Jahowa; ingkon gabe bangsongku nasida, jala ahu gabe Debatanasida, ai mulak do nasida sogot tu ahu sian nasa rohanasida.

24:8 Alai * songon parbue ni hau ara angka na roa i, angka na so tarpangan dibahen hinaroana, suang songon i bahenonku, ninna Jahowa, si Sedekia raja ni Juda ro di angka indukna dohot pasipasi ni Jerusalem, angka na tading di tano on, nang angka na maringanan di tano Misir.

24:9 Jala pasahatonku nasida gabe siruparupaon, gabe hamagaon di * saluhut harajaon ni tano on, gabe haurahon jala gabe * parumpamaan, gabe ende aling, jala gabe bura di saluhut inganan haambolongannasida na hubahen i.

24:10 Jala tongosonku tu tongatonganasida podang, haraparon dohot begu sorop, paima tung sun siap nasida sian tano naung hulehon tu nasida dohot tu angka ompunasida i.

Jeremia 25

25:1 On ma hata na ro tu si Jeremia taringot tu sandok bangso Juda, paopattaonhon hinarajahon ni si Joiakim, anak ni si Josia, raja sian Juda, i ma taon parjolo ni si Nebukadnesar raja sian Babel.

25:2 Naung hinatahon ni panurirang Jeremia tu sandok bangso Juda dohot tu saluhut isi ni Jerusalem songon on:

25:3 Olat ni taon pasampulutoluhon hinarajahon ni si Josia, anak ni si Amon, raja sian Juda sahat ro di ari on, na duapulu tolu taon i sai ro hata ni Jahowa tu ahu, jala naung huhatahon tu hamu, pola sogot ahu hehe mangkatahon, alai ndang ditangihon hamu.

25:4 Jala nunga disuru Jahowa nian tu hamu saluhut naposona angka panurirang i, tibu hian nasida disuru, alai ndang ditangihon hamu, jala ndang dipaeleng hamu pinggolmuna mananginangi.

25:5 Songon on do didok nasida: Ua * mulak ma hamu ganup sian dalanna na jahat i dohot sian hinaroa ni pambahenanmuna, asa mian hamu di tano naung nilehon ni Jahowa tu hamu dohot tu angka ompumuna olat ni na robi ro di saleleng ni lelengna.

25:6 Jala unang ihuthon hamu angka debata sileban laho mangoloi nasida dohot marsomba tusi; jala unang pahehe hamu murukku marhitehite pambahenan ni tanganmuna, asa unang huparo hinamago tu hamu.

25:7 Alai ndang ditangihon hamu ahu, ninna Jahowa, asa pahehehon murukku marhitehite pambahenan ni tanganmuna, gabe hinamago tu hamu sandiri.

25:8 Dibahen i boti hata ni Jahowa Zebaot: Ala na so tinangihonmuna angka hatangku.

25:9 Ida ma, ahu marsuru tu si Nebukadnesar, raja sian Babel, * naposongki dohot mangalapi saluhut bangso * na tungkan utara, ninna Jahowa, jala togihononku nasida tu tano on dohot tu angka pangisina dohot tu saluhut bangso angka na humaliang on, jala pansing nasida bahenonku, asa gabe halongonan, gabe sirehereheon, jala gabe parhorsihan saleleng ni lelengna.

25:10 Jala padaoonku sian tongatonganasida soara las ni roha dohot soara olopolop, soara ni pangoli dohot soara ni oroan, soara ni pandudaan dohot hatiuron ni palito.

25:11 Jala sandok tano on gabe halongonan, gabe timbunan batu, jala parhatobanon ni raja sian Babel angka bangso on * pitupulu taon lelengna.

25:12 Alai ia dung gok na pitupulu taon i marlulu ma ahu dompak raja ni Babel dohot dompak bangsona, ala hajahatonnasida ninna Jahowa, dohot dompak tano ni halak Kasdim, jala bahenonku do i gabe halongonan saleleng ni lelengna.

25:13 Jala paroonku ma tu tano i saluhut hata, angka naung hulumbahon tusi, ro di luhut na tarsurat di bagasan buku on, naung sinurirangkon ni si Jeremia taringot tu saluhut angka bangso i.

25:14 Ai nasida pe parhatobanon ni torop bangso dohot raja angka na bolon, jala sudolhononku tu nasida hombar tu pambahennasida, jala hombar tu jadijadian ni tangannasida.

25:15 Ai boti do hata ni Jahowa, Debata ni Israel tu ahu: Buat ma * panginuman anggur pangarimasan on sian tanganku, jala * painumhon ma sian i tu saluhut bangso angka sitopotonmu suruonku.

25:16 Asa minum nasida jala rabatrabat, pola gila binahen ni podang sitongosonku tu tongatonganasida.

25:17 Jadi hubuat ma panginumani sian tangan ni Jahowa, jala hupainumhon tu saluhut bangso anak na hutopot, sinuru ni Jahowa:

25:18 Tu Jerusalem dohot tu angka huta ni Juda dohot tu rajana ro di indukna angka na mambahen nasida gabe halongonan, gabe timbunan batu, gabe sirehereheon jala gabe bura, songon na masa sadarion.

25:19 Angkup ni tu Firaun, raja sian Misir ro di naposona, angka indukna dohot sandok bangsona.

25:20 Dohot tu sandok bangso na hinarana ro di sude raja ni tano Us, dohot sude raja ni tano ni halak Palistim boti tu Askelon, Gasa, Ekron dohot pasipasi ni Asdod.

25:21 Boti tu Edom dohot tu Moab ro di pinompar ni si Amon.

25:22 Boti tu saluhut raja sian Tirus dohot sude raja sian Sidon dohot angka raja ni pulopulo, angka na di bariba ni laut.

25:23 Boti tu Dedan dohot Tema dohot Bus ro di sude parulu na marjambulan.

25:24 Dohot tu sude raja ni Arab ro di sude raja na hinara, angka na maringan di halongonan.

25:25 Boti tu saluhut raja ni Simri, dohot tu saluhut raja ni Elam dohot tu saluhut raja ni Madai.

25:26 Boti tu saluhut raja na tungkan utara, angka na donok dohot angka na holang, ganup rap dohot donganna, ro di saluhut harajaon ni tano on angka na di portibi on; nang raja sian * Sesak, ibana minum apala parpudi sian nasida luhut.

25:27 Jala dohononmu ma tu nasida: Boti hata ni Jahowa Zebaot, Debata ni Israel: Minum ma hamu gabe mabuk maradu muta jala tinggang, jala ndang be hehe maradophon podang sitongosonku tu tongatongamuna.

25:28 Jala molo tung manjua nasida manjalo panginumani sian tanganmu laho manginum sian i, dohononmu ma tu nasida: Boti hata ni Jahowa Zebaot: Ndang tarjua hamu so inumonmuna.

25:29 Ai ida ma, apala di huta na targoar tu goarhu ahu * mamungka manorui, tung tagamon lias ma ia hamu? Ndang tarbahen lias hamu, ai haraonku ma podang i dompak saluhut isi ni tano on, ninna Jahowa Zebaot.

25:30 Alai anggo ho, surirangkononmu ma tu nasida saluhut angka hata on, jala dohononmu tu nasida: * Marioho ma Jahowa sian banua ginjang, jala dipatubegehon soarana sian ingananna na badia i; marioho situtu ma ibana mida partalianna; mariaia ma ibana songon halak sidege pangilangan laho maralus ibana dompak saluhut isi ni tano on.

25:31 Tarbege di parsidomdomna sahat ro di ujung ni tano on, ai marparbadaan do Jahowa dompak angka bangso; maruhum do ibana tu saluhut sibuk, pasahatonna do angka parjahat i tu podang, ninna Jahowa.

25:32 Boti hata ni Jahowa Zebaot: Ida ma, ruar do hinamago sian bangso tu bangso, jala hehe do sada habahaba bolon sian angka ujung ni tano on.

25:33 Jala * bangke angka naung marragean binunu ni Jahowa, marpeahan ro di ari na sasada i, sian ujung ni tano on sahat ro di ujung ni tano on; ndang tatangisanna nasida jala ndang papunguonna manang tanomonna; gabe napa do nasida di sisik ni tano on.

25:34 * Mangangguk badar ma hamu ale angka * parmahan, jala mangandungi; jala margulu sirabun ma hamu ale angka partogi ni punguan i, ai nunga gok ariarimuna laho potongon, jala marserak hamu hubahen, asa tung tinggang hamu, songon guriguri hasudungan ni roha.

25:35 Jala mandao do haporusan sian angka parmahan, nang haluaon sian angka partogi ni punguan i.

25:36 Tarbege do soara angguhangguk sian angka parmahan, jala andung sian angka partogi ni punguan i, ai nunga diulang Jahowa panjampalannasida i.

25:37 Jala nunga tarulang angka jampalan hasonangan maradophon parpiarpiar ni muruk ni Jahowa.

25:38 Nunga ditadingkon ibana parlinggomanna songon anak ni singa; ai nunga gabe halongonan tanonasida i maradophon rimas ni pamunu dohot maradophon parpiarpiar ni rimasna.

Jeremia 26

26:1 Di mula ni harajaon ni si Joiakim, anak ni si Josia, raja sian Juda, ro ma hata on sian Jahowa, ninna ma:

26:2 Songon on do hata ni Jahowa: Jongjong ma ho tu alaman ni joro ni Jahowa, jala hatahon ma tu saluhut isi ni angka huta ni Juda, angka na ro marsomba di bagasan joro ni Jahowa, saluhut hata angka naung hutonahon tu ho, sihatahononmu tu nasida; ndang jadi huranganmu, nanggo hata sisandok.

26:3 Anggiat tung ditangihon nasida jala * muba rohanasida, ganup sian dalanna na roa i, asa marpangulahi rohangku taringot tu hamagoan naung husangkap hian naeng bahenon tu nasida, ala hinaroa ni pambahenannasida.

26:4 Dibahen i dohononmu ma tu nasida: Songon on do hata ni Jahowa, molo so ditangihon hamu ahu, asa marpangalaho di bagasan patikku, naung hulehon di jolomuna.

26:5 Molo so ditangihon hamu hata ni angka naposongku, i ma panurirang angka na husuru tu hamu tibu hian tongtong, hape ndang olo hamu manangihon.

26:6 Dibahen i bahenonku ma tu joro on * songon naung hubahen tu Silo, jala huta on bahenonku gabe bura di saluhut bangso parbegu di atas tano on.

26:7 Jadi dibege angka malim dohot angka panurirang ro di sandok bangso i si Jeremia mangkatahon angka hata i di joro ni Jahowa.

26:8 Jadi dung tolhas dihatahon si Jeremia saluhut hata na tinonahon ni Jahowa hatahononna tu sandok bangso i, gabe ditangkup angka malim dohot panurirang dohot sandok bangso i ibana, angka ninna ma: Ingkon marutang hosa do ho!

26:9 Boasa tung manurirangi ho marhitehite goar ni Jahowa, nimmu do: Bagas on ingkon gabe songon Silo, jala huta on tarulang sogot so adong pangisina nanggo sahalak? Jadi dirongom sandok bangso i ma si Jeremia di bagasan joro ni Jahowa.

26:10 Jadi dung dibege angka induk ni Juda barita i gabe nangkok ma nasida sian bagas ni rajai laho tu joro ni Jahowa jala hundul nasida di pintu na imbaru na di joro ni Jahowa.

26:11 Dung i didok angka malim dohot angka panurirang tu angka induk dohot tu sandok bangso i songon on: Patut marutang hosa baoa on, ai nunga manurirangi ibana dompak huta on, apala pinggolmuna sandiri umbegesa.

26:12 Alai ninna si Jeremia ma tu sude angka induk dohot tu sandok bangso i songon on: Jahowa do marsuru ahu laho manurirangkon dompak joro on dohot dompak huta on sude hata, angka naung binegemuna i.

26:13 On pe padenggan hamu ma dalanmuna dohot pambahenanmuna jala tangihon hamu soara ni Jahowa, Debatamuna i, asa marpangulahi roha ni Jahowa taringot tu hamagoan naung nilumbahonna i tu hamu.

26:14 Alai anggo ahu, ida ma di bagasan tanganmuna do ahu; bahen hamu tu ahu manang dia na denggan dohot na sintong di rohamuna.

26:15 Alai ingkon botoonmuna do, molo tung saut ahu dibunu hamu, ingkon marsapata tu hamu mudar na so marpipot dohot tu huta on dohot tu jolma pangisina i, ai tongon do Jahowa marsuru ahu tu hamu laho mangkatahon tu pinggolmuna saluhut angka hata on.

26:16 Dung i ninna angka induk dohot sandok bangso i tu angka malim dohot tu angka panurirang: Ndang patut marutang hosa halak on, ai marhitehite goar ni Jahowa, Debatanta i ibana mangkatahon tu hita.

26:17 Angkup ni hehe ma deba baoa sian angka sintua ni luat i angka ninna nasida ma tu sandok luhutan ni bangso i songon on:

26:18 Si Mika, na sian Maressa manurirangi do di angka ari ni si Hiskia, raja ni Juda, jala ninna do tu sandok bangso Juda: Songon on do hata ni Jahowa Zebaot: Ingkon ninggala on sogot Sion songon hauma, jala Jerusalem gabe timbunan batu, jala dolok ojahan ni joro, gabe tombak na timbo.

26:19 Beha huroha, nunga tung dibunu si Hiskia raja sian Juda dohot sandok Juda ibana alani? Nda lam mabiar do rajai mida Jahowa jala martangiang di adopan ni Jahowa? Jadi * marpangulahi ma roha ni Jahowa taringot tu hamagoan naung nilumbahonna tu nasida; ia hita, tung bahenonta ma hamagoan bolon tu tondinta i?

26:20 Angkup ni adong muse na jolo sahalak, na manurirangi marhitehite goar ni Jahowa, i ma si Uria anak ni si Semanya sian Kiriat Jearim, jala manurirangi ibana dompak huta on dohot dompak tano on, suang songon saluhut hata ni si Jeremia.

26:21 Jadi dung dibege raja Joiakim dohot saluhut ulubalangna dohot saluhut induk hatana i, ditahi roha ni rajai ma naeng mambunu ibana. Dung dibege si Uria hata i gabe mabiar ibana laos maporus laho tu Misir.

26:22 Dung i disuru raja Joiakim deba baoa tu Misir, i ma si Elnatan, anak ni si Akbor, dohot deba baoa donganna laho tu Misir.

26:23 Angka na manogihon si Uria sian Misir, jala diboan ibana tu jolo ni raja Joiakim, na mambunu ibana marhitehite podang jala direongkon bangkena tu tanoman ni halak situan na torop.

26:24 Alai anggo tangan ni * si Ahikam, anak ni si Sapan, mandongani si Jeremia umbahen so sahat ibana tu tangan ni situan na torop i laho bunuonna.

Jeremia 27

27:1 Di mula ni harajaon ni si Joiakim, anak ni si Josia, raja sian Juda, ro ma hata on tu si Jeremia sian Jahowa:

27:2 Songon on do hata ni Jahowa tu ahu: Bahen ma di ho angka tali dohot auga jala ampehon tu tangkuhukmu.

27:3 Dung i pantongoshon ma angka i tu * raja sian Edom dohot tu raja sian Moab dohot tu raja ni halak Amon dohot tu raja sian Tirus dohot tu raja sian Sidon marhitehite tangan ni surusuruan, angka naung ro tu Jerusalem tumopot si Sedekia, raja sian Juda.

27:4 Jala tonahononmu do tu nasida sidohononna tu tuannasida: Songon on do hata ni Jahowa Zebaot, Debata ni Israel, ingkon songon i dohononmuna tu tuanmuna i.

27:5 Ahu naung jumadihon tano on, jolma i dohot pinahan angka na di tano on marhitehite hagogoonku na godang i dohot marhitehite tanganku na toltoli jala hulehon do i tu manang ise lomo ni rohangku.

27:6 Nuaeng pe, * nunga hupasahat saluhut angka luaton tu bagasan tangan ni si Nebukadnesar, raja sian Babel * naposongki ro di binatang angka na di ladang i nunga hupasahat tu ibana, asa mangoloi patu di ibana.

27:7 Jala ingkon mangoloi patu tu ibana do saluhut angka bangso i dohot tu anakna dohot tu pahompuna * paima ro nang tingki ni tanona sandiri, dung i muse torop bangso dohot raja angka na balga papatu ibana.

27:8 Dung i masa ma, ia adong bangso dohot harajaon na so mangoloi patu tu ibana, tu si Nebukadnesar raja ni Babel, jala na so paundukkon tangkuhukna tu auga ni raja ni Babel marlulu ma ahu tu bangso i marhitehite podang marhitehite haraparon dohot marhitehite begu antuk, ninna Jahowa, paima sun siap nasida hubahen marhitehite tanganna.

27:9 Dibahen i unang patangitangi hamu angka panurirangangmuna manang angka pangarunding manang angka siparnipi di hamu manang angka sijujur parhalaan manang angka parsibalik mata, angka na mandok tu hamu songon on: Unang hamu mangoloi patu tu raja ni Babel.

27:10 Ai sipaotooto do disurirangkon nasida tu hamu, asa mambahen dao hamu sian tanomuna, jala ahu mangonjar hamu, asa laos mago hamu di rohana.

27:11 Alai anggo bangso na paunduk tangkuhukna jumalo auga ni raja ni Babel, jala mangoloi patu tu ibana, pahotonku ma ibana di tanona, ninna Jahowa, asa dipaulaula, jala maringan disi.

27:12 Ia tu si Sedekia, raja sian Juda, huhatahon do hombar tu saluhut angka hata i songon on: Paunduk hamu ma tangkuhukmuna manjalo auga ni raja sian Babel huhut mangoloi patu di ibana dohot di bangsona, asa mangolu hamu.

27:13 Boasa tagonan mate hamu, ho dohot bangsom, marhitehite podang marhitehite haraparon dohot marhitehite begu sorop, songon naung nilumbahon ni Jahowa hian tu bangso na so mangoloi patu tu raja sian Babel.

27:14 Dibahen i unang patangitangi hamu hatahata ni panurirang, angka na mandok tu hamu songon on: Ndang tagamon patu hamu bahenon ni raja sian Babel! Ai sipaotooto do na sinurirangkonnasida tu hamu!

27:15 Ai ndada ahu marsuru nasida, ninna Jahowa, manurirangi pe nasida marhitehite goarhu laho paotootohon do, asa ahu mangonjar hamu laos mago di rohana, nang hamu, nang panurirang i, angka na manurirangi tu hamu.

27:16 Angkup ni ningku do tu angka panurirang dohot tu sandok bangso i: Songon on do hata ni Jahowa: Unang patangitangi hamu hatahata ni panurirangmuna, angka na manurirangkon tu hamu songon on: Ida ma, magira ma mulak boanon * angka ulaula ni joro ni Jahowa sian Babel! Ai sipaotooto do na sinurirangkonnasida i tu hamu.

27:17 Unang patangitangi hamu nasida! Tagonan hamu mangoloi patu tu raja sian Babel, asa mangolu hamu. Boasa tagonan huta on gabe parsiragongan?

27:18 Alai molo tung panurirang nasida, jala molo adong hata ni Jahowa tu nasida, ua martangiang nian nasida tu Jahowa Zebaot, asa unang be tarboan ulaula angka na teba di bagasan joro ni Jahowa dohot di jabu ni raja sian Juda dohot di Jerusalem tu Babel.

27:19 Ai songon on do hata ni Jahowa Zebaot taringot tu angka tiang dohot taringot tu tobat i dohot taringot tu angka sidegedegean dohot taringot tu pasipasi ni ulaula angka na teba di huta on.

27:20 Angka na so binoan ni si Nebukadnesar, raja sian Babel, uju na binuangkonna si Jekonya, anak ni si Joiakim, raja ni Juda sian Jerusalem tu Babel rap dohot saluhut halak na raja sian Juda dohot Jerusalem.

27:21 Ai songon on do hata ni Jahowa Zebaot Debata ni Israel taringot tu ulaula angka na teba dope di joro ni Jahowa dohot di bagas ni raja sian Juda dohot di Jerusalem.

27:22 Ingkon luhutna i tarboan tu Babel, jala laos disi sahat ro di ari naung hubuhul panopoton di nasida, ninna Jahowa, laos ahu mamboan nasida mulak tu inganan on.

Jeremia 28

28:1 Dung i masa ma di taon na sasada i, di mula ni harajaon ni si Sedekia, raja sian Juda, paopattaonhon, di bulan sipaha lima, ro tu ahu hata ni si Hanania, anak ni si Assur, panurirang na sian Gibeon, di bagasan joro ni Jahowa di adopan ni angka malim dohot sandok bangso i, ninna do:

28:2 Songon on do hata ni Jahowa Zebaot, Debata ni Israel; nunga huponggolhon auga pinampe ni raja sian Babel.

28:3 Di bagasan dua taon on dope ahu mamboan mulak tu inganan on saluhut ulaula ni joro ni Jahowa, angka naung binuat ni si Nebukadnesar raja ni Babel sian inganan on, jala diboan tu Babel.

28:4 * Si Jekonya pe, anak ni si Joiakim, raja ni Juda, ro di saluhut na tarbuang sian Juda, angka na tarboan tu Babel, ingkon mulak boanonku tu inganan on ninna Jahowa; ai ponggolhononku ma auga pinampe ni raja sian Babel.

28:5 Dung i ninna panurirang Jeremia ma tu panurirang Hanania di adopan ni angka malim dohot di adopan ni sandok bangso i, angka na jongjong di bagasan joro ni Jahowa.

28:6 Dung i ninna panurirang Jeremia ma: Amin! Denggan nian dibahen Jahowa songon i! Sai dipasintong Jahowa ma hatahatam, angka naung sinurirangkonmi taringot tu hamumulak sian Babel tu inganan on, angka ulaula ni joro ni Jahowa ro di saluhut angka naung tarbuang i.

28:7 Alai tahe sai tangihon ma hata on, na huhatahon tu pinggolmu dohot tu pinggol ni saluhut bangso i:

28:8 Panurirang angka na jumolo sian ahu dohot sian ho, sian na robi sahali, angka naung manurirangi dompak torop luat dohot dompak harajaon angka na balga taringot tu hamusuon, pardangolan dohot begu antuk.

28:9 Ia adong panurirang na sumurirangkon pardamean, di hasisintong ni hata panurirangonna i tartanda ma panurirang i, manang na tongon Jahowa marsuru ibana.

28:10 Dung i dibuat panurirang Hanania ma auga sian tangkuhuk ni panurirang Jeremia, laos diponggolhon ma i.

28:11 Dung i ninna si Hanania ma di adopan ni sandok bangso i: Songon on do hata ni Jahowa: * Di bagasan dua taon on dope ponggolhononku ma songon i auga na pinampe ni si Nebukadnesar, raja di Babel, sian tangkuhuk ni saluhut bangso. Dung i ditulus panurirang Jeremia ma dalanna.

28:12 Jadi dung diponggolhon panurirang Hanania auga i sian tangkuhuk ni panurirang Jeremia, ro ma muse hata ni Jahowa tu si Jeremia songon on:

28:13 Laho ma ho jala dok ma tu si Hanania: Songon on do hata ni Jahowa: Nunga diponggolhon ho anggo auga angka na sian hau; alai ingkon paulionmu do auga angka na sian bosi bahen singkatna.

28:14 Ai songon on do hata ni Jahowa Zebaot, Debata ni Israel: * Auga bosi do na huampehon tu tangkuhuk ni saluhut bangso on, asa * mangoloi patu tu si Nebukadnesar, raja sian Babel, ingkon oloannasida ibana, nang angka binatang di ladang nunga hupasahat tu ibana.

28:15 Dung i ninna panurirang Jeremia ma tu panurirang Hanania: Ua tangihon ale Hanania? Ndang Jahowa marsuru ho, hape ho do mangela bangso on marhaposan di sipaotooto.

28:16 Dibahen i, songon on do hata ni Jahowa: Ida ma, onjarhononku ma ho sian sisik ni tano on ingkon di bagasan taon on dope ho mate, ala di jamitahon ho * parbalion sian Jahowa.

28:17 Jadi mate ma tongon panurirang Hanania di bagasan na sataon i, di bulan sipahapitu.

Jeremia 29

29:1 On do hata ni surat na tinongos ni panurirang Jeremia sian Jerusalem tu pasipasi ni sintua angka na tarbuang i dohot tu angka malim dohot tu angka panurirang dohot tu sandok bangso i, angka naung binuangkon ni si Nebukadnesar sian Jerusalem tu Babel.

29:2 Dung tarboan raja * Jekonya dohot jolmana ro di angka na pinangkis, angka induk ni Juda dohot Jerusalem dohot angka pande hau dohot pande bosi sian Jerusalem.

29:3 Na tinongosna tu Babel marhite sian si Eleasa, anak ni si Sapan, dohot si Gemaria, anak ni si Hilkia, na sinuru ni si Sedekia, raja sian Juda, tu si Nebukadnesar raja sian Babel, ninna do:

29:4 Songon on do hata ni Jahowa Zebaot, Debata ni Israel, tu saluhut naung tarbuang, angka na hubuangkon sian Jerusalem tu Babel:

29:5 Pauli hamu angka bagas, laos ingani hamu, jala pungka hamu angka porlak, laos pangan hamu parbuena!

29:6 Buat hamu ma parompuan bahen jolmamu, asa tumubuhon anak dohot boru hamu; paorohon hamu anakmuna jala boruhon hamu borumuna, asa tumubuhon anak dohot boru nasida, asa sopar hamu disi, jala unang moru bilanganmuna.

29:7 Ringkoti hamu huhut hasonangan ni huta habuanganmuna na hubahen i, jala tangiangkon hamu nasida tu Jahowa, ai molo marhasonangan huta i, marhasonangan ma dohot hamu.

29:8 Songon on do hata ni Jahowa Zebaot, Debata ni Israel: * Unang olo hamu paotootoon ni panurirangmuna manang pangarunding angka na di tongatongamuna, jala unang patangitangi hamu nipi, angka na niipimuna.

29:9 Ai sipaotooto do na sinurirangkonnasida tu hamu marhitehite goarhu; * ndang ahu marsuru nasida, ninna Jahowa.

29:10 Ai songon on do hata ni Jahowa: Molo dung gok * na pitupulu taon i di Babel, ebatanku ma hamu dohot pasintongkon tu hamu bagabagangku na denggan i asa mamboan hamu mulak tu inganan on.

29:11 Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna.

29:12 Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu.

29:13 Jala luluanmuna ma ahu laos jumpang hamu, molo tung dilului hamu ahu sian nasa rohamuna.

29:14 Jadi jumpang hamu ma ahu, ninna Jahowa, jala * mulak bahenonku angka na tarbuang sian hamu, jala papunguonku hamu sian saluhut bangso parbegu dohot sian saluhut inganan haambolonganmuna na sai laon na hubahen i, ninna Jahowa, jala mulak hamu boanonku tu inganan haborhatanmuna hian laho tarbuang.

29:15 Hape didok hamu do: Nunga adong panurirang di hami di Babel, dipahehe Jahowa.

29:16 Ai songon on do hata ni Jahowa taringot tu raja, na marhabangsa di habangsa ni si Daud dohot taringot tu sandok bangso na maringan di huta on, i ma hahaanggimuna angka na so tarboan rap dohot hamu tu habuangan.

29:17 Songon on do hata ni Jahowa Zebaot: Ida ma, ahu manongoshon tu tongatonganasida podang, haraparon dohot begu antuk, jala ahu mambahen nasida * songon antajau na busuk, angka na so tarpangan dibahen hinabusukna.

29:18 Jala ahu paburuburu nasida marhitehite podang, haraparon dohot begu antuk, jala bahenonku nasida gabe siruparupaon * ni saluhut harajaon, angka na di tano on, gabe bura jala gabe hasonggoton, gabe sirehereheon dohot siinsakinsahan di tongatonga ni saluhut bangso parbegu, haambolongannasida na hubahen i.

29:19 Ala na so ditangihon nasida angka hatangki, ninna Jahowa, uju na husuru tu nasida angka naposongku, angka panurirang i, tole manogotna i, tole potangna, hape ndang olo hamu manangihon hatanasida i ninna Jahowa.

29:20 Dibahen i tangihon ma hata ni Jahowa, * saluhut hamu angka na tarbuang i, angka naung husuru sian Jerusalem tu Babel.

29:21 Songon on do hata ni Jahowa Zebaot, Debata ni Israel, taringot tu si Ahab, anak ni si Kolaia dohot taringot tu si Sedekia anak ni si Maaslia, * angka na manurirangkon sipaotooto tu hamu marhitehite goarhu: Ida ma, ahu na pasahathon nasida tu bagasan tangan ni si Nebukadnesar raja sian Babel, asa mate dibunu nasida di jolo ni matamuna.

29:22 Jala ingkon buaton sian nasida sada bura di saluhut angka na tarbuang sian Juda, angka na di Babel, songon on: Sai dibahen Jahowa ma tu ho suang songon na tu si Sedekia dohot songon na tu si Ahab, na tinutung ni raja sian Babel di bagasan api.

29:23 Ala naung binahennasida haotoon di Israel, jala marmainan nasida dohot jolma ni dongannasida, jala dihatahon hata sipaotooto marhitehite goarhu, na so hutonahon i tu nasida. Alai ahu do sibotosa jala sitindangisa, ninna Jahowa.

29:24 Jala tu si Semaya isi ni Nehelam i, ingkon dohononmu songon on:

29:25 Boti hata ni Jahowa Zebaot, Debata ni Israel, ala naung tinongosmi angka surat marhitehite goarmu tu saluhut halak angka na di Jerusalem dohot tu malim * Sepania, anak ni si Maaseya dohot tu saluhut angka malim, songon on:

29:26 Nunga dipabangkit Jahowa ho gabe malim singkat ni malim Joiada, asa hamu gabe siramoti joro ni Jahowa mangaranapi ganup * baoa na lalaen dohot na manurirangi, asa bahenonmu ibana tu hurungan dohot tu beangan.

29:27 On pe boasa tung so mangonai hata ho tu si Jeremia isi ni Anatot, na manurirangi tu hamu?

29:28 Ala naung tinongosna i tu hami tu Babel mandok: Laon dope hamu disi. Pauli hamu ma angka bagas jala ingani hamu, jala pungka hamu angka porlak asa panganonmuna parbuena.

29:29 Jadi dijaha malim Sepania ma surat i tu pinggol ni panurirang Jeremia.

29:30 Dung i ro ma hata ni Jahowa tu si Jeremia songon on:

29:31 Suruhon ma suruanmu manopot saluhut angka naung tarbuang paboahon: Songon on do hata ni Jahowa taringot tu si Semaya isi ni Nehelam i: Ala naung manurirangi si Semaya tu hamu, so manang ahu marsuru ibana, jala dipanalom rohamuna marhaposan tu sipaotooto.

29:32 Dibahen i songon on do hata ni Jahowa: Ida ma, marlulu ma ahu dompak si Semaya isi ni Nehelam i dohot dompak pinomparna. Ndang jadi adong di ibana nanggo sahalak, na maringan di tongatonga ni bangso on, jala ndang jadi idaonna na denggan sibahenonku tu bangsongkon ninna Jahowa; ala naung hinatahonna * parbalion sian Jahowa.

Jeremia 30

30:1 On do hata na ro tu si Jeremia sian Jahowa:

30:2 Songon on do hata ni Jahowa, Debata ni Israel: Surathon ma di ho saluhut hata angka naung huhatahon tu ho, tu sada buku.

30:3 Ai ida ma, na ro do angka ari sogot, ninna Jahowa, mulak ma disi * togihononku angka na tarbuang sian bangsongku Israel dohot Juda, ninna Jahowa, jala mulak nasida togihononku tu tano naung hulehon i tu ompunasida, asa nasida nampunasa.

30:4 On do huhut hata, angka naung hinatahon ni Jahowa taringot tu Israel dohot taringot tu Juda.

30:5 Ai songon on do hata ni Jahowa: Hubege hami do soara angguhangguk, hatahutan, jala ndang adong hasonangan.

30:6 Ua sungkunsungkun i jala tangkasi humaliang hamu manang dung do baoa mangae posoposo? Boasa tung huida ganup baoa mangampehon tanganna tu gantingna, * songon inaina na mangae posoposona, jala muba saluhut bohi marlangan?

30:7 Oe jea tonanon! Ai tung na * bolon ari na sasada i, na so adong tudosna, jala tingki hagogotan do i di Jakkob; alai atik pe songon i ingkon paluaon ibana sian i.

30:8 Dung i di ari na sasada i, ninna Jahowa Zebaot, ponggolhononku ma * augana sian tangkuhukmu, jala rapuanku angka tali pangihot na di ho, jala ndang be halak ruar marhatobanhon ibana.

30:9 Ingkon Jahowa Debatanasida i oloannasida dohot * si Daud rajanasida i, sipatindangonku di nasida.

30:10 Alai anggo ho, ale Jakkob naposongki, * unang ho mabiar, ninna Jahowa, jala unang tarsonggot ho, ale Israel; ai ida ma, ahu paluahon ho sogot sian luat na dao dohot pinomparmu sian tano habuangannasida; jala ingkon mulak Jakkob marnalom ni roha jala marsonangsonang, jala ndang adong nanggo sahalak na manonggoti.

30:11 Ai ahu do donganmu, ninna Jahowa, laho paluahon ho; ai sun siap do bahenonku saluhut bangso parbegu haambolonganmu na hubahen i na sai laon, alai anggo ho ndang siap bahenonku; ingkon pinsangonku do ho nian * hombar tu uhum, jala ndang tarbahen so toruanku ho.

30:12 Ai songon on do hata ni Jahowa: * Tung na targisik do bugangmu, jala bernit situtu torutoru na niaemi.

30:13 Ndang adong nanggo sahalak na mangondihon ho di paruhuman laho pauliulihon bugangmi, jala ndang adong taoar pamalumhon bugangmi.

30:14 Nunga dihalupahon saluhut angka alealem ho, ndang usouso nasida di ho, ai harageon ni musu hutonahon tu ho, pinsangpinsang ni halak pangarupa, ala ni godang ni hajahatonmu, tung na so habilangan do angka dosami.

30:15 Boasa tung mangangguhi ho ala ni bugangmu, ala na so hadaonan sahitmu? Binahen ni hinadeak ni hajahatonmu, ala na so habilangan angka dosam umbahen na songon i hubahen tu ho.

30:16 Dibahen i luhut angka na mamondut ho, ingkon bonduton do sogot, jala luhut angka na manosak ho, ingkon rap tarboan nasida sogot tu habuangan, jala halak na mamupusi ho, ingkon pupusan sogot, jala luhut halak na mandobo ho, ingkon pasahatonku doboon ni halak.

30:17 Ai ahu ma * patupahon hahisaron di ho, jala pamalumonku ho sian bugangmu, ninna Jahowa, ala si habuangan goarmu didok halak ale Sion, na so parduli ni halak nanggo sada.

30:18 Songon on do hata ni Jahowa: Ida ma, * mulak ma togihononku angka na tarbuang sian undungundung ni si Jakkob jala marpangulahi rohangku mida angka ingananna; jala ingkon paulion muse huta i di atas dolokna jala bagas parhabangsaan i inganan songon uhumna hian.

30:19 Jala ingkon ruar sian i soara pujipujian dohot soara ni halak na marlas ni roha; ai ahu patorophon sogot nasida, jala ndang jadi moru nasida, jala marmulia nasida bahenonku, jala na so tupa marmetmet nasida.

30:20 Ia anaknasida ingkon songon di na robi do, jala parluhutanna ingkon hot di jolongku, jala marlulu do ahu sogot tu saluhut halak na mangarupa ibana.

30:21 Jala * jujungan ihutanna, ingkon ro sian ibana, jala rajana bangkit sian tongatongana laos ahu pajonokkon ibana, asa jumonok ibana tu ahu, ai tung ise ma na hum sumeahon dirina laho jumonok tu ahu, ninna Jahowa?

30:22 Jadi ingkon hamu gabe bangsongku, jala ahu gabe Debatamuna.

30:23 Ida ma, ruar do sada habahaba sian Jahowa, dohot parpiarpiar ni rimas, sada habahaba poting baliung na mamboan hamagoan, manipa tu ulu ni halak parjahat.

30:24 Ndang tagamon mombun parpiar ni muruk ni Jahowa, nda jolo sahat dibahen jala di hajongjongkon sangkapsangkap ni rohana hian. Di ujung ni angka ari sogot tangkas antusanmuna i!

Jeremia 31

31:1 Di tingki ujungna i, ninna Jahowa, ahu gabe Debata ni saluhut marga ni Israel jala nasida gabe bangsongku.

31:2 Songon on do hata ni Jahowa. Nunga dapotan asi ni roha di halongonan bangso na malua sian podang. Laho ma ahu manogihon Israel tu hasonangan ni rohana.

31:3 Nunga tibu hian diida rohangku Jahowa, ninna ibana do: Haholongon salelenglelengna hubahen mangkaholongi ho, dibahen i hutogutogu ho marhitehite asi ni roha.

31:4 Paulionku dope ho muse, asa tung tipak ho, ale boru Israel, marjagarjagarhon arbabmu do ho muse jala ruar marhalianghaliang rap dohot halak na marlas ni roha.

31:5 Ingkon pungkaonmu dope angka porlak anggur di dolok Samaria, laos halak na umpungkasa manganhon parbuena.

31:6 Ai ro do ari sogot, joujou ma disi halak parjaga di dolok Epraim: Beta ma hita, asa nangkok hita tu Sion mandapothon Jahowa Debatanta!

31:7 Ai songon on do hata ni Jahowa: Marhinsa ni roha ma hamu marsuraksurak mida si Jakkob, jala marolopolop ma hamu mida ihutan ni angka bangso parbegu! Pangiar hamu ma soaramuna mamujimuji jala dok hamu ma: Sai palua ma ale Jahowa bangsom, pasipasi ni Israel!

31:8 Ida ma, ingkon ahu manogihon nasida sian tano na tungkan utara jala ahu papunguhon nasida sian angka ujung ni tano on rap dohot angka na mapitung dohot na pangpang, na gabegabean dohot pangintubu di tongatonganasida. Tung luhutan na bolon do nasida angka na mulak i tuson.

31:9 Ro do nasida tutu huhut tumatangis dohot marhuraja. Ahu ma manogihon nasida tu angka batang aek di dalan na hornop, ndang jala Epraim gabe anak buhabajungku.

31:10 Tangihon ma hata ni Jahowa, hamu ale angka bangso parbegu, jala baritahon hamu ma i di pulopulo angka na dao jala hatahon hamu: Ibana na paserakkon Israel na jolo, laos ibana papunguhon muse jala ramotanna, songon parmahan di punguanna.

31:11 Ai nunga ditobus Jahowa Jakkob i jala nunga dipalua ibana sian tangan ni na gumogo sian ibana.

31:12 Ro do nasida sogot huhut marolopolop di punsu ni Sion jala marrongoman nasida mandapothon denggan basa ni Jahowa: Eme dohot anggur dohot miak dohot anak ni birubiru dohot lombu, jadi tondinasida ingkon songon * porlak na tangkas di aek, jala ndang be mandate nasida.

31:13 Jadi marlas ni roha ma disi namarbaju marhalianghaliang dohot dolidoli ro di angka na tuatua, jadi muba ma arsak nasida gabe las ni roha bahenonku, jala apulonku nasida huhut palashon dung salpu gondokna na sai laon.

31:14 Dung i marlobilobi ma tondi ni angka malim di tabotabo jala bosuran bangsongku marsaulihon denggan basangku, ninna Jahowa.

31:15 Songon on do hata ni Jahowa: * Tarbege do di Rama soara andungandung dohot partangison: Ditatangisi si Rahel anakkonna, ndang olo ibana apulon taringot tu anakkonna i, ai nunga siap nasida.

31:16 Songon on do hata ni Jahowa: Paontok soaram sian partatangison dohot matami sian iluilu, ai adong do upa ali ni hangalutonmu, ninna Jahowa; jala ingkon mulak nasida sian tano ni musu.

31:17 Jala adong do sihirimonmu di ujungna, ninna Jahowa, ingkon mulak angka anakmu tu partaliannasida hian.

31:18 Nunga tangkas hubege Epraim mangandungi songon on: Nunga dipinsang ho ahu, jala olo do ahu pinsangon songon anak ni horbo na so niajar. Sai ho ma paubahon rohangku, asa tung saut muba; ai ho do Jahowa, Debatangku.

31:19 Ai dung muba rohangku, husolsoli ma, jala dung hutanda diringku hutompuk ma gontingku. Maila ma ahu huhut marlangan, ala huusung haurahon ni haposoonki.

31:20 Nda anak hasian si Epraim di ahu? Nda anak hasoloan? Ai manang piga hali pe hatangku dompak ibana, sai * marningot dope ahu di ibana; ala ni * malala do ateatengku taringot tu ibana, ingkon marpangulahi rohangku mida ibana ninna Jahowa.

31:21 Patindang ma di ho angka tanda, bahen di ho angka tiang parningotan, patongon ma roham tu dalan na bolon, dalan naung nidalananmu! Mulak ma ho, ale boru Israel, mulak ma ho tumopot angka hutam on.

31:22 Sadia leleng on sai datdatanmu maotaot, ale boru na marbalik? Ai nunga dijadihon Jahowa pangalaho na imbaru di tano on: Parompuan i mangkaol baoa i.

31:23 Songon on do hata ni Jahowa Zebaot, Debata ni Israel: Dohonon ni halak dope sogot hata on di tano Juda dohot di angka hutana, ia dung mulak angka na tarbuang sian nasida: Sai dipasupasu Jahowa ma ho, ale * inganan ni hatigoran, dolok habadiaon.

31:24 Jala maringan disi sogot Juda dohot saluhut hutana patampaktampak, nang halak paruma, nang halak na mangihutihut mangadu parduaan.

31:25 Ai ahu mangalehon minum * parroha na mandate pola marlobilobi, jala ahu palashon roha ni halak na tarhatos.

ᯀᯤ ᯀᯂᯮ ᯔᯝᯞᯩᯂᯉᯬ᯲ ᯔᯪᯉᯔᯮ᯲ ᯇᯒ᯲ᯒᯬᯂ ᯉ ᯔᯉ᯲ᯑᯖᯩ ᯇᯬᯞ ᯔᯒ᯲ᯞᯬᯅᯪᯞᯬᯅᯪ, ᯐᯞ ᯀᯂᯮ ᯇᯞᯘ᯲ᯂᯉᯬ᯲ ᯒᯬᯂ ᯉᯪ ᯂᯞᯂ᯲ ᯉ ᯖᯒ᯲ᯂᯖᯘᯬ᯲.

31:26 Ala ni tarsunggul ahu jala manaili humaliang, jala lambok di ahu parmodomhu.

31:27 Ida ma, na ro do angka ari sogot, ninna Jahowa, marboni ma bahenonku pinompar ni Israel dohot pinompar ni Juda, boni jolma dohot boni pinahan.

31:28 Jala masa sogot, ia songon i ahu dungo taringot tu nasida laho mambutbut, laho mangaloha, laho mamansingkon dohot laho mangago dohot laho mambahen marhinamago laos songon i ahu dungo sogot taringot tu nasida laho paulihon dohot laho manuan, ninna Jahowa.

31:29 Di angka ari i, ndang be dohonon ni halak: Angka amaama, manganhon parbue ni anggur na asom, gabe ngiluan ia ngingi ni anakna.

31:30 Ingkon ganup baoa tahe mate binahen ni hajahatonna sandiri. Ganup jolma na manganhon parbue ni anggur na asom, ingkon ngingina sandiri tahe ngiluan.

31:31 Ida ma, na ro do angka ari sogot, ninna Jahowa, pungkaonku ma padan na imbaru tu pinompar ni si Israel dohot tu pinompar ni si Juda.

31:32 Ndada songon padan na hubahen i na jolo tu ompunasida, uju na hutangkup tangannasida i laho manogihon nasida ruar sian tano Misir, hape diose nasida do padan na hubahen i, atik pe ahu harajaannasida nian, ninna Jahowa.

31:33 Ai * on do padan sibahenonku tu pinompar ni si Israel, dung salpu angka ari on, ninna Jahowa: ** Lehononku ma patikku tu bagasan ateatenasida jala surathononku do i tu bagasan rohanasida, asa ahu gabe Debatanasida, * jala nasida gabe bangsongku.

31:34 Jadi ndang pe * podaan ni sahalak donganna, manang dohononna tu hahaanggina i songon on: Tanda hamu ma Jahowa! Ai tung saluhut nasida tumanda ahu sogot, tole na metmet, tole na magodang sian nasida, ninna Jahowa, ai * marpamuati do sogot rohangku mida hajahatonnasida i, jala ndang be ingotonku dosanasida i.

31:35 Songon on do hata ni Jahowa, na mangalehon mata ni ari gabe panondang arian, aturan ni bulan dohot angka bintang gabe panondang borngin, ibana manggunsang laut, gabe marhasak angka galumbangna; Jahowa Zebaot do goarna.

31:36 Tung sura * mansohot angka aturan i maradophon ahu, ninna Jahowa, * mansadi ma dohot pinompar ni Israel, unang be targoar bangso di jolongku salelenglelengna.

31:37 Songon on do hata ni Jahowa: Molo tung dapot suhaton angka langit di ginjang, jala dapot dodoon angka ojahan ni tano on di toru, dohot ma ahu mambolongkon sandok pinompar ni si Israel ala ni saluhut na binahennasida, ninna Jahowa.

31:38 Ida ma, na ro do angka ari sogot ninna Jahowa, paulion ma muse disi huta i di Jahowa sian tungkup Hananel sahat ro di harbangan parsuhi.

31:39 Dung i ruar muse tali pangungkur tu jolo sahat ro di robean Gareb, jala mamedu tungkan Goa.

31:40 Tole muse sandok rura ni angka bangke dohot sirabun, ro di saluhut tano pea sahat ro di batang aek Kidron, sahat muse ro di suhi ni harbangan hoda tungkan habinsaran, ingkon badia do i di Jahowa. Na so tupa be lohaon manang segahononhon ro di salelenglelengna.

Jeremia 32

32:1 On do hata na ro tu si Jeremia sian Jahowa, pasampulutaonhon hinarajahon ni si Sedekia, raja sian Juda, i ma pasampuluualutaonhon hinarajahon ni si Nebukadnesar.

32:2 * Uju na ditungkum parangan ni raja sian Babel Jerusalem, alai tarhurung, do ianggo panurirang Jeremia di bilut hurungan na di bagas ni raja sian Juda.

32:3 Tusi do ibana dihurungkon si Sedekia, raja sian Juda huhut mandok: Boasa tung manurirangi ho songon on: Songon on do hata ni Jahowa: Ida ma, * ahu ma pasahathon huta on tu bagasan tangan ni raja sian Babel asa papatuonna.

32:4 Si Sedekia pe raja sian Juda, ndang tagamon malua sian tangan ni halak Kasdim, ingkon ahu pasahathon ibana tu tangan ni raja sian Babel, asa masipangkulingan pamangannasida be jala masiberengan matanasida be.

32:5 Jala boanonna si Sedekia tu Babel, loas disi ibana paima * marlulu ahu tu ibana, ninna Jahowa. Ai marmusu pe hamu dohot halak Kasdim, ndang tagamon marantu hamu.

32:6 Dung i ninna si Jeremia ma: Nunga ro hata ni Jahowa tu ahu songon on:

32:7 Ida ma, na ro ma si Hamamel, anak ni si Sallum, amangtuam, manopot ho mandok songon on: Tuhor ma di ho haumangku, na di Anatot, ai * di ho do uhum partobuson laho manuhor.

32:8 Dung i ro ma si Hamamel, anak ni amangtuangku, hombar tu hata ni Jahowa manopot ahu tu bilut hurungan, jala didok tu ahu: Ua tuhor ma haumangku na di Anatot di tano Benjamin, ai di ho do uhum teanteanan jala di ho do partobuson. Sai tuhor ma i di ho, jadi mamoto ma ahu hata ni Jahowa do i hape.

32:9 Jadi hutuhor ma hauma i sian si Hamamel, anak ni amangtuangku na di Anatot, jala hudasingkon tu ibana perak sampulu pitu hati.

32:10 Dung i husurathon ma hata i tu sada surat jala husahap hubahen huhut angka sitindangi jala hudasing perak i di hatian.

32:11 Dung i hubuat ma surat panurhoron i, naung nirongkom hombar tu adat dohot tu uhum rap dohot surat na tarbungka i.

32:12 Dung i hulehon ma surat panuhoran i tu si Baruk, anak ni si Neria, tubu ni si Maaseia, di adopan ni si Hamamel, amangtuangki, dohot di adopan ni angka sitindangi angka na mambahen tanda tangan di surat panuhoran i di adopan ni saluhut halak Jahudi, angka na hundul di bilut hurungan i.

32:13 Jala hutonai si Baruk di adopannasida songon on:

32:14 Songon on do hata ni Jahowa Zebaot, Debata ni Israel: Buat ma angka suraton, surat panuhoran i tahe, nang sinahap i nang surat na tarbungka i, jala bahen tu bagasan abalabal sian tano takko, asa tung laon tarpeop.

32:15 Ai songon on do hata ni Jahowa Zebaot, Debata ni Israel: Ingkon tuhoron dope sogot angka bagas, angka hauma dohot angka porlak anggur di tano on.

32:16 Jadi dung hulehon surat panuhoran i tu si Baruk, anak ni si Neria, martangiang ma ahu tu Jahowa songon on:

32:17 Iale Tuhan Jahowa, ida ma nunga * dijadihon ho angka langit dohot tano on marhitehite hagogoonmu na godang i dohot marhitehite tanganmu na toltoli, ndang adong * na so tarpatupa ho nanggo sada.

32:18 * Ho do na mambahen asi ni roha tu halak marriburibu jala ho do * mambaloshon hajahaton ni amaama tu ampuan ni anakna angka na di pudinasida. Ho do Debata na sun timbul jala na gogo, Jahowa Zebaot do goarmu.

32:19 * Parsangkap na timbul do ho jala na gogo marpambahenan; ** manatap manonggor do matami mida saluhut dalan ni manisia laho mangalehon tu ganup * hombar tu angka dalanna dohot hombar tu parbue ni pambahenanna.

32:20 Ho do naung mambahen angka tanda dohot halongangan di tano Misir rasirasa sadarion, nang tu Israel, nang tu jolma na asing, jala marbarita goarmu dibahen ho sadarion.

32:21 Jala nunga ditogihon ho bangsom Israel ruar sian tano Misir marhitehite angka tanda dohot halongangan, marhitehite tangan na gogo jala na toltol dohot marhitehite hasonggoton bolon.

32:22 Jala nunga dilehon ho tu nasida tano on na niuarihonmu tu ompunasida lehononmu tu nasida, sada tano na marlobilobi di susu dohot di situak ni loba.

32:23 Jadi dung tolhas nasida tusi jala ditean, gabe ndang ditangihon nasida soaram jala patikmi ndang dipangalahohon nasida; saluhut tahe na tinonahonmu tu nasida sibahenonna nian, ndang dibahen nasida; ala ni dihonahon ho tu nasida saluhut hamagoan on.

32:24 Ida ma, angka salosap nunga tolhas tu huta i laho manoluk, huta i pe nunga sahat tu tangan ni halak Kasdim, angka partungkum i, binahen ni podang, haraparon dohot begu antuk; jala naung nilumbahonmu nunga songgop, ho do marnidasa.

32:25 Hape lam didok ho dope tu ahu, ale Tuhan Jahowa: Tuhor ma di ho hauma i nasa argana jala bahen angka sitindangi! Hape nunga sahat tu tangan ni halak Kasdim ia huta i!

32:26 Dung i ro ma hata ni Jahowa tu si Jeremia songon on:

32:27 Ida ma, ahu do Jahowa, * Debata ni nasa manisia. Tung adong ma tagamon * na so tarpatupa ahu?

32:28 Dibahen i songon on do hata ni Jahowa: Ida ma, ahu pasahathon huta on tu tangan ni halak Kasdim dohot tu tangan ni si Nebukadnesar, raja sian Babel, asa papatuonna.

32:29 Ai masuhan ni halak Kasdim, angka partungkum i ma huta on, jala nahitanna huta on, jala surbuonna ro di bagas, * panutungan daupa di atas tarupna tu Baal jala panguseanna di pelean siinumon tu angka debata sileban, pahehe rimashu.

32:30 Ai anggo halak Israel dohot halak Juda, holan sogo ni rohangku do diulanasida olat ni haposoonna; ai anggo halak Israel sai tong pahehe rimashu, marhitehite pambahenan ni tangannasida, ninna Jahowa.

32:31 Tongon tahe sumunggul rimashu dohot murukku do huta on, olat ni ari dung pinajongjong rasirasa sadarion, umbahen ingkon bolongkononku huta i sian jolongku.

32:32 Ala ni saluhut hajahaton ni halak Israel dohot halak Juda, angka na binahennasida pahehe rimashu, nang nasida, nang rajanasida, induknasida, angka malim dohot panurirang di nasida ro di halak Juda dohot isi ni Jerusalem.

32:33 Nunga pola tangkuhukna, ndada bohina di dompakkon tu ahu; jala atik pe hupasogot mangajari nasida tongtong, ndang ditangihon nasida manang olo manjalo pangajaron.

32:34 Lam dipajongjong nasida ganaganaannasida angka na sogir i tu bagasan bagas naung targoar tu goarhu laho paramunhon.

32:35 Jala dipajongjong nasida angka tambak di Baal, angka na di rura ni anak ni si Hinnom, laho pabolushon anaknasida dohot borunasida sian api marsomba tu ajian Molok, na so dung hutonahon tu nasida, manang tubu di bagasan rohangku bahenonna hasogiron sisongon i, asa mangela Juda mardosa.

32:36 Ala ni umbahen songon on hata ni Jahowa, Debata ni Israel, taringot tu huta on naung nidokmuna i, nunga sahat tarlehon tu tangan ni raja sian Babel marhitehite podang dohot haraparon dohot begu antuk:

32:37 Ida ma, ahu sandiri papunguhon nasida sian saluhut luat haambolongannasida na sai laon binahen ni rimashu dohot murukku dohot binahen ni piripiri godang, jala mulak nasida togihononku tu inganan on, asa marsonangsonang nasida maringan disi.

32:38 Jadi nasida gabe bangsongku, jala ahu gabe Debatanasida.

32:39 Jala ahu mangalehon tu nasida sada roha dohot sada dalan asa marhabiaran tu ahu saleleng arinasida bahen hatuaon di nasida dohot di pinomparnasida sogot.

32:40 Jala ahu mambahen tu nasida padan salelenglelengna, paboa na so tupa be ahu sumurut sian nasida mambahen na denggan tu nasida, jala lehononku do biar mida ahu tu bagasan rohanasida, asa unang be marbalik nasida sian ahu.

32:41 Jadi marlas ni roha ma ahu mida nasida mambahen na denggan tu nasida jala ahu mangalopokkon nasida sogot tu tano on marhitehite habonaron sian nasa rohangku dohot sian nasa tondingku.

32:42 Ai songon on do hata ni Jahowa: Songon naung huparo tu bangso on saluhut jea godangon, suang songon i ahu parohon sogot tu nasida saluhut na denggan naung huparbagabaga i tu nasida.

32:43 Jala ingkon tuhoron dope hauma di tano on naung nidokmuna i: Halongonan do on na so marisi jolma manang pinahan, naung sahat tu tangan ni halak Kasdim.

32:44 Tuhoron dope tongon angka hauma marhitehite hepeng jala bahenonna do surat laos sahaponna dohot mambahen sitindangi di tano Benjamin dohot humaliang Jerusalem dohot di bagasan angka huta ni Juda dohot di bagasan huta angka na di dolok dohot di bagasan huta angka na di pea dohot di bagasan huta angka na tungkan dangsina; ai * mulak do togihononku angka na tarbuang sian nasida, ninna Jahowa.

Jeremia 33

33:1 Dung i ro ma hata ni Jahowa tu si Jeremia paduahalihon * di na tarhurung dope ibana di bilut hurungan i, ninna do:

33:2 Songon on do hata ni Jahowa na pasintongkon bagabagana i, Jahowa na manjadihonsa laho pasunhon, Jahowa do goarna!

33:3 Joujou ma ho tu ahu, asa hualusi ho, asa hupabotohon tu ho hata angka na bolon dohot na songkal, angka na so binotomi.

33:4 Songon on do hata ni Jahowa, Debata ni Israel, taringot tu angka * bagas ni huta an dohot taringot tu angka bagas ni angka raja sian Juda angka naung niloha on bahen partanobatoan dompak angka salosap dohot dompak angka podang.

33:5 Adong pe jolma masuk tu bagasan laho marmusu dompak halak Kasdim, asa gohanna angka i dohot bangke ni jolma, angka naung hubunu di bagasan murukku dohot di bagasan rimashu, ala naung hupadao bohingku sian huta on binahen ni saluhut hajahatonnasida.

33:6 Ida ma, ahu sandiri pahehehon tu nasida hahisaron dohot hamalumon, jala pamalumonku nasida, jala ahu papatarhon tu nasida hadameon dohot habonaron mardapotdapot.

33:7 Jala ahu * manogihon mulak angka na tarbuang i sian Juda dohot angka na tarbuang i sian Israel, jala ahu pahothon nasida suang songon di mulana.

33:8 Jala ahu mangurasi nasida sian saluhut hajahatonnasida i, na mardosai nasida dompak ahu, jala * marpamuati rohangku di saluhut hajahatonnasida i, na mardosai nasida dompak ahu, jala na niosenasida i ahu.

33:9 Jala ingkon gabe barita silas ni rohangku huta i, bahen pujipujian dohot bahen hamuliaon maradophon saluhut bangso parbegu di tano on, angka na umbege saluhut na denggan na hubahen i tu nasida, jadi tarsonggot jala angka hitir nasida mida saluhut na denggan dohot mida saluhut huta on na hubahen i tu nasida.

33:10 Songon on do hata ni Jahowa: Tarbege dope sogot di inganan on, naung nidokmuna i: Nunga tarulang, ndang be marisi jolma nanggo sahalak manang pinahan, di bagasan angka huta ni Juda dohot di alaman ni Jerusalem, angka naung tarulang i, ndang be marisi jolma nanggo sahalak manang pinahan.

33:11 * Tarbege dope sogot disi soara olopolop dohot soara las ni roha, soara ni pangoli dohot soara ni oroan, soara ni angka na mandok: * Puji ma Jahowa Zebaot, ai pardengganbasa do Jahowa, ai ro di saleleng ni lelengna do asi ni rohana! Tole muse soara ni halak na mamboan pelean hamauliateon tu joro ni Jahowa; ai ahu ma manogihon mulak sogot halak angka na tarbuang sian tano on, gabe suang songon di mulana, ninna Jahowa.

33:12 Songon on do hata ni Jahowa Zebaot: Adong dope sogot di inganan on, na tarulang nuaeng, so marisi jolma nanggo sahalak manang pinahan, jala di bagasan saluhut hutana adong muse pondokpondok ni parmahan, angka na paulon birubiruna disi.

33:13 Tole * di bagasan huta angka na di dolok, tole di bagasan huta angka na di pea dohot di bagasan huta angka na tungkan dangsina dohot di tano Benjamin dohot humaliang Jerusalem dohot di bagasan angka huta ni Juda, mamolus dope sogot birubiru angka na niadu ni halak na mamilangi, ninna Jahowa.

33:14 Ida ma, na ro do angka ari sogot, ninna Jahowa, ahu ma pasintongkon disi hata na denggan i naung huparbagabaga i taringot tu pinompar ni Israel dohot taringot tu pinompar ni Juda.

33:15 Di angka ari i dohot di tingki i ahu ma patubuhon di si Daud sada tumbur hatigoran, ibana ma mangkajongjongkon uhum dohot hatigoran di tano on.

33:16 Di angka ari i ma dapotan tua Juda jala * marsonangsonang isi ni * Jerusalem maringanan, jala on do goarna dohonon ni halak: Jahowa parpintoranta.

33:17 Ai songon on do hata ni Jahowa: Na so tupa tos sian si Daud baoa na hundul di habangsa ni pinompar ni si Israel.

33:18 Angka malim pe dohot halak Lepi na so tupa tos sian adopanku baoa angka na mamelehon pelean situtungon dohot na manutung pelean sipanganon dohot na marhobas pelean sipotongon ariari.

33:19 Dung i ro muse ma hata ni Jahowa tu si Jeremia ninna do:

33:20 Songon on do hata ni Jahowa: Tung sura mansohot bahenonmuna aturan na hubahen i taringot tu arian dohot taringot tu borngin, gabe ndang be masa arian dohot borngin di tingkina be.

33:21 Mansadi ma dohot padanhu tu si Daud naposongki, ndang adong be di ibana anak na bangkit raja hundul di habangsana, mansohot dohot tu halak Lepi, nang tu angka malim, angka na marhalado di ahu.

33:22 Songon * parangan angka na lohot di langit, angka na so tarbilang dohot horsik ni laut na so hasuhatan, suang songon i do patoroponku pinompar ni si Daud naposongki dohot halak Lepi angka parhalado di ahu.

33:23 Dung i ro muse hata ni Jahowa tu si Jeremia songon on:

33:24 Atehe ndang diparateatehon ho na nidok ni bangso on: Na dua marga na pinillit ni Jahowa hian, nunga dibolongkon muse? Jadi marhu ni roha nasida mida bangsongku, hira na so bangso be bilangan di rohanasida.

33:25 Songon on do hata ni Jahowa: Tung sura sohot padan na hubahen i taringot tu arian dohot borngin, sohot dohot aturan na hubahen i taringot tu patikpatik tu langit dohot tano on.

33:26 Ambolong ma bahenonku dohot pinompar ni si Jakkob dohot si Daud, naposongki, asa unang be buaton sian pinomparna bahen pangarajai di pinompar ni si Abraham, si Isak dohot si Jakkob. Ai * mulak do togihononku angka na tarbuang sian nasida, jala marpangulahi rohangku mida nasida.

Jeremia 34

34:1 On do hata na ro tu si Jeremia sian Jahowa, uju si Nebukadnesar, raja sian Babel, ro di sandok paranganna dohot saluhut harajaon ni tano on na masuk tu gomgomanna ro di saluhut bangso, marporang dompak Jerusalem dohot dompak saluhut hutana, ninna do:

34:2 Songon do hata ni Jahowa, Debata ni Israel: Laho ma ho, jala lumbahon tu si Sedekia raja ni Juda, jala dok ma tu ibana: Songon on do hata ni Jahowa: Ida ma, ahu ma pasahathon huta on tu tangan ni raja sian Babel, asa surbuonna dohot api.

34:3 Ho pe ndang tagamon malua sian tanganna, ingkon tartangkup ho jala sahat tu tanganna, jala * adop mata be masiberengan ho dohot raja sian Babel, jala pamanganna tu pamanganmu mangkatai jala ingkon tarboan ho tu Babel.

34:4 Alai tangihon huhut hata ni Jahowa, ale Sedekia, raja ni Juda! Songon on do hata ni Jahowa taringot tu ho: * Ndang mate ho ianggo marhitehite podang.

34:5 Ingkon marsonangsonang ho mate, jala songon na binahenna tu angka ompumu, angka raja di na robi, angka na jumolo sian ho, suang songon i * tutungonna pamurunan pasangap ho, jala * andunganna ho: Iale Tuhan! Ai i do hata na hulumbahon hian, ninna Jahowa.

34:6 Jadi dipatolhas panurirang Jeremia ma saluhut hata i tu si Sedekia, raja ni Juda di Jerusalem.

34:7 Uju parangan ni raja sian Babel marmusu * dompak Jerusalem dohot dompak saluhut huta ni Juda angka na teba i, dompak Lakis dohot dompak Azeka ai i do na teba sian huta ni Juda angka na gantingi.

34:8 On do hata na ro tu si Jeremia sian Jahowa, dung dibahen raja Sedekia parjanjian tu sandok bangso i na di Jerusalem maningtingkon tu nasida haluaon.

34:9 Ingkon ganup paluahon naposona baoa dohot naposona boruboru, marga Heber, asa unang adong manang ise na marhatobanhon donganna Jahudi.

34:10 Jadi mangoloi be ma saluhut induk dohot sandok bangso i angka na masuk tu parjanjian i, ganup do paluahon naposona baoa dohot naposona boruboru, asa unang be diparhatoban nasida; mangoloi be ma tutu nasida paluahon.

34:11 Alai hosing muse rohanasida, laos mulak muse diboan angka naposo baoa dohot parompuan, angka naung pinaluana i, jala dipaksa nasida muse gabe naposo baoa dohot parompuan.

34:12 Ala ni ro muse ma hata ni Jahowa tu si Jeremia, ninna do:

34:13 Songon on do hata ni Jahowa, Debata ni Israel: Nunga ahu mambahen sada parpadanan tu ompumuna, uju ahu manogihon nasida ruar sian tano Misir, sian bagas pangadopan, songon on:

34:14 Ganup papitutaonhon, ingkon ganup hamu paluahon donganna marga Heber, naung manggadishon dirina tu ho; ingkon onom taon lelengna pangulahononna ho, dung i paluaonmu boti ibana sian lambungmu. Hape ndang ditangihon ompumuna ahu jala ndang ditarehon pinggolna.

34:15 Alai nunga muba ianggo rohamuna sadarion, jala nunga dibahen hamu na sintong di rohangku, naung ditingtingkon hamu haluaon ganup tu donganna, jala naung dibahen hamu parpadanan di jolongku di bagasan bagas na targoar tu goarhu.

34:16 Alai nunga hosing muse rohamuna, gabe diramuni hamu goarhu, jala mulak diboan hamu ganup naposona baoa dohot naposona boruboru, angka naung pinaluamuna boti marguru tu rohanasida gabe marhata ingkon hamu tu nasida sumuang gabe naposomuna baoa dohot parompuan muse.

34:17 Dibahen i songon on do hata ni Jahowa, ndang ditangihon hamu ahu laho maningtingkon haluaon ganup tu donganna dohot tu pedanna. Ida ma ahu ma maningtingkon haluaon tu hamu, ninna Jahowa, mandokkon ro podang, begu antuk dohot haraparon, jala ahu pasahathon hamu gabe siruparupaon ni saluhut harajaon di tano on.

34:18 Jala ahu pasahathon baoa, angka na mangalaosi padan na hubahen i, angka na so mangkajongjongkon hata ni padani, naung binahennasida i di jolongku, gabe doshon anak ni lombu naung bola dua binahennasida i, jala * mamolus nasida sian tongatonga ni ponggolponggolna i:

34:19 Tole angka induk ni Juda dohot angka induk ni Jerusalem, tole muse angka partohonan di jabu ni rajai dohot angka malim ro di sandok bangso ni tano i, angka na mamolus sian tongatonga ni anak ni lombu i.

34:20 Tongon do, pasahatonku ma nasida tu tangan ni musunasida dohot tu tangan ni halak na tumahi hosanasida, jala * bangkenasida ingkon gabe sipanganon ni pidong angka na martongatonga langit dohot binatang na di harangan.

34:21 Si Sedekia pe raja sian Juda dohot induk angka na pinabangkitna i pasahatonku ma tu tangan ni musunasida dohot tu tangan ni halak na tumahi hosanasida dohot tu tangan ni parangan ni raja sian Babel, angka naung muli nian sian hamu.

34:22 Ida ma, ahu do martona, ninna Jahowa, jala ahu * manogihon nasida mulak mandopang huta on, gabe musuanna jala tabanonna jala surbuonna dohot api; angka huta di Juda pe tarulang do bahenonku, asa unang adong be pangisina.

Jeremia 35

35:1 On do hata na ro tu si Jeremia sian Jahowa, uju di angka ari ni si Joiakim; anak ni si Josia, raja sian Juda, songon on:

35:2 Laho ma ho tu * bagas ni pinompar ni si Rekab mangkatai dohot nasida, jala togihon nasida tu joro ni Jahowa tu sada sian angka bilut i jala lehon tu nasida tuak anggur inumonna.

35:3 Jadi huboan ma si Jaasmia, anak ni si Jeremia, tubu ni si Habassinia ro di angka hahaanggina dohot saluhut anakna dohot sandok pinompar ni si Rekab.

35:4 Dung i hutogihon nasida tu bagasan joro ni Jahowa, tu bagasan bilut ni angka anak ni si Hanan, tubu ni si Igdalit halak ni Debata, na di lambung ni bilut ni angka induk, di ginjang ni bilut ni si Maaseia, anak ni si Sallum, sijaga lobulobu.

35:5 Dung i hupeakhon ma di jolo ni angka anak ni pinompar ni si Rekab angka panginuman gok marisi tuak anggur dohot angka supak, laos hudok ma tu nasida: Minum angggur ma hamu!

35:6 Alai ninna angka nasida ma: Ndang tagamon minum anggur hami, ai tona ni * si Jonadab, anak ni si Rekab amanami tu hami songon on: Unang hamu minum anggur, nang anakmuna ro di salelenglelengna!

35:7 Jala unang hamu pauli bagas, manang manaburhon boni, manang umpungka porlak anggur pe, manang umpeop angka sisongon i; ingkon maringan hamu di undungundung saleleng hamu mangolu, asa leleng hamu mangolu di tano paisolatanmunai.

35:8 Jadi huoloi hami ma soara ni si Jonadab, anak ni si Rekab, amanami, taringot tu saluhut na tinonahonna tu hami, ndang dung minum anggur hami, saleleng mangolu, nang hami, nang jolmanami nang anaknami, nang borunami.

35:9 Jala ndang hupauli hami angka bagas bahen inganannami, porlak anggur pe manang hauma, manang boni ndang adong di hami.

35:10 Maringan di undungundung do hami tahe, huoloi hami jala hubahen hami do hombar tu saluhut na tinonahon ni si Jonadab, amanami, tu hami.

35:11 Alai dung nangkok si Nebukadnesar, raja sian Babel manola tano on gabe hudok hami ma: Beta hita laho tu Jerusalem maradophon parangan ni halak Kasdim dohot maradophon parangan ni halak Ram, gabe maringan di Jerusalem hami nuaeng.

35:12 Dung i ro muse ma hata ni Jahowa tu si Jeremia, ninna do:

35:13 Songon on do hata ni Jahowa Zebaot Debata ni Israel: Laho ma ho jala sungkunhon ma tu halak Juda dohot tu isi ni Jerusalem: Atehe ndang olo hamu manjalo pangajaron laho tumangihon angka hatangku? ninna Jahowa.

35:14 Gari hata ni si Jonadab, anak ni si Rekab, angka na tinonahonna tu anakna, asa unang nasida minum anggur, dihajongjongkon nasida do; ai rasirasa sadarion ndang dung nasida minum anggur, ai ditangihon nasida do tona ni amanasida i. Alai anggo ahu tibu hian do hudok hatangku tu hamu, alai ndang ditangihon hamu ahu.

35:15 Hupansuruhon muse tu hamu saluhut naposongku, angka panurirang i, tibu hian hudatdati marsuru mandok tu hamu: Sai * mulak ma hamu ganup sian dalanna na jahat i jala padenggan hamu angka pambahenanmuna i, jala unang hamu mangihuthon angka debata sileban laho marsomba tusi, asa hot hamu di tano na hubasabasahon tu hamu dohot tu ompumuna. Alai ndang ditarehon hamu pinggolmuna jala ndang ditangihon hamu ahu.

35:16 Ala na hinajongjongkon ni angka anak ni si Jonadab, anak ni si Rekab tona ni amanasida i, na tinonahonna tu nasida, hape anggo bangso on ndang ditangihon ahu.

35:17 Dibahen i songon on do hata ni Jahowa, Debata Zebaot, Debata ni Israel: Ida ma, ahu parohon tu Juda dohot tu saluhut isi ni Jerusalem sandok jea naung hulumbahon hian tu nasida, ala na * hudok hatangku tu nasida, hape ndang ditangihon nasida, jala hujou do nasida hape ndang olo nasida mangalusi.

35:18 Alai anggo tu pinompar ni si Rekab didok si Jeremia do: Songon on do hata ni Jahowa Zebaot, Debata ni Israel: Ala na tinangihonmuna tona ni si Jonadab, amamuna i, jala diradoti hamu saluhut tonana, jala dipatupa hamu saluhut hombar tu na tinonahonna tu hamu.

35:19 Dibahen i, songon on do hata ni Jahowa Zebaot, Debata ni Israel: Na so tupa tos adong baoa di si Jonadab, anak ni si Rekab jongjong marhalado tongtong di jolongku.

Jeremia 36

36:1 Dung i * paopattaonhon hinarajaon ni si Joiakim, anak ni si Josia raja sian Juda, ro ma hata on tu si Jeremia sian Jahowa.

36:2 Buat ma di ho sabalunan laklak, jala surathon ma tusi saluhut hata, angka na huhatahon tu ho taringot tu Israel, taringot tu Juda dohot taringot tu saluhut bangso parbegu, olat ni ari dung ahu mangkatahon tu ho, olat ni angka ari ni si Josia rasirasa sadarion.

36:3 * Anggiat tung ditangihon pinompar ni si Juda saluhut jea na husangkap bahenonku tu nasida, asa anggiat mulak nasida ganup sian dalanna na jahat i, jala marpamuati rohangku mida hajahatonnasida dohot mida dosanasida i.

36:4 Jadi dijou si Jeremia ma * si Baruk, anak ni si Neria. Dung i disurathon si Baruk ma, diaturhon si Jeremia saluhut hata ni Jahowa, angka na pinaboana tu ibana, tu sada balunan laklak.

36:5 Dung i ditonahon si Jeremia ma tu si Baruk songon on: Tarsabat do anggo ahu, ndang tarbahen ahu bongot tu joro ni Jahowa.

36:6 Dibahen i ho ma laho tusi manjaha hata ni pustaha i, na sinurathonmu, angka na huaturhon i, i ma angka hata ni Jahowa tu pinggol ni bangso i di bagasan joro ni Jahowa jumpa ari puasa, nang tu pinggol ni saluhut halak Juda, angka na ro sian hutana be, ingkon jahaonmu do i.

36:7 * Anggiat tung sahat tangiangnasida tu jolo ni Jahowa, asa mulak nasida ganup sian dalanna na jahat i, ai tung na balga do muruk dohot rimas, naung nilumbahon ni Jahowa tu bangso on.

36:8 Jadi dibahen si Baruk, anak ni si Neria ma, hombar tu saluhut na tinonahon ni panurirang Jeremia tu ibana, dijaha ma sian buku i angka hata ni Jahowa di bagasan joro ni Jahowa.

36:9 Dung i palimataonhon hinarajahon ni si Joiakim, anak ni si Josia, raja sian Juda, di bulan sipahasia, ditingtingkon ma sada ari parpuasaon di jolo ni Jahowa tu sandok bangso di Jerusalem dohot tu sude angka na ro sian angka huta ni Juda tu Jerusalem.

36:10 Jadi dijaha si Baruk ma sian buku i angka hata ni si Jeremia, di bagasan joro ni Jahowa, di bilut ni si Gemaria, anak ni si Sapan, juaratulis i di alaman parjulu, di pintu na imbaru di joro ni Jahowa, asa saluhut situan na torop i umbegesa.

36:11 Jadi dung dibege si Mikha, anak ni si Gemaria, tubu ni si Sapan saluhut hata ni Jahowa sian buku i.

36:12 Tuat ma ibana tu bagas ni rajai, boti tu bilut ni juaratulis, tongon hundul disi saluhut induk: si Elisama juaratulis i, si Delaia, anak ni si Semaya, si Elnatan anak ni si Akbor, si Gemaria anak ni si Sapan dohot si Sedekia, anak ni si Hanania ro di saluhut angka induk i.

36:13 Jadi dibaritahon si Mikha ma tu nasida saluhut hata, angka na binegena uju jinaha ni si Baruk sian buku i tu pinggol ni na torop i.

36:14 Dung i luhut angka induk i marsuru si Jehudi, anak ni si Netania tubu ni si Selemia, tubu ni si Etiopia manopot si Baruk mandok songon on: Pustaha na jinahami tu pinggol ni situan na torop i ingkon boanonmu tuson. Jadi diboan si Baruk, anak ni si Neria ma pustaha i di tanganna mandapothon nasida.

36:15 Dung i didok nasida ma tu ibana: Ua hundul ma ho jala jaha hata i tu pinggolnami. Jadi dijaha si Baruk ma tu pinggolnasida.

36:16 Jadi dung dibege nasida saluhut hata i, tarsonggot ma nasida huhut masiberengan, angka didok ma tu si Baruk: Ingkon pabotohononnami saluhut hata i tu rajai.

36:17 Laos disungkun nasida ma si Baruk i: Sai paboa ma tu hami manang songon dia panurathonmu di saluhut hata i sian pamanganna?

36:18 Jadi ro ma alus ni si Baruk tu nasida: Pamanganna mangaturhon tu ahu hata i luhut, gabe husurathon tu buku i dohot maksi.

36:19 Dung i ninna angka induk i ma tu si Baruk: Laho ma ho martabuni rap dohot si Jeremia, asa unang diboto manang ise ingananmuna i.

36:20 Dung i bongot ma nasida tu emper ni bagas ni rajai; alai anggo pustaha i nunga dipajop hian di bilut ni si Elisama, juaratulis i, gabe dipabotohon ma tu rajai hata i luhutna.

36:21 Dung i disuru rajai ma si Jehud i mangalap pustaha i. Saut ma diboan ibana pustaha i sian bilut ni si Elisama, juaratulis i, laos dijaha si Jehudi do tu pinggol ni rajai dohot tu pinggol ni saluhut induk angka na jongjong di lambung ni rajai.

36:22 Alai hundul do ianggo rajai di bagasan jabuna tongon partaonan ngali, di bulan sipahasia, jala pansusuduan di jolona marsigorgor.

36:23 Ia dung tolhas dijaha si Jehudi tolu lompit manang opat, jalo diseati dohot raut pangarit jala direongkon tu api na di pansusuduan i, paima suda sandok pustaha i dipangan api na di pansusuduan i.

36:24 Ndang adong manang ise pola tarsonggot alani, jala * ndang disansani pangkeanna, nang rajai, nang saluhut naposona, angka na umbege saluhut hata i.

36:25 Pola diparrajarajai si Elnatan, si Delaia dohot si Gemaria rajai, asa unang dipurun nian pustaha i, alai ndang ditangihon rajai hatanasida i.

36:26 Lam didokkon rajai Jerahmeel, anak ni rajai, dohot si Seraia, anak ni si Asriel, dohot si Selemia, anak ni si Abdiel asa ditangkup si Baruk juaratulis i dohot panurirang Jeremia. Alai nunga ditabunihon Jahowa nasida na dua i.

36:27 Dung i ro muse ma hata ni Jahowa tu si Jeremia, dung sun dipurun rajai balunan i ro di * hata angka na sinurathon ni si Baruk niaturhon ni si Jeremia, mandok songon on.

36:28 Ulahi ma buat di ho balunan na asing sada jala surathon tusi saluhut angka hata parjolo i, angka na di balunan parjolo i, naung pinurun ni si Joiakim raja sian Juda.

36:29 Jala taringot tu Joiakim raja sian Juda, dohononmu ma: Songon on do hata ni Jahowa: Nunga tung dipurun ho balunan i, nimmu do: Boasa tung surathononmu tusi: * Ingkon ro sogot raja sian Babel, jala agoonna tano on, jala * pansingkononna sian i jolma ro di pinahan?

36:30 Dibahen i songon on do hata ni Jahowa taringot tu si Joiakim raja sian Juda: Ndang adong pinomparna nanggo sahalak na tau hundul di habangsa ni si Daud; jala ingkon * ambolong bangkena, dadangon ni ari arian jala hona ngali ni ari bornginna i.

36:31 Jala luluhononku tu ibana dohot tu pinomparna dohot tu angka naposona hajahatonnasida i, jala paroonku tu nasida dohot tu isi ni Jerusalem dohot tu baoa angka sian Juda saluhut jea angka naung hulumbahon hian tu nasida, hape ndang ditangihon nasida.

36:32 Dung i dibuat si Jeremia ma sada balunan na asing jala dilehon tu si Baruk, anak ni si Neria, juaratulis i; disurathon ibana muse tusi niaturhon ni si Jeremia saluhut hata ni pustaha i naung pinurun ni si Joiakim, raja sian Juda di bagasan api, jala ditambai dope tusi torop hata sisongon i.

Jeremia 37 :

37:1 Jadi bangkit raja ma si Sedekia anak ni si Josia bahen ganti ni si Jekonya, anak ni si Joiakim, na pinabangkit ni si Nebukadnesar, raja sian Babel, gabe raja di tano Juda.

37:2 Alai nang ibana, nang angka naposona, nang isi ni luat i, ndang ditangihon nasida hata ni Jahowa, angka naung nilumbahonna marhitehite panurirang Jeremia.

37:3 Jadi disuru raja Sedekia ma si Jukhal, anak ni si Selemia dohot malim Sepania, anak ni si Maaseia, manopot panurirang Jeremia mandok songon on: Ua * tangiangkon ma hami tu Jahowa Debatanta i.

37:4 Alai marneang muli dope si Jeremia uju i di tongatonga ni situan na torop, jala ndang dope ibana dipamasuk tu hurungan.

37:5 Alai nunga borhat parangan ni Firaun sian Misir; jadi dung dibege halak Kasdim angka na martungkum Jerusalem barita i, muli boti ma nasida sian Jerusalem.

37:6 Dung i ro ma hata ni Jahowa tu panurirang Jeremia ninna do:

37:7 Songon on do hata ni Jahowa, Debata ni Israel: Songon on do dohononmuna tu raja ni Juda, na marsuru hamu manungkunhon tu ahu: Ida ma, parangan ni Firaun, naung borhat manumpak hamu nian, mulak do i tu Misir tanona i.

37:8 Alai ulahan ni halak Kasdim ma ro marmusu dompak huta on, jala tabanonna laos surbuonna dohot api.

37:9 Songon on do hata ni Jahowa: Unang paotooto hamu rohamuna sandiri mandok songon on: Laos muli situtu nama halak Kasdim sian hami; hape ndang tutu nasida muli.

37:10 Ai tung sura pe naung dibunu hamu sandok parangan ni halak Kasdim angka na marmusu dompak hamu, hape tading sian nasida baoa angka na mabugang, ganup di undungundungna be, sai na hehe do nasida jala surbuonna huta on dohot api.

37:11 Jadi dung muli parangan ni halak Kasdim sian Jerusalem maradophon parangan ni Firaun.

37:12 Jadi ruar ma si Jeremia sian Jerusalem, naeng laho tu tano Benjamin nian, asa disi marpartalian di tongatonga ni situan na torop.

37:13 Jadi dung sahat ibana tu harbangan Benjamin, adong ma disi sada induk ni parhal na margoar si Jeria, anak ni si Selemia, tubu ni si Hanania; i ma manangkup panurirang Jeremia, ninna ma: Naeng bali tu halak Kasdim do ho!

37:14 Alai ninna si Jeremia ma mangalusi: Gasa do i, ndang naeng bali ahu tu halak Kasdim; alai ndang ditangihon ibana hatana i, lam ditangkup si Jeria do si Jeremia, laos diboan ibana tu jolo ni angka induk.

37:15 Jadi tarrimas situtu ma angka induk i mida si Jeremia, pola * dilinsingi nasida ibana jala dibahen ibana tu hurungan na di bagas ni si Jonatan, juaratulis i, ai ido bagas hurungan dibahen nasida.

37:16 I ma dalanna umbahen, masuk si Jeremia tu hurungan, tu angka bilut partoru, gabe nania leleng Jeremia hundulhundul disi.

37:17 Dung i disuru raja Sedekia ma suruanna mangalap ibana, jala marsibuni rajai manungkun ibana di bagasan jabuna, ninna ma: Atehe, adong do hata sian Jahowa? Jadi ninna si Jeremia ma: Adong do! Laos didok ma: * Sai na sahat do ho tu tangan ni raja sian Babel.

37:18 Dung i ninna si Jeremia muse ma tu raja Sedekia: Aha do dosangku dompak ho manang dompak angka naposom, manang dompak bangso on, umbahen dipamasuk hamu ahu tu hurungan?

37:19 Jala didia do panurirangmuna angka na manurirangkon tu hamu songon on: Tung na so tagamon ro raja sian Babel dompak hamu manang dompak tano on?

37:20 On pe, ua tangihon ale rajanami! Sai sahat ma pangidoanku tu jolomi, jala unang mulak ahu bahen tu jabu ni si Jonatan juaratulis i, asa unang mate ahu disi.

37:21 Jadi didokkon raja Sedekia ma jagaonnasida * si Jeremia di bagasan emper ni parhalan, jala dilehon tu ibana sada roti ganup ari sian alaman ni tukang roti, paima suda saluhut roti ni huta i. Laos tading anggo si Jeremia di emper ni parhalan i.

Jeremia 38

38:1 Alai sanga dibege si Sepatia, anak ni si Matan dohot si Gedalia anak ni si Pashur dohot si Jukhal anak ni si Selemia dohot si * Pashur, anak ni si Malkia do saluhut hata, angka na hinatahon ni si Jeremia tu saluhut situan na torop i, ninna do:

38:2 Songon on do hata ni Jahowa: Manang ise na tading di huta on, ingkon mate ibana marhitehite podang, haraparon manang begu antuk; alai manang ise na ruar mandapothon halak Kasdim, mangolu ma ibana, jala di ibana hosana hira tabantabanna, gabe mangolu.

38:3 Ai songon on do hata ni Jahowa: Ingkon sahat huta on tu tangan ni parangan ni raja sian Babel, jala papatuonna.

38:4 Jadi ninna angka induk i ma tu rajai: Ua binunu ma baoa on, ai daukdauk do binahenna i tangan ni halak parporang, angka na tading di huta on, ro di tangan ni sandok situan na torop i, di na hinatahonna tu nasida angka hata sisongon i. * Ai ndada hasonangan ni bangso on na niluluan ni baoa i, hamagoanna i do.

38:5 Alai ninna raja Sedekia ma: Ida ma, di bagasan tanganmuna do ibana, ai ndang tarbahen rajai manang aha mangalo hamu.

38:6 Dung i dibuat nasida ma si Jeremia; jala didabuhon ibana tu bagasan godung ni si Malkia, anak ni rajai, na di alaman ni parhalan i, jala ditantan nasida si Jeremia dohot tali tu toru. Alai ndang adong aek di bagasan godung i gambo sambing do, gabe lonsot si Jeremia tu bagasan gamboi.

38:7 Jadi dung dibege * si Ebedmelek, marga Kus halak naposo di bagasan jabu ni rajai, naung pinaijur nasida si Jeremia tu bagasan godung.

38:8 Jadi ruar ma si Ebedmelek sian bagas ni rajai, jala ninna ma tu rajai songon on:

38:9 Ale tuan rajanami! Na jahat do pambahen ni angka halak on di saluhut na binahennasida tu panurirang Jeremia na nidabuna i ibana tu bagasan godung; ingkon mate anturaparon ibana disi, ai ndang adong be roti di huta i.

38:10 Alai didokkon rajai ma si Ebedmelek, marga Etiopia, arahononna tolupulu halak bahen donganna, asa enetonna panurirang Jeremia sian godung i tu ginjang, tagan so mate dope ibana.

38:11 Jadi diarahon si Ebedmelek ma angka baoa i bahen donganna jala bongot ibana tu jabu ni rajai tu toru ni bilut parugasanan jala dibuat sian i angka sigundal dohot ulos na maribak, jala ditantan tu si Jeremia tu bagasan godung i marhite angka tali.

38:12 Dung i ninna si Ebedmelek, marga Etiopia ma tu si Jeremia: Ua lapikkon ma angka sigundal i dohot ulos na maribahi tu toru ni gedekgedekmu, bahen lapik ni angka tali; jadi dibahen si Jeremia ma songon i.

38:13 Jadi dienet nasida ma si Jeremia dohot tali sian godung i tu ginjang; laos tading do si Jeremia di alaman ni parhalan i.

38:14 Dung i disuru raja Sedekia ma suruanna mangalapi panurirang Jeremia tu lambungna, tu pintu haroroan patoluhon na di joro ni Jahowa. Dung i didok rajai ma tu si Jeremia: Adong do hata sada naeng sungkunonku tu ho, unang tung porso tu ahu agia aha.

38:15 Jadi ninna si Jeremia ma mangalusi si Sedekia: Molo hupaboa tu ho, ndatung bunuonmu ahu? Jala molo marsipaingot tu ho, ndang tagamon tangihononmu ahu.

38:16 Dung i marmangmang ma raja Sedekia tu si Jeremia di sihabunian, ninna ma: Songon sintongna mangolu Jahowa, na jumadihon tondinta i, na so tupa bunuonku ho, manang * pasahatonku ho tu tangan ni halak on, angka na tumahi hosam.

38:17 Dung i ninna si Jeremia ma tu si Sedekia: Songon on do hata ni Jahowa Zebaot, Debata ni Israel: Tung sura ruar ho mandapothon angka induk pinabangkit ni raja sian Babel, mangolu ma hosam, huta on pe ndang surbuonna dohot api, jala mangolu ma ho dohot isi ni bagasmu.

38:18 Alai molo so ruar ho mandapothon induk angka na pinabangkit ni raja sian Babel, sai na sahat do huta on tu tangan ni halak Kasdim jala surbuonna dohot api, jala ndang tagamon malua ho sian tangannasida.

38:19 Dung i ninna raja Sedekia ma tu si Jeremia: Mabiar do ahu mida halak Jahudi angka naung bali tu halak Kasdim, atik tung pasahatonna ahu tu tangannasida, gabe eleselesonnasida ahu maon.

38:20 Jadi ninna si Jeremia ma: Ndang tagamon pasahatonnasida ho. Sai tangihon ma soara ni Jahowa taringot tu naung hudok tu ho, asa marsonangsonang ho jala mangolu hosam.

38:21 Alai molo tung manjua ho ruar, hata on do huhut naung pinapatar ni Jahowa tu ahu.

38:22 Ida ma, saluhut parompuan angka na tinggal dope di bagasan jabu ni raja sian Juda, ingkon togihononhon tu balian mandapothon induk angka na pinabangkit ni raja sian Babel, gabe dohononnasida ma: Nunga dipaotooto jala nunga dipatunduk angka * baoa hasudungan ni roham ho; nunga lonsot tu bagasan gambo patmu, gabe manginsurut tu pudina sida.

38:23 Jala saluhut angka jolmam ro di angka anakmu togihononnasida ruar tu halak Kasdim, ho sandiri pe * ndang tagamon malua sian tangannasida, ai pasahatonna do ho tu tangan ni raja sian Babel, huta on pe surbuonna do dohot api.

38:24 Jadi ninna si Sedekia ma tu si Jeremia: Ndang jadi botoon ni manang ise angka hata on, asa unang ho mate bunuon.

38:25 Alai molo tarbortik tu angka induk i naung mangkatai ahu dohot ho, gabe ro nasida tumopot ho jala didok mandok ho: Ua paboa tu hami manang aha hinatahonmu tu rajai, unang porso tu hami, ndang bunuonnami ho, jala aha do na nidok ni rajai tu ho?

38:26 Ingkon dohononmu ma tu nasida: Husombahon do pangidoanku tu jolo ni rajai, asa unang diboan ahu mulak tu jabu ni si Jonatan, laho mate disi.

38:27 Dung i ro ma saluhut angka induk mandapothon si Jeremia, laos disungkuni ibana, gabe dipaboa ibana tu nasida hombar tu saluhut hata i, angka naung tinonahon ni rajai tu ibana, jadi sip nasida tumadingkon ibana, ai ndang dope sar hata i.

38:28 Jadi tading di alaman ni hurungan i ma si Jeremia sahat ro di ari hatataban ni Jerusalem.

Jeremia 39

39:1 Dung i tartaban ma huta Jerusalem. Pasiataonhon hinarajahon ni si Sedekia, raja sian Juda, di bulan sipaha sampulu, ro ma si Nebukadnesar, raja sian Babel dohot sandok paranganna tu Jerusalem, jala ditungkum huta i.

39:2 Pasampulu sada taonhon hinarajahon ni si Sedekia di bulan sipaha opat ari pasiahon huta i dibongoti.

39:3 Jadi masuk ma saluhut induk pinabangkit ni raja sian Babel laos juguk nasida mardonokkon harbangan partonga: si Nergal-Sareser, si Sumgar Nebo, si Sarsekim, sintua ni angka pangarajai, si Nergal-Sereser, sintua ni angka na pistar ro di saluhut induk na asing pinabangkit ni raja sian Babel.

39:4 Jadi dung diida si Sedekia, raja sian Juda dohot sude halak parmusu nasida, gabe maporus ma nasida bornginna i sian huta i sian dalan tu porlak ni rajai boti tu bahal di holangholang ni na dua parik i, jala ruar sian dalan tu adaran.

39:5 Alai dieak parangan ni halak Kasdim ma nasida sian pudi, jala dapotsa ditangkup si Sedekia di adaran Jeriko, laos diboan ma ibana tu jolo ni si Nebukadnesar, raja sian Babel tu Ribla, di luat Hamat, jala didabu uhumna tu ibana.

39:6 Dung i diseati raja sian Babel ma angka anak ni si Sedekia di Ribla di adopan ni matana, ro di saluhut angka na raja sian Juda diseati raja sian Babel.

39:7 Alai dipulsikkon do anggo mata ni si Sedekia jala dirante ibana dohot dua rante tombaga laho mamboan ibana tu Babel.

39:8 Alai anggo bagas ni rajai dohot bagas ni situan na torop i disurbu halak Kasdim do dohot api jala angka parik ni Jerusalem dipanepnep do.

39:9 Alai anggo pasipasi ni bangso i, angka na teba di huta i dohot angka na bali tu ibana dohot pasipasi ni bangso angka na teba i, diboan si Nebusaradan, sintua ni angka parangan do tarbuang tu Babel.

39:10 Alai anggo sian situan na torop, angka na pogos i, angka na so pardiadia, ditadingkon si Nebusaradan, sintua ni angka parangan i di tano Juda, jala dilehon tu nasida angka porlak anggur dohot hauma di na sadari i.

39:11 Dung i martona ma si Nebukadnesar, raja sian Babel marhitehite si Nebusaradan, sintua ni angka parangan i taringot tu si Jeremia songon on:

39:12 Buat ma ibana jala marpanatap roham mida ibana, jala unang bahen tu ibana agia aha na jat, ingkon marguru sian hatana tu ho bahenonmu tu ibana.

39:13 Jadi marsuru suruanna ma si Nebusaradan, sintua ni angka parangan dohot si Nebusasban, sintua ni angka naposo dohot si Nergal-Sareser, sintua ni angka na pistar dohot saluhut sintua ni raja sian Babel.

39:14 Disuru nasida ma mangalap si Jeremia sian * alama ni hurungan i jala dipasahat ibana tu * si Gedalia, anak i si Ahikam, tubu ni si Sapan laho manogihon ibana tu jabuna, laos maringan di tongatonga ni situan na torop i ibana.

39:15 Nunga ro hian hata ni Jahowa tu si Jeremia uju tarhurung ibana di alaman ni hurungan i songon on:

39:16 Laho ma ho, paboa ma tu * si Ebedmelek marga Etiopia: Songon on hata ni Jahowa Zebaot, Debata ni Israel: Ida ma, ahu pasintongkon angka hata lumbalumbangku tu huta on mambahen hamagoan, ndada mambahen hasonangan, jala apala di adopanmu do i songgop di na sadari i.

39:17 Alai paluaonku do anggo ho di ari na sasada i, ninna Jahowa, jala ndang jadi sahat ho tu tangan ni halak angka na hinabiaranmu.

39:18 Ai ingkon ahu sandiri paluahon ho, asa unang mate ho * bahenon ni podang, jala ingkon malua hosam hira tabanmu, ala naung marhaposan ho tu ahu, ninna Jahowa.

Jeremia 40

40:1 On do hata naung ro tu si Jeremia sian Jahowa, dung dipalua si Nebusaradan, sintua ni angka parangan ibana sian Rama, uju na binoanna i ibana, tarihot do nang ibana dohot rante di tongatonga ni saluhut na tartangkup sian Jerusalem dohot Juda, asa tarboan nian tu Babel.

40:2 Jadi dibuat sintua ni angka parangan ma si Jeremia jala ninna ma tu ibana: Nunga dilumbahon Jahowa Debatam hian hamagoan on tu huta on.

40:3 Nunga diparo jala dibahen Jahowa nuaeng hombar tu naung nilumbahonna i, ai nunga mardosa hamu dompak Jahowa jala ndang ditangihon hamu soarana, umbahen na songgop sisongon i tu hamu.

40:4 On pe, ida ma, nunga hupalua ho sadarion sian rante angka na di tanganmi; molo denggan di roham laho tu Babel rap dohot ahu ba beta, sai marpanatap pe rohangku mida ho; alai molo sogo roham laho tu Babel rap dohot ahu, ba unang. Ida ma, sandok tano i di jolomi, manang tudia denggan jala tongon di roham denggan tusi ho laho.

40:5 Alai ndang dope mangalusi ibana nunga didok muse: Mulak ma ho tu * si Gedalia, anak ni si Ahikam, tubu ni si Sapan, naung pinabangkit ni raja sian Babel gumomgom angka huta ni Juda jala maringan ma ho di lambungna, di tongatonga ni situan na torop i, alai tahe manang dompak dia tongon ni roham, tusi ma topot. Dung i dilehon sintua ni parangan i ma tu ibana bohal dohot silua, jala diloas ibana laho.

40:6 Jadi sahat ma si Jeremia tu si Gedalia, anak ni si Ahikam, tu Mispa, laos maringan di lambungna, di tongatonga ni situan na torop i angka na tading di tano i.

40:7 Jadi dung dibege saluhut induk ni parangan i, angka na di ladang ro di angka parangannasida, naung pinabangkit ni raja sian Babel si Gedalia, anak ni si Ahikam, gumomgom tano i jala naung pinasahatna tu ibana angka baoa dohot parompuan ro di dakdanak dohot sian halak angka na lea di tano i, angka na so tarboan tu Babel.

40:8 Jadi ro ma nasida mandapothon si Gedalia tu Mispa: * si Ismael, anak ni si Netania dohot * si Johanan dohot si Jonatan, angka anak ni si Karea dohot si Seraia, anak ni si Tanhumet dohot angka anak ni si Epah, sian huta Netopa i dohot si Jersania, anak ni sada halak Maaka i, nasida dohot angka parangannasidai.

40:9 Dung i marmangmang ma si Gedalia anak ni si Ahikam tubu ni si Sapan tu nasida dohot tu angka parangannasidai ninna ma: Unang hamu mabiar mangoloi patu tu halak Kasdim, inganhon hamu ma tano i jala oloi hamu raja sian Babel, asa marsonangsonang hamu.

40:10 Alai anggo ahu, ida ma, maringan di Mispa do, asa jongjong di jolo ni halak Kasdim angka na ro manopot hita, alai anggo hamu, papungu hamu ma anggur dohot parbue ni hau dohot miak jala bahen hamu ma i tu bagasan inganan pineopna i, jala maringan ma hamu di bagasan hutamuna angka na sinolukmuna i.

40:11 Nang saluhut halak Jahudi, angka na di Moab dohot di tongatonga ni halak Amon dohot di Edom dohot na di saluhut luat angka na asing, dung dibege barita i naung tinadingkon ni raja sian Babel pasipasi di Juda, jala naung pinabangkitna i si Gedalia anak ni si Ahikam tubu ni si Sapan gumomgom nasida.

40:12 Jadi mulak ma saluhut Jahudi sian saluhut inganan parserahannasida i, jala ro nasida tu tano Juda mandapothon si Gedalia tu Mispa jala dipapungu nasida anggur dohot parbue ni hau mansai godang.

40:13 Ro ma dohot si Johanan anak ni si Karea dohot saluhut induk ni angka parangan na di balian mandapothon si Gedalia tu Mispa.

40:14 Angka ninna nasida ma tu ibana: Atehe ndang diboto ho naung disuru si Baalis, raja ni halak Amon, si Ismael, anak ni si Netania laho mambunu ho, alai ndang porsea si Gedalia, anak ni si Ahikam di hatanasida i.

40:15 Jadi ninna si Johanan, anak ni si Karea tu si Gedalia di sihabunian di Mispa songon on: Ua laos ma ahu laho, asa hubunu si Ismael, anak ni si Netania, so botobotoan ni manang ise; boasa tagonan bunuonna hosam, asa mampar saluhut halak Jahudi, angka naung marpungu tu lambungmi, gabe mago pasipasi ni Juda maon?

40:16 Alai ninna si Gedalia, anak ni si Ahikam ma tu si Johanan, anak ni si Karea: Sitongka bahenonmu songon i, ai sipaotooto do na pinaboam taringot tu si Ismael.

Jeremia 41

41:1 Jumpang papitubulanhon ro ma * si Ismael anak ni si Netania, tubu ni si Elisama sian pinompar ni rajai rap dohot angka induk pinabangkit ni rajai udur, dohot sampulu halak mandapothon si Gedalia, anak ni si Ahikam, tu Mispa, jala rap mangan sagusagu nasida disi di Mispa.

41:2 Dung i hehe ma si Ismael anak ni si Netania dohot na sampulu halak angka donganna i, gabe dibunu nasida * si Gedalia, anak ni si Ahikam, tubu ni si Sapan marhitehite podang, gabe mate ibana naung pinabangkit ni raja sian Babel gumomgom luat i.

41:3 Dibunu si Ismael huhut saluhut halak Jahudi angka dongan ni si Gedalia di Mispa, ro di halak Kasdim angka na jumpangsa disi, angka halak parmusu.

41:4 Jadi paduaarihon, dung binununa si Gedalia, laos so botobotoan ni manang ise dope.

41:5 Ro ma angka baoa sian Sikem, sian Silo dohot sian Samaria, ualupulu halak toropna, angka na targorbang misena jala na sinansanan pangkeanna jala * na nirarik dagingna jala pelean sipanganon dohot daupa di bagasan tangannasida laho mamboan tu joro ni Jahowa nian.

41:6 Jadi ruar ma si Ismael, anak ni si Netania, sian Mispa, manjumpangkon nasida, mardalandalan huhut tumatangis. Jadi dung pajumpang nasida, ninna ma mandok nasida: Beta hita manopot si Gedalia anak ni si Ahikam!

41:7 Alai dung sahat nasida tu tongatonga ni huta i, diseati si Ismael, anak ni si Netania ma nasida, laos direongkon tu godung, ibana dohot angka baoa donganna i.

41:8 Alai jumpang do sampulu baoa di tongatonganasida angka na mandok tu si Ismael: Sai unang hami bunu, ai adong do di hami arta angka na buni di ladang, angka eme, miak dohot situak ni loba. Jadi melok rohana, ndang dibunu anggo nasida rap dohot hahaangginasida i.

41:9 Ia godung panimpalan ni saluhut bangke ni angka baoa, angka na binununa i, di lambung ni si Gedalia, i ma godung na binahen ni * raja Asa maradophon si Baesa raja sian Israel; i ma na ginohan ni si Ismael, anak ni si Netania dohot halak angka na mate tartullang.

41:10 Laos diboan si Ismael do sandok pasipasi ni bangso i na di Mispa: Angka boru ni rajai ro di sandok situan na torop na tinggal di Mispa, na pinasahat ni si Nebusaradan, sintua ni angka parangan i tu si Gedalia, anak ni si Ahikam; saluhut nasida diboan si Ismael, anak ni si Netania, laos laho ibana taripar tu halak Amon.

41:11 Jadi dung dibege * si Johanan, anak ni si Karea ro di sude induk ni parangan donganna i, saluhutna hajahaton, na binahen ni si Ismael, anak ni si Netania.

41:12 Diarahon nasida ma saluhut parangan, asa laho marmusu dompak si Ismael, anak ni si Netania, jadi dapot nasida ma ibana mardonokkon * aek godang na di Gibeon.

41:13 Jadi dung diida sandok bangso dongan ni si Ismael, si Johanan, anak ni si Karea, ro di saluhut induk ni parangan donganna i, las ma rohanasida.

41:14 Jala sandok bangso na binoan ni si Ismael sian Mispa, marbalik muse laho mulak mandapothon si Johanan, anak ni si Karea.

41:15 Alai anggo si Ismael, anak ni si Netania, sanga do maporus rap dohot ualu halak maradophon si Johanan, gabe laho ibana mandapothon halak Amon.

41:16 Dung i diarahon si Johanan, anak ni si Karea dohot saluhut induk ni parangan donganna i ma sandok pasipasi ni bangso i, na mulak binoanna sian si Ismael, anak ni si Netania, sian Mispa, dung binununa si Gedalia, anak ni si Ahikam: Baoa angka na somal marmusu, angka parompuan dohot dakdanak ro di naposo, angka na mulak binoanna sian Gibeon.

41:17 Jadi laho ma nasida laos marsaro di ambatan * Kim Kana mardonokkon. Betlehem, asa * borhat nasida mardalan tu Misir.

41:18 Maradophon halak Kasdim, ala biarna mida nasida, ala naung binunu ni si Ismael, anak ni si Netania si Gedalia anak ni si Ahikam, naung pinabangkit ni raja sian Babel gumomgom luat i.

Jeremia 42

42:1 Dung i ro ma jumonok saluhut induk ni parangan i, i ma si Johanan, anak ni si Karea dohot si Jersania, anak ni si Hosaya ro di sandok situan na torop i, sian na metmet ro di na magodang.

42:2 Angka didok nasida ma tu panurirang Jeremia: Sai sahat ma pangidoannami tu jolomi, jala * tangiangkon hami tu Jahowa debatam tangiangkon dohot sandok angka na teba on, ai otik nama hami teba sian na deak hian, songon na niida ni matam hami on.

42:3 Asa dipaboa Jahowa Debatam di hami dalan sidalanannami dohot hata sibahenonnami.

42:4 Jadi ninna panurirang Jeremia ma tu nasida: Nunga hubege hata i! Ida ma, martangiang ma ahu tu Jahowa, Debatamuna, hombar tu hata pangidoanmuna i; jala sandok hata sialushonon ni Jahowa tu hamu, paboaonku do tu hamu, ndang porsoonku nanggo hata sandok maradophon hamu.

42:5 Dung i ninna nasida ma tu si Jeremia: Ingkon Jahowa do sitindangi na bonar jala na sintong dompak hami, tung sura so hubahen hami hombar tu saluhut hata na tinongoshon ni Jahowa Debatam tu ho taringot tu hami.

42:6 Manang na denggan manang na roa pe, ingkon tangihononnami do soara ni Jahowa Debatanami, umbahen husuru hami ho manopot ibana, asa anggiat marsonangsonang hami ala na hutangihon hami soara ni Jahowa, Debatanami.

42:7 Alai dung salpu sampulu ari ro muse ma hata ni Jahowa tu si Jeremia.

42:8 Jadi dijou si Jeremia ma si Johanan, anak ni si Karea dohot saluhut induk ni parangan donganna i, ro di sandok situan na torop i, sian na metmet ro di na magodang.

42:9 Laos didok ma tu nasida: Songon on do hata ni Jahowa, Debata ni Israel, na hutopot sinurumuna i laho pasahathon tangiangmuna i tu jolona:

42:10 Molo hot hamu maringan di tano on, sai hot hamu tumpahanku, ndada lohaonku, ingkon suananku ma hamu, ndada butbutonku, ai marpangulahi do rohangku taringot tu hamagoan naung hubahen i tu hamu.

42:11 Unang hamu mabiar maradophon raja sian Babel, na hinabiaranmuna na sai laon. Unang hamu mabiar mida ibana, ninna Jahowa, ai ahu do donganmuna laho mangurupi hamu dohot paluahon hamu sian tanganna.

42:12 Jala ahu marbasabasahon tu hamu asi ni roha, asa marasi ni roha ibana mida hamu, jala mulak hamu boanonna tu tanomuna.

42:13 Alai tung sura dohononmuna: Ndang olo hami tading di tano on! Ndang olo hamu tumangihon soara ni Jahowa, Debatamuna i.

42:14 Lam didok hamu do: Ndada ingkon laho do hami tu tano Misir, asa unang huida hami hamusuon, manang begeonnami soara ni sangka, manang raparan hami di roti, ingkon disi tahe hami maringan!

42:15 Antong, tangihon ma nuaeng hata ni Jahowa, hamu ale pasipasi ni Juda! Songon on do hata ni Jahowa Zebaot, Debata ni Israel: Molo sai ditahi rohamuna naeng laho tu Misir, asa maisolat hamu disi.

42:16 Ingkon dapot podang, na hinabiaranmuna i do hamu disi, di tano Misir, dapot haraparon hamu na hinabiaranmuna dison, ingkon leleonna hamu tu Misir, ingkon mate hamu disi.

42:17 Jala saluhut baoa, angka na martahi laho tu Misir asa maisolat disi, ingkon mate do * marhitehite podang, haraparon dohot begu antuk, nanggo sahalak sian nasida ndang jadi teba manang malua maradophon hamagoan, siparoonku tu hamu.

42:18 Ai songon on do hata ni Jahowa Zebaot, Debata ni Israel: Suang songon tu pangisi ni Jerusalem, pangusehononku parpiarpiar ni rimashu dohot tu hamu, molo tung laho hamu tu Misir, ingkon gabe bura hamu, gabe hasonggoton sipapulaspulason dohot sirehereheon, jala ndang be idaonmuna inganan on.

42:19 Nunga pola dipaboa Jahowa tu hamu, hamu ale pasipasi ni Juda: Unang hamu laho tu Misir! Unang so boto hamu, naung hupalumba hamu sadarion.

42:20 Alai laos hamu sandiri paotootohon rohamuna, uju na sinurumuna ahu tu Jahowa, Debatamuna i, mandok songon on: Sai tangiangkon ma hami tu Jahowa, Debatanami! Jala * hombar tu saluhut sidohonon ni Jahowa Debatanami, i ma paboa tu hami, asa hubahen hami.

42:21 Jadi nunga hupabotohon tu hamu sadarion, hape ndang ditangihon hamu soara ni Jahowa Debatamuna i, jala ndang dioloi hamu nanggo sada tinonahonna tu ahu naung hupatolhas tu hamu.

42:22 On pe unang so diboto hamu, ingkon mate hamu marhitehite podang, haraparon dohot begu antuk di inganan sitopotonmuna nian asa maisolat disi.

Jeremia 43

43:1 Jadi dung tolhas dihatahon si Jeremia tu sandok situan na torop i saluhut hata ni Jahowa, Debatanasida i, naung tinonahon ni Jahowa, Debatanasida i, umbahen disuru ibana manopot nasida.

43:2 Jadi ro ma hata ni si Azaria, anak ni si Hosaya, dohot si Johanan, anak ni si Karea rap dohot saluhut baoa angka na jungkat, ninna ma tu si Jeremia: Gabus do na hinatahonmu! Ndang na tutu ho sinuru ni Jahowa, Debatanami, martona songon on: Unang hamu laho tu Misir maisolat disi.

43:3 Na pinajuju ni si Baruk, anak ni si Neria do ho mangalo hami, asa pasahathon hami tu tangan ni halak Kasdim, asa bunuonna hami manang mamboan hami tarbuang tu Babel.

43:4 Jadi ndang ditangihon si Johanan, anak ni si Karea dohot saluhut induk ni parangan, ro di sandok situan na torop i soara ni Jahowa, laos maringan nian di tano Juda.

43:5 Dung i diarahon si Johanan, anak ni si Karea dohot saluhut induk ni parangan ma sandok pasipasi ni Juda angka na mulak sian saluhut bangso parbegu parserahannasida na sai laon, asa maringan nian di tano Juda.

43:6 Tole angka baoa dohot parompuan angka dakdanak, angka boru ni raja ro di saluhut hosa, angka na tading binahen ni si Nebusaradan, sintua ni parangan i, dongan ni si Gedalia anak ni si Ahikam tubu ni si Sapan, angkup ni panurirang Jeremia dohot si Baruk, anak ni si Neria.

43:7 Jadi tolhas ma nasida tu * tano Misir, ai ndang ditangihon nasida soara ni Jahowa, gabe sahat ma nasida tu * Tahpanhes.

43:8 Dung i ro ma hata ni Jahowa tu si Jeremia di Tahpanhes songon on:

43:9 Buat ma di bagasan tanganmu batu angka na bolon, jala tabunihon di bagasan tano liat di bagasan liang parmasahan batu mardonokkon pintu ni jabu ni Firaun di Tahpanhes, di adopan ni angka baoa sian Juda.

43:10 Dung i dohononmu ma tu nasida: Songon on do hata ni Jahowa Zebaot, Debata ni Israel: Ida ma, ahu marsuru suruanku mangalapi si Nebukadnesar raja sian Babel, * naposongki, jala ahu patindang habangsana di atas ni batu on, angka naung hutabunihon, jala pahembangonna ma rimberimbe ni undungundungna di atasna.

43:11 Ingkon bongotanna ma jala papatuonna tano Misir: Manang ise na tu hamatean, tu hamatean ma tutu, manang ise na tu habuangan, tu habuangan ma tutu, * manang ise na tu podang, tu podang ma tutu.

43:12 Jala pagalahonku ma sada api * di bagasan joro ni angka debata ni Misir, laos soksohanna ma jala buangkononna, jala alithononna ma tano Misir, songon pangalithon ni parmahan ni ulosna, dung i muli ma ibana sian i mardamedame.

43:13 Angkup ni ingkon ponggolhononna do angka tiang partunggul sian Betsemes na ti tano Misir, jala surbuonna dohot api angka joro ni angka debata ni Misir.

Jeremia 44

44:1 On do hata naung ro tu si Jeremia taringot tu saluhut halak Jahudi, angka na maringan di tano Misir, angka na maringan di * Migdol, di * Tahpanhes, di Nop dohot di tano Patros, ninna do:

44:2 Songon on do hata ni Jahowa Zebaot, Debata ni Israel: Nunga diida hamu saluhut jea, na huparo tu atas ni Jerusalem dohot tu atas ni saluhut huta di Juda, jala ida ma, laos tarulang do i rasirasa sadarion, jala ndang adong be pangisina nanggo sahalak.

44:3 Ala ni hajahaton, angka naung niulanasida i pahehe rimashu, nunga pola laho nasida manutung daupa mangoloi debata sileban, angka na so tinandanasida i, nang nasida, nang ompunasida i.

44:4 Jadi husuru do nian tu hamu saluhut naposongku, angka panurirang i, pola sogot ahu hehe marsuru mandok songon on: Ua unang bahen hamu hasogiron sisongon i na huhasomorhon!

44:5 Hape ndang ditangihon nasida jala ndang dipaeleng pinggolnasida, asa muba nian rohanasida tumadingkon hajahatonnasida i, unang nian manutung daupa tu angka debata sileban.

44:6 Dibahen i use ma rimashu dohot murukku jala marsigorgor dompak angka huta ni Juda dohot dompak angka alaman ni Jerusalem, laos tarulang gabe halongonan rasirasa sadarion.

44:7 On pe songon on do hata ni Jahowa, Debata Zebaot, Debata ni Israel: Boasa tung bahenonmuna jea bolon dompak hosamuna sandiri, laos hamu mamansingkon baoa dohot parompuan, dakdanak dohot posoposo di hamu sian tongatonga ni Juda, ndang ditebahon hamu nanggo pasipasina di hamu?

44:8 Lam dipahehe hamu rimashu marhitehite jadijadian ni tanganmuna laho manutung daupa tu angka debata sileban di tano Misir, hasahatanmuna i asa maisolat disi, asa tung sun siap hamu jala asa gabe sipulaspulason dohot sirehereheon hamu di tongatonga ni saluhut bangso parbegu di tano on.

44:9 Nunga tung lupa hamu huroha di hajahaton ni ompumuna dohot di hajahaton ni angka raja sian Juda dohot di hajahaton ni angka jolmanasida dohot di hajahatonmuna sandiri dohot di hajahaton di jolmamuna, naung binahennasida di tano Juda dohot di angka alaman ni Jerusalem?

44:10 Laos so dipaunduk nasida tahe rohanasida i rasirasa sadarion, jala ndang mabiar nasida, jala ndang diparangehon nasida patikku dohot tonangku, angka na hupasahat tu hamu dohot tu ompumuna.

44:11 Dibahen i songon on do hata ni Jahowa Zebaot, Debata ni Israel: Ida ma, nunga pola * didompakkon bohingku hamu mambahen jea dohot mamansingkon sandok Juda.

44:12 Jala tangkuponku ma pasipasi ni Juda, angka na martahi laho tu tano Misir, asa maisolat disi, ingkon siap nasida luhut; ingkon marragean nasida di tano Misir; ingkon siap nasida marhitehite podang dohot haraparon; ingkon mate nasida sian na metmet ro di na magodang * marhitehite podang dohot haraparon, ingkon gabe * bura nasida, gabe hasonggoton, gabe sipulaspulason dohot gabe sirehereheon.

44:13 Ai marlulu ma ahu dompak halak angka na maringan di tano Misir, songon pangaluluingku dompak Jerusalem marhitehite podang, haraparon dohot begu antuk.

44:14 Jala ndang tagamon adong na malua manang teba sian pasipasi ni Juda, angka na sahat tu tano Misir, asa maisolat disi, asa mulak nian muse tu tano Juda di rohana, na hinalungunhon ni rohanasida naeng mulak laos maringan disi, alai holan angka na malua do mulak tusi sogot.

44:15 Dung i ro ma alus ni saluhut baoa, angka na umboto naung manutung daupa jolmanasida i tu angka debata sileban, dohot saluhut parompuan angka na jongjong marluhutan godang ro di sandok situan na torop angka na maringan di tano Misir, di * Patros, mandok tu si Jeremia songon on.

44:16 Ia hata naung hinatahonmu tu hami marhitehite goar ni Jahowa, ndang patangitangionnami ho.

44:17 Ingkon sai bahenonnami do hombar tu sandok hata naung ruar sian pamangannami; ingkon manutung daupa hami tu * raja boruboru di langit dohot mangusehon tuak tangkasan tusi, songon na somal hubahen hami, nang angka ompunami, angka rajanami dohot angka induknami di angka huta ni Juda dohot di angka alaman ni Jerusalem, * bosuran ma hami uju i mangan roti, jala marsonangsonang hami, jea pe so huida hami.

44:18 Alai olat ni dung mansadi hami manutung daupa tu raja boruboru di langit dohot mangusehon tuak tangkasan tusi, hurangan ma hami di na saluhut, jala siap hami marhitehite podang dohot haraparon.

44:19 Angkup ni ia manutung daupa pe hami tu raja boruboru di langit dohot mangusehon tuak tangkasan tusi, tung so parbinoto huroha baoanami hubahen hami angka juada tusi laho mambahen sumansumanna dohot mangusehon tuak tangkasan tusi?

44:20 Jadi ninna si Jeremia ma tu sandok situan na torop i, tu angka baoa dohot tu angka parompuan, tung tu sandok bangso i, angka na maralus tu ibana, songon on:

44:21 Nda tongon do nian nunga diingot Jahowa daupa na tinutungmuna i di angka huta ni Juda dohot di angka alaman ni Jerusalem, nang hamu, nang ompumuna, angka rajamuna dohot indukmuna dohot situan na torop na di tano i, jala nunga tutu diparateatehon?

44:22 Jadi ndang be hatiopan Jahowa rohana mida hinaroa ni pambahenanmuna, mida hasogiron angka na niulamuna: Laos alani gabe halongonan tanomuna i, gabe tarulang, gabe sipulaspulason, so adong be pangisina nanggo sahalak songon na andar sadarion.

44:23 Ala na manutung daupa i hamu jala na mardosai hamu dompak Jahowa, jala ndang ditangihon hamu soara ni Jahowa, jala ndang diparangehon hamu patikna dohot angka uhumna dohot panindangionna, ala ni do tutu umbahen mangonai tu hamu jea on, songon na andar sadarion.

44:24 Dung i ro muse hata ni si Jeremia mandok tu sandok situan na torop i dohot tu saluhut parompuan: Tangihon ma hata ni Jahowa sude hamu ale halak Jahudi, angka na di tano Misir!

44:25 Songon on do hata ni Jahowa Zebaot, Debata ni Israel: Hamu dohot jolmamuna, pamanganmuna sandiri tahe mangkatahon laos tanganmuna mangulahon songon on: Ingkon sai patolhasonnami do bagabaganami, angka naung hubagabagahon hami, ingkon manutung daupa tu raja boruboru di langit i dohot mangusehon tuak tangkasan tusi! -- Datdati hamu ma mangkajongjongkon bagabagamuna i dohot patolhashon bagabagamuna!

44:26 Dibahen i tangihon ma hata ni Jahowa, sude hamu ale halak Jahudi, angka na maringan di tano Misir! Ida ma, nunga pola * marmangmang ahu tu goarhu na timbul i, ninna Jahowa: Na so tupa be jouon goarhu marhite sian pamangan ni manang ise sian halak Jahudi di sandok tano Misir, manang dohononna: Songon sintongna mangolu Tuhan Jahowa!

44:27 Ida ma, dungo ma ahu taringot tu nasida mambahen hamagoan, ndada mambahen na denggan, ingkon mate saluhut baoa sian Juda, angka na di tano Misir, marhitehite podang dohot haraparon, paima sun siap nasida.

44:28 Ia adong pe angka na malua sian podang, * mulak sian tano Misir tu tano Juda, otik do bilanganna, jadi tandaon ni sandok pasipasi ni Juda ma, angka na sahat tu tano Misir naeng maisolat nian disi, manang hata ni ise na tulus manang hatangku manang hatanasida.

44:29 Jala on do partinandaan di hamu, ninna Jahowa, paboa marlulu ahu dompak hamu di inganan on, asa tung mananda hamu naung sintong songgop hatangki bahen hamagoanmuna.

44:30 Songon on do hata ni Jahowa: Ida ma, ahu sandiri pasahathon * Firaun Hopara, raja sian Misir, tu tangan ni angka musuna dohot tu tangan ni angka na tumahi hosana, songon naung hupasahat si Sedekia, raja sian Juda, tu tangan ni * si Nebukadnesar, raja sian Babel, musuna i, na tumahi hosana.

Jeremia 45

45:1 On do hata naung nilumbahon ni panurirang Jeremia tu si Baruk, anak ni si Neria, * uju sinuratna hata on, angka na niaturhon ni si Jeremia tu sada buku, paopattaonhon hinarajahon ni si Joiakim, anak ni si Josia, raja sian Juda ninna do:

45:2 Songon on do hata ni Jahowa, Debata ni Israel tu ho, ale Baruk.

45:3 Nimmu do: Soro ni aringki! Tung ditambai Jahowa dope haarsahon tu parniahapanku hian! Pola maheu ahu dibahen hoihoingki, jala hasonangan so dapot ahu.

45:4 Songon on do dohononmu tu ibana: Songon on do hata ni Jahowa: Ida ma, gari naung hupauli, huloha do muse, jala naung husuan, hubutbut do muse, pola tung sandok tano on!

45:5 Lam ho ma, tung tama ma angka hatimbulon luluanmu di ho? Unang lulu i! Ai ida ma, ahu sandiri parohon jea tu nasa sibuk, ninna Jahowa, alai * lehononku do anggo tu ho hosam bahen tabantaban di saluhut inganan sitopotonmi.

Jeremia 46

46:1 On do hata ni Jahowa naung ro tu panurirang Jeremia dompak angka bangso.

46:2 Dompak * Misir, dompak parangan ni * Firaun Neko, raja sian Misir, angka na marsaro martopihon batang aek Euprat di lambung Karkemis na tinaluhon ni si Nebukadnesar, raja sian Babel, paopattaonhon hinarajahon ni si Joiakim, anak ni si Josia, raja sian Juda.

46:3 Padiri hamu ma lombulombu na balga dohot na metmet, jala borhat laho tu tongtangan!

46:4 Palanoi hamu angka hoda, jala panaek hamu, aek halak parsihundul, patutur ma hamu jongjong martahuluk be! Pungga hamu angka hujur! Jala solukkon hamu angka bajubaju partahanan!

46:5 Marhua huroha umbahen tarhatotong angka nasida i huida, huhut lumindak tu pudi? Bebenesan ia angka ulubalang nasida, jala humalaput nasida maporus jala ndang mamereng tu pudi? Hagodoron humaliang ninna Jahowa!

46:6 Unang loas maporus halak na gompis, jala unang loas malua halak na begu! Dingkan utara, martopihon batang aek Euprat martinggangan jala marragean nasida.

46:7 Ise do ibana na binsat songon Nil, songon aek na magodang pola gasagasaon angka galumbangna?

46:8 Halak Misir do i na binsat songon Nil, jala songon aek na magodang pola gasagasaon angka galumbangna, jala didok do: Nangkok ma ahu manutup tano i, mangago huta i ro di pangisina.

46:9 Panaek hamu ma angka hoda! Jala purpurhon hamu angka hureta! Jala borhat ma angka ulubalang! Tole halak Kus dohot * Put, angka na maniop lombulombu ro di halak Lud angka na maniop dohot manintak sior.

46:10 Ai ari partubolan di Tuhan Jahowa Zebaot do ari na sasada i, laho martubolhon tu musuna; jala suda nasida panganon ni podang; maradu mahap jala * mabuk sian mudarnasida, ai adong do sada pelean sipotongon di Tuhan Jahowa Zebaot di tano tungkan utara martopihon batang aek Euprat.

46:11 Nangkok ma ho tu * Gilead mangalap miak bahen daon, ale boru Misir! Hape ndang marguna pagodangonmu angka ubat, ai ndang be hadaonan ho.

46:12 Begeon ni angka bangso parbegu na haurahonmu, jala gok tano on angguhanggukmu, ai masijonapan do angka ulubalang rap martinggangan jala marragean nasida duansa.

46:13 On do hata na nilumbahon ni Jahowa hian tu panurirang Jeremia taringot tu haroro ni si Nebukadnesar raja sian Babel, laho papatu tano Misir:

46:14 Baritahon hamu ma i di Misir jala tingtingkon hamu ma i di Migdol, asa sar barita i di Nop dohot di * Tahpanhes, dok hamu ma: Marodorodor ma ho jongjong jala marsihohot mangalo, ai nunga suda dipangan podang angka hombar balokmu.

46:15 Boasa naung marragean angka ulubalangmu? Boasa so manahan jongjong ibana? Ai Jahowa do tahe patundukkon nasida.

46:16 Ibana mambahen nasida martinggangan mansai torop rap marragean do nasida, gabe didok nasida do: Beta hita mulak tu bangsonta dohot tu tano hatubuanta maradophon podang ni pangago i.

46:17 Joujou nasida disi: Ia Firaun, raja sian Misir, nunga pidom; dipasalpu do antong tingki na denggan i.

46:18 Songon sintongna mangolu ahu, ninna raja Jahowa Zebaot goarna: Songon Tabor di tongatonga ni angka dolok jala songon Karmel martopihon laut, songon i do harorona sogot.

46:19 Bahen hian ma di ho ulaula ni halak na tarbuang, ho ale isi ni boru Misir! Ai ingkon gabe halongonan do Nob jala pansing, asa unang adong be pangisina.

46:20 Tudos tu anak ni lombu na uli rupa do Misir, alai ro do sada pangago i, sian utara, ro do ibana tongon.

46:21 Nang halak na niupaanna, angka na di tongatonganasida i, songon anak ni lombu angka na pinamokmok do, nang angka nasida marbalik do, rap maporus, ndang manahan jongjong, ai nunga ro ari hamagoannasida tu nasida, tingki partubolan tu nasida.

46:22 Soarana do songon parlisik ni ulok; ai mardongan parangan nasida mardalan, jala mantat tangke nasida ro mandapothon, songon halak sitaba hau.

46:23 Nunga pola dirotongkon nasida tombakna, ninna Jahowa, atik pe so tartondong nian, ai tumorop do nasida sian sihapor, jala ndang habilangan toropnasida.

46:24 Nunga tung tarurak boru Misir, nunga sahat nasida tu tangan ni sada bangso sian utara.

46:25 Nunga pola didok Jahowa Zebaot, Debata ni Israel: Ida ma, marlulu ma ahu dompak Amon sian Tebe dohot dompak Firaun dohot dompak Misir dohot dompak angka debatana dohot dompak angka rajana dohot dompak Firaun dohot dompak halak na marhaposan tu ibana.

46:26 Ahu ma tutu pasahathon nasida tu tangan ni halak na tumahi hosanasida dohot tu tangan ni si Nebukadnesar, raja sian Babel dohot tu tangan ni angka naposona; dung salpu songon i ingkon inganan muse, suang songon di angka ari na robi, ninna Jahowa.

46:27 Alai anggo ho, * ale Jakkob, naposongku! Unang ho mabiar, jala unang ho tarsonggot ale Israel! Ai ida, ahu paluahon ho sian luat na dao dohot pinomparmu sian tano habuangannasida, ingkon mulak Jakkob jala marsonangsonang, jala mardohar, jala ndang adong na manonggoti.

46:28 Dibahen i unang mabiar ho, ale naposongku Jakkob, ninna Jahowa, ai ahu do donganmu! Ai tung pansing do bahenonku saluhut bangso haambolonganmu na sai laon na hubahen i, alai anggo ho ndang pansing bahenonku, ingkon pinsangonku do ho nian hombar tu uhum, ndang tarbahen so toruanku ho.

Jeremia 47

47:1 On do hata ni Jahowa na ro tu panurirang Jeremia * dompak halak Palistim, tagan so dipapatu Firaun dope Gasa.

47:2 Songon on do hata ni Jahowa: Ida ma, binsat ma angka aek sian utara manjadi aek na sumar, lantapanna ma tano i ro di isina, huta i ro di pangisina; jadi mangangguhi ma angka jolma i jala mangandungi saluhut isi ni tano i!

47:3 Maradophon pardorom ni tambirik ni angka hodana, maradophon paruoror ni angka huretana, pallapak ni angka galapangna. Ndang ditailihon amaama angka anakna binahen ni daukdauk ni tangannasida.

47:4 Binahen ni ari na laho mamansingkon saluhut halak Palistim, laho maniaphon Tirus dohot Sidon, ro di saluhut na malua tau pangurupi nian, ai rendephonon ni Jahowa ma halak Palistim, pasipasi ni pasir * Kaptor.

47:5 Nunga ro hapalpalon tu * Gasa, nunga tarhatotong Askelon, ebaeba ni tano na di rura. Sadia leleng on dope * rarihanmu dagingmu?

47:6 Oe ale podang ni Jahowa, sadia leleng nari so olo ho mansadi? Sai mulak ma ho tu bagasan sarungmu, maradian ma ho nian jala mansadi!

47:7 Alai tahe beha ma, pambahenmu mansadi? Ai Jahowa do mandokkonsa! Dompak Askelon dohot dompak pasir ni laut do i didokkon.

Jeremia 48

48:1 Dompak Moab. Songon on do hata ni Jahowa Zebaot, Debata ni Israel: Marjea ma huta Nebo, ai nunga pansing! Nunga tarurak Kiriataim jala patu, nunga tarurak benteng na timbo i jala maloha!

48:2 Nunga pesan hamuliaon ni Moab di Hesbon; nunga pola disangkapi halak hamagoanna, ninna do: Beta hita, asa itapansingkon ibana unang be masuk tu bilangan ni bangso! Ho pe ale Madmen, ingkon rendep ho; sai paburuburuon ni podang ma ho.

48:3 Tarbege do soara angguhangguk sian Horonaim! Hapapansing dohot hamagoan dohot hataluan bolon!

48:4 Nunga tung siap Moab! Angka na metmet mangangguhi.

48:5 Ai di nangkohan Luhit mardapotdapot nangkok halak na tumatangis, pola tarbege di tuatan Horonaim angguk badar ni halak na hagogotan.

48:6 Maporus ma hamu, palua hamu hosamuna i! Alai gabe * songon tadatada di halongonan do hamu.

48:7 Ai ala marhaposan ho mida jadijadianmu dohot mida angka artam, ingkon dohot ho patu, ingkon borhat * Kamos tu habuangan, angka malimna dohot angka indukna sasudena.

48:8 Ai ingkon ro do sipangago i dompak saluhut halak jala ndang malua nanggo sada huta, jala mago rura i jala tarulang tano pea i, ai songon i do hata ni Jahowa.

48:9 Lehon hamu ma habong tu Moab ai naeng gira habang ibana tu ruar. Hape ingkon gabe halongonan angka hutana, ndang be marpangisi nanggo sahalak.

48:10 Marjea ma manang ise na marlemba mangaradoti ulaon ni Jahowa, jala marjea ma manang ise na mangontok podangna mandurushon mudar.

48:11 Marsonangsonang do nian Moab sian sieteketehonna, jala hohom ibana peak di atas parakna, jala ndang dung ibana dipainding sian guriguri na sada tu na asing, jala ndang dung ibana tarboan tu habuangan. Dibahen i hot do pandaianna, jala ndang muba parnianggoanna.

48:12 Dibahen i, ida ma, na ro do angka ari sogot, ninna Jahowa, ahu ma marsuru tu ibana jolma angka na painding ibana, jala parumaronna angka gurigurina, jala bolahononna angka saoanna.

48:13 Ingkon tarurak do Moab binahen ni Kamos, suang songon pinompar ni Israel tarurak binahen ni Betel haposannai.

48:14 Boasa ma tung dohononmuna: Angka ulubalang do hami, jala halak parmusu angka na begu do hami?

48:15 Nunga tung siap Moab, jala nunga dipurun angka hutana, jala dolidoli angka na pinillitna i nunga turun tu pamotongan, ninna raja, na margoar Jahowa Zebaot.

48:16 Nunga jonok hapepesan ni Moab, jala silu situtu ro hamagoanna.

48:17 Tatangisi ma ibana, sude hamu angka hombar balokna, sude hamu angka na umboto goarna! Dok hamu ma: Nunga maponggol do hape tungkot hagogooni, batahi na arga i.

48:18 Mijur ma ho sian hamuliaon jala hundul tu tano hasang, ho ale isi ni boru Dibon! Ai na nangkok ma siago Moab dompak ho, siaphononna ma hutam angka na gantingi.

48:19 Jongjong ma ho tu dalan jala manatapnatap, hamu ale isi ni Aroer! Sungkunsungkuni ma jolma na maporus dohot na malua! Dok ma: Aha do na masa?

48:20 Nunga tung tarurak Moab, ai nunga maloha. Mangandungi ma hamu jala tumatangis! Baritahon hamu ma i di Arnon naung siap do hape Moab.

48:21 Jala nunga songgop uhumi tu tano pea, tu Holon dohot tu Jahaz dohot tu Mefaat.

48:22 Dohot tu Dibon dohot tu Nebo dohot tu Bet Diblataim.

48:23 Dohot tu Kiriataim, tu Bet-Gamul dohot tu Betmeon.

48:24 Dohot tu eriot Hesron, Bezer dohot tu saluhut huta ni luat Moab, angka na holang dohot angka na jonok.

48:25 Nunga tung maponggol tanduk ni Moab jala nunga marosak botohonna, ninna Jahowa.

48:26 * Pamabuk hamu ma ibana, ala dompak Jahowa do ibana manenganenga! Laos marguluhon utautana ma Moab, asa gabe sieleseleson ni halak ibana huhut.

48:27 Nda dieleselesi ho do Israel molo jumpang nasida di tongatonga ni angka panangko? Ai ganup ditaringoti hatam ibana, mangupir do ho.

48:28 Tadingkon hamu ma angka huta jala maringan di dolok batu hamu ale isi ni Moab, jala songon anduhur ma hamu angka na marasar di bagasan angka liang.

48:29 Nunga hubege hami hajungkaton ni Moab, tung na jungkat situtu ho, tole hatimbulonna dohot hajungkatonna dohot ginjang ni rohana.

48:30 Ahu pe tangkas do hutanda hajungkatonna ninna Jahowa, tole panengaonna na so marniula i, sipaotooto do dibahen nasida.

48:31 Dibahen i ingkon mangandungi ahu taringot tu Moab jala ingkon mangangguhi ahu taringot tu sandok Moab; tama do marhoihoi iba taringot tu angka baoa di Kir-Heres.

48:32 Ingkon mabakbak iluilungku mida Jaser, ingkon tumatangis ahu mida ho, ale hau anggur sian Sibma. Taripar do rantingrantingmu tu bariba ni laut, pola sahat tu laut Jaser. Nunga ditinggang pangago i parbue ni hau dohot hau anggur angka sigotilonmu hian.

48:33 Nunga munsat huhut las ni roha dohot olopolop sian hauma sigotilon dohot sian tano Moab, jala nunga hupasadi anggur i sian angka pangilangan, ndang adong be luntakluntahonna mardongan suraksurak, tung na so masa be suraksurak las ni roha.

48:34 Binahen ni angguhangguk sian Hesbon sahat tu Eleale, sahat tu Jahaz tahe tarbege soaranasida i; sian Soar sahat tu Horonaim, lombu sitolu taon i, ai dohot do angka aek Nimrim marsik do sogot.

48:35 Ahu ma pasohothon Moab, ninna Jahowa, asa unang be mamele di atas ni angka tambak, jala unang be manutung daupa tu angka debatana sileban.

48:36 Dibahen i sai gunsang do rohangku mida Moab, jala mardorom songon sarune mida halak isi ni Kir-Heres, ala naung mago do pasipasi ni na niomona.

48:37 Ai nunga mapalpal saluhut ulu, jala ginansip saluhut janggut, luhut tangannasida angka * na nirarihan do, jala marulos tangki gontingnasida i.

48:38 Di atas ni saluhut tarup ni jabu di Moab dohot di alamannasida holan angguhangguk do, ai nunga hubolahon Moab songon mangkuk sadi na so lomo di rohaniba, ninna Jahowa.

48:39 Oe suang habobolana i! Angguknasida! Tungki ni ulu ni Moab dohot urakna i! Songon do, nunga gabe sirehereheon Moab dohot hasonggoton di saluhut halak hombar balokna.

48:40 Ai songon on do hata ni Jahowa: Ida ma, songon pidong raja wali ibana habang, jala dipaherbang hatirna di atas Moab.

48:41 Nunga patu angka huta, jala nunga disoluk angka partanobatoan; jala ingkon songon roha ni parompuan na mangae posoposona, roha ni angka ulubalang ni Moab di ari na sasada i.

48:42 Ingkon pansing Moab, asa unang be targoar bangso, ala dompak Jahowa ibana manenganenga.

48:43 Hasogiron dohot godung dohot jorgong songgop tu ho, ale isi ni Moab, ninna Jahowa.

48:44 Manang ise na maporus maradophon hasogiron, ingkon madabu do ibana tu godung, jala manang ise na manaek sian godung, ingkon dapot jorgong ibana, ai ahu parohon tu nasida, tu Moab, taon partubolan tu nasida, ninna Jahowa.

48:45 Jongjong do di linggoman ni Hesbon marhosahosa angka na maporus ndang margogo, alai * ruar ma api sian Hesbon jala nala ni api sian tongatonga ni Sihon, gabe suda dipangan parsantingan ni Moab dohot pakpak ulu ni angka anak hagunturon.

48:46 Marjea ma ho ale Moab! Nunga pidom bangso ni Kamos, ai nunga tarboan angka anakmu tu habuangan dohot angka borum tu parhatobanan.

48:47 Alai anggo di ujung ni angka ari ahu ma manogihon mulak halak na tarbuang sian Moab ninna Jahowa. Intap ni i ma uhum tu Moab.

Jeremia 49

49:1 Dompak halak * Amon. Songon on do hata ni Jahowa: Ndang adong huroha anak di Israel, manang sitean ibana? Boasa tung * Milkom manean Gad jala bangsona maringan di angka hutana?

49:2 Dibahen i ida ma, na ro do angka ari sogot, ninna Jahowa, ahu ma patubegehon dompak Rabba ni halak Amon suraksurak hamusuon, ingkon gabe timbunan batu huta i, jala masoksok angka hutana pagaran di bagasan api, jala ingkon Israel manean angka naung manean ibana na jolo, ninna Jahowa.

49:3 Mangandungi ma ho, ale Hesbon, ai nunga pansing Ai! Mangangguhi ma, hamu ale angka boru Rabba, alithon ma ulos tangki! Mangandungi ma hamu huhut marlojonglojong di holangholang ni angka parik, ai ingkon mardalan tu habuangan do * Milkom, angka malimna rap dohot angka indukna.

49:4 Boasa manenganengahon angka rura i ho? Mangalantap ma ruram dibahen mudar, ho ale boru na marbalik, na marhaposan tu angka artana, nimmu do: Ise ma na hum jumonok tu ahu?

49:5 Ida ma, ahu parohon tu ho hasonggoton, ninna Tuhan i, Jahowa Zebaot, sian saluhut angka hombar balokmu, jala ingkon onjarhononhon hamu ganup tu jolona, jala ndang adong manang ise na papunguhon na maporus i.

49:6 Alai dung salpu songon i, ahu ma manogihon mulak angka na tarbuang sian halak Amon, ninna Jahowa.

49:7 * Dompak Edom. Songon on do hata ni Jahowa Zebaot: Ndang adong be huroha hapistaran di Teman? Nunga mago huroha tahi sian halak parroha angka na pistar? Nunga pesan huroha hapistarannasida?

49:8 Maporus ma hamu, lumindak tu pudi, monjap ma hamu maringan tu liang, hamu ale isi ni Dedan, ai hapipidom ni si Esau paroonku tu ibana, ai nunga jumpang tingki partubolanku tu ibana.

49:9 Molo ro halak siputik parbue ni anggur tu ho, ndang tagamon tebahononnasida angka sijomputon; molo ro angka panangko borngin, agohononnasida ma na singkop di nasida.

49:10 Ai anggo ahu, nunga hupasalang Esau, nunga hupapatar angka parsitabunianna, ndang be tarbahensa manabunihon dirina. Nunga pidom pinomparna ro di hahaanggina dohot hombar balokna, jala ndang be disi ibana.

49:11 Tadingkon ma anakmu angka na tading di lampin, asa ahu pangoluhon nasida, jala marhaposan tu ahu do parompuan angka na mangkabaluhon ho.

49:12 Ai songon on do hata ni Jahowa: Ida ma, halak na so tama hian nian minum * sian panginumani, ingkon inumonna sian i, tung tarbahen ma lias ia ho? Ndang tarbahen lias ho, ingkon inumonmu sian i.

49:13 Ai nunga pola marmangmang ahu tu diringku, ninna Jahowa, ingkon gabe tarulang, gabe sirehereheon, gabe halongonan, gabe * sipapulaspulason do * Bosra, jala saluhut hutana, ingkon gabe halongonan salelenglelengna.

49:14 Nunga hubege sada barita sian Jahowa, jala nunga disuru suruanna sahalak tu tongatonga ni angka bangso parbegu martingting: Santi balatuk ma hamu martahop dompak nasida, jala borhat ma hamu tu tongtangan!

49:15 Ai ida ma, marmetmet ma ho bahenonku di tongatonga ni angka bangso parbegu, marlea di tongatonga ni manisia!

49:16 Hasogiron binahenmi do paotooto ho, jungkat ni roham, ho ale na maringan di liang ni dolok batu, na sangkot di buntulbuntul ni robean! Tung sura pe * dipatimbo ho asarmu songon pidong raja wali, ingkon onjarhononku do ho sian i, ninna Jahowa.

49:17 Ingkon gabe halongonan do Edom, ganup na mamolus sian i ingkon tarsonggot do marnidasa, jala mangarehe ala ni saluhut jeana.

49:18 Suang songon uju di harorongrong ni Sodom dohot Gumora, nang angka hombar balokna, ninna Jahowa, songon i ndang maringan di Edom jolma nanggo sada, manang marmalam disi manisia.

49:19 Ida ma, nangkok do ibana songon singa sian tobing ni Jordan tu inganan na ganting, ai tompuhononku ma mangalele ibana sian i jala ise ulaning dolidoli na pinillit, sipampeongku mangalo nasida? Ai tung ise ma songon ahu? Jala tung ise ma mangalualuhon ahu? Jala tung ise parmahan i na manahan jongjong di jolongku?

49:20 Dibahen i tangihon hamu ma sangkap ni Jahowa, naung sinangkapna taringot tu Edom, dohot angka pingkiranna, naung piningkiranna taringot tu isi ni Teman: Tongon do, ingkon toltolan ni halak nasida, birubiru angka na gale i, pola tung marseto jampalan mida nasida.

49:21 Sian soara ni pardoburnasida pola humuntal tano on; tarbege do soara angguhanggukna tolhas ro di laut arung.

49:22 Ida ma, * manaek do ibana songon pidong raja wali jala habang, jala dipahembang habongna di atas Bosra; jadi songon roha ni parompuan na mangae posoposona roha ni angka ulubalang di Edom sadarina i.

49:23 * Dompak Damaskus. Tarurak ma Hamat dohot Arpad, ai nunga dibege barita hamagoan; malala ateatenasida, hagodoron masa martopihon laut, ndang tarbahen be marsonangsonang.

49:24 Nunga mandate Damaskus, nunga pola lumindak laho maporus, angka dotdot nasida, hagogotan dohot parsahiton niaena, * songon parompuan na mangae posoposona.

49:25 Beha, nda nunga tinadingkon huta na tarbarita i, huta hasoloan ni rohangku?

49:26 Dibahen i marragean ma angka dolidoli isina i di angka alamanna, jala saluhut baoa sialo musu siap sadarina i, ninna Jahowa Zebaot.

49:27 Ahu tahe pagalakkon sada api di parik ni Damaskus, gabe suda panganonna angka bagas bolon ni si Benhadad.

49:28 Dompak * Kedar dohot dompak * angka harajaon sian Hazor, angka na pinapatu ni si Nebukadnesar, raja sian Babel. Songon on do hata ni Jahowa: Borhat ma hamu nangkok dompak Kedar, jala pansingkon hamu ma angka anak di habinsaran!

49:29 Ingkon rampasonna angka undungundung dohot punguannasida, angka rimberimbenasida ro di saluhut parhohas dohot untonasida laumonna di nasida; jala surakkononna tu nasida: Hagodoron humaliang!

49:30 Maporus ma hamu, haru hatop ma hamu marlojongi, monjap ma hamu maringan tu angka liang, hamu ale isi ni Hazor, ninna Jahowa; ai nunga padalan tahi si Nebukadnesar, raja sian Babel, dompak hamu, nunga pola sada tahina dompak hamu.

49:31 Borhat ma hamu nangkok dompak sada bangso na marsonangsonang jala na nalom roha maringan, ninna Jahowa, ndang marharbangan manang marransang, pinjil ingananna.

49:32 Ingkon gabe tabantaban ia untonasida jala hinadeak ni punguan dorbia di nasida gabe rampason, jala ahu paserakkon nasida tu saluhut desa, nasida * angka na marjambulan, jala sian na humaliang ahu parohon hamagoan tu nasida, ninna Jahowa.

49:33 Jala Hazor ingkon gabe parasaran ni ulok naga, gabe halongonan ro di salelenglelengna. Ndang be maringan disi jolma nanggo sada, jala ndang be marmalam disi manisia.

49:34 On do hata ni Jahowa na ro tu panurirang Jeremia taringot tu * Elam di mula ni harajaon ni si Sedekia, raja sian Juda, ninna do:

49:35 Songon on do hata ni Jahowa Zebaot: Ida ma, ahu ma mamonggolhon sior ni Elam, situan ni hagogoonnasida.

49:36 Jala ahu parohon dompak Elam na opat paranginan sian na opat desa ni langit, jala ahu paserakkon nasida tu na opat paranginan i, jala ndang adong bangso na so hasahatan ni halak angka na maporus sian Elam.

49:37 Jala ahu manggodori roha ni halak Elam maradophon musunasida dohot maradophon angka na tumahi hosanasida, jala ahu parohon tu nasida hamagoan, parpiarpiar ni rimashu, ninna Jahowa, jala ahu paborhathon podang sian pudinasida, paima sun siap nasida hubahen.

49:38 Jala ahu patindang habangsangku di Elam, jala ahu pasiaphon sian i raja dohot angka induk, ninna Jahowa.

49:39 Alai anggo di ujung ni angka ari, mulak ma togihononku angka na tarbuang sian Elam ninna Jahowa.

Jeremia 50

50:1 On do hata naung nilumbahon ni Jahowa hian dompak Babel dohot dompak tano ni halak Kasdim marhitehite panurirang Jeremia.

50:2 Baritahon hamu ma di tongatonga ni angka bangso parbegu jala tingtingkon hamu jala patindang hamu sada partonggol, patubegehon hamu ma i, unang porso hamu! Dok hamu ma: Nunga patu Babel, nunga tarurak Bel, nunga pidom Merodak, nunga tarurak angka ganaganaan panombanombaanna, nunga pesan angka debatana ibana.

50:3 Ai nangkok do dompak ibana sada bangso sian utara, i ma mambahen tanona gabe halongonan, asa ndang be marpangisi; tole jolma ro di pinahan rap maporus do, dipurpurhon be langkana.

50:4 Di angka ari dohot di tingki na sasada i, ninna Jahowa, ro be ma halak Israel, rap dohot halak Juda; mardalandalan nasida huhut * tumatangis mangalului Jahowa, Debatanasida i.

50:5 Usousoannasida ma Sion, jala bohinasida manuju dalan laho tusi: Beta hita, marsihohot rohanta tu Jahowa, marpadan na hot salelenglelengna, na so tupa halupahononhon.

50:6 Birubiru angka na mago do bangsongku na sai laon, siparmahan nasida do mangaliluhon nasida di atas ni angka dolok pangaliluan, mardalani do nasida sian dolok boti tu robean, lupa do nasida di pangulonan hasonangannasida i.

50:7 Manang ise na jumpangan nasida, suda nasida dipangan, jala musunasida mandok: Ndang marsala anggo hami di nasida; ala naung mardosa nasida dompak Jahowa, partanobatoan na sintong jala haposan ni ompunasida do Jahowa.

50:8 Maporus ma hamu sian tongatonga ni Babel jala ruar sian tano ni halak Kasdim, jala tudoshon birubiru tunggal ma hamu angka na manguluhon birubiru.

50:9 Ai ida ma, ahu pahehehon dohot panangkokkon dompak Babel luhutan ni bangso parbegu angka na bolon sian tano na tungkan utara, angka na mangaromrom huta i los tabanonna; sumbianasida tudoshon ulubalang na marantu, na so dung hea mulak boti.

50:10 Ingkon gabe tabantaban do luat ni halak Kasdim, butongan ma saluhut na mamupusi nasida, ninna Jahowa.

50:11 Ala naung marlas ni roha hamu, ala naung marolopolop hamu ale angka na mamupusi partalianki, ai pola marhajingjang hamu songon anak ni lombu na mardege, jala mariheihe songon hoda jantan.

50:12 Ingkon tarurak situtu inamuna jala maila na tumubuhon hamu. Ida ma, ujung ni angka bangso parbegu halongonan do, tano hasang dohot adaran.

50:13 Maradophon parpiar ni muruk ni Jahowa, ndang be inganan huta i jala ingkon gabe halongonan situtu; manang ise na mamolus sian lambung ni Babel tarhatotong do jala mangarehe ala ni saluhut jea ma manginona tu ibana.

50:14 Marodor ma hamu jongjong mandopang Babel humaliang, sude hamu ale angka sisintak sior; sior hamu ma dompak huta i, unang ontohi hamu angka sumbia, ai dompak Jahowa do huta i mardosa.

50:15 Marsuraksurak ma hamu dompak huta i humaliang! Nunga mangoloi patu, nunga marrumpahan angka partanobatoanna, nunga maloha angka parikna! Ai partubolan sian Jahowa do i. * Partubolhon hamu ma tu huta i suang songon naung binahenna i bahen hamu tusi.

50:16 Siaphon hamu ma halak panabur sian Babel dohot halak sitiop sasabi di hamamasa ni gotilon. Maradophon podang ni pangarupa, mulak be ma tumopot bangsona, jala maporus be ma mulak tu tanona.

50:17 Birubiru na nilotongan do Israel, angka singa do mangalotongi. Jumolo raja sian Assur manganhon ibana; jala parpudi on si Nebukadnesar raja sian Babel mangaropuhi holiholina.

50:18 Dibahen i, songon on do hata ni Jahowa Zebaot, Debata ni Israel: * Ida ma, marlulu ma ahu dompak raja sian Babel dohot dompak tanona, suang songon naung marlulu ahu dompak raja sian Assur.

50:19 Dung i mulak ma anggo Israel togihononku tu panjampalanna hian asa manjampal muse di Karmel dohot di Basan jala bosuran rohana di dolok Epraim dohot di Gilead.

50:20 Di angka ari i dohot di tingki na sasada i, ninna Jahowa, luluan ni halak ma hajahaton ni Israel, hape ndang adong dapotsa dohot dosa ni Juda, hape ndang adong jumpangsa nanggo sada! Ai * marpangulahi do rohangku mida jolma na hutebahon i.

50:21 Nangkok ma ho dompak luat na marhajungkaton silompit dua dohot dompak halak isi ni luat na tama torutoruan! Pansingkon jala pidomhon pinomparnasida, ninna Jahowa, jala patupa ma hombar tu saluhut na hutonahon tu ho!

50:22 Soara hamusuon masa di tano i dohot hasisiap godang!

50:23 Nunga tung magopu hape jala maponggol * nanggar ni sandok tano on! Nunga tung gabe halongonan hape Babel di tongatonga ni angka bangso parbegu.

50:24 Nunga huta on jorgong dompak ho, ala ni umbahen laos dapot ho, ale Babel, so botobotoanmu. Nunga tardapot ho huhut tartangkup, ala naung marmusu do dompak Jahowa.

50:25 Nunga pola diungkap Jahowa bagas parpeopan ni sinjatana, jala diparuar angka sinjata ni murukna, ai jadijadian ni Tuhan Jahowa Zebaot do i di tano ni halak Kasdim.

50:26 Ro be ma sian ujung ni tano on mandopang huta i, ungkap hamu ma angka sopona, pagukguk hamu ma songon busukbusukan jala purun hamu, unang adong pasipasina tading.

50:27 Tampuli hamu ma saluhut anak ni lombuna, patuat hamu ma i tu pamotongan! Marjea ma nasida, ai nunga ro arina, tingki partubolan tu nasida.

50:28 Tarbege do soara ni halak na maporus dohot na malua sian tano Babel laho mamaritahon tu Sion partubolan ni Jahowa, Debatanta i, partubolan ni jorona.

50:29 Paluhut hamu ma dompak Babel halak partembak, saluhut halak sisintak sior, tungkum hamu ma huta i humaliang, unang adong haluaon! * Partubolhon hamu ma tu huta i hombar tu pambahenanna marguru tu sude na binahenna bahen hamu tusi ai dompak Jahowa do ibana manenganenga, dompak na badia ni Israel.

50:30 Dibahen i ingkon marragean angka dolidoli di nasida di angka alamanna jala saluhut baoa sialo musu ingkon rendep do di na sadari i, ninna Jahowa.

50:31 Ida ma, toruanku ma ho ale si hajungkaton, ninna Tuhan i, Jahowa Zebaot; ai nunga ro arim, tingki partubolon tu ho.

50:32 Jadi tarsulandit ma si hajungkaton i, laos tinggang, jala ndang adong be na pahehe ibana, jala pagalahonku ma sada api di bagasan angka hutana, gabe suda panganonna saluhut na humaliang ibana.

50:33 Songon on do hata ni Jahowa Zebaot: Angka na nirupaan do halak Israel rap dohot halak Juda, jala saluhut angka na mambuangkon nasida laos maniopi nasida, manjua paluahon nasida.

50:34 Alai na gogo do anggo sipalua nasida, Jahowa Zebaot goarna. Sai badahononna do badanasida, asa marhasonangan tano i bahenonna, jala angka hitir anggo halak isi ni Babel.

50:35 Ingkon ro podang dompak halak Kasdim, ninna Jahowa dohot dompak isi ni Babel dohot dompak angka indukna dohot dompak angka pangarundingna.

50:36 Ro ma tutu podang i dompak angka panurirang pargapgap, asa gabe angka na oto nasida; ro huhut podang i dompak angka ulubalangna, asa tarhatotong nasida.

50:37 Ro huhut podang i dompak hodanasida dohot dompak huretana dohot dompak saluhut na hinarana, angka na di tongatonganasida i, asa * hira songon parompuan biarna; ro muse podang i dompak angka artana, asa sipupusan ni halak.

50:38 Ingkon ro huhut haarsihan dompak angka batang aek di nasida, asa marsik, ai tano abalan ni angka ganaganaan do i, jala manenganenga nasida mangasahon ganaganaan angka na sogir.

50:39 Dibahen i, ingkon maringan disi angka arimo dohot sarigala jala maringan disi angka pidong onggang; jala ndang be inganan ro di saleleng lelengna manang manompang disi marsundutsundut.

50:40 * Songon pangarongrong ni Debata di Sodom dohot di Gumora ro di angka hombar balokna, ninna Jahowa, suang songon i ndang maringan disi jolma nanggo sada, manang manompang disi manisia.

50:41 Ida ma, na ro do sogot * sada bangso sian utara, sada bangso na bolon jala torop angka raja borhat sian angka ujung ni tano on.

50:42 Mamboan sior dohot hujur do nasida, angka na garang do nasida, jala ndang maralangalang, soaranasida pe * songon parhasak ni aek, jala marsihundul di hoda do nasida, marparhohas songon halak parmusu, ro dompak ho ale boru Babel.

50:43 Dung dibege raja sian Babel baritanasida, malenduk ma tanganna; hagogotan ma ibana, jala angka hitir songon parompuan na mangae posoposona.

50:44 Ida ma, nangkok do ibana songon singa sian tobing ni Jordan tu inganan na ganting, ai tompuhononku ma mangalele ibana sian i, jala ise ulaning dolidoli na pinillit sipampeongku mangalo nasida? Ai tung ise ma songon ahu? Jala tung ise ma mangalualuhon ahu? Jala tung ise parmahan i na manahan jongjong di jolongku?

50:45 Dibahen i, tangihon hamu ma sangkap ni Jahowa naung sinangkapna taringot tu Babel dohot pingkiran angka naung piningkiranna taringot tu tano ni halak Kasdim: Tongon do ingkon toltolan ni halak nasida, birubiru angka na gale i, pola tung marseto ingananna mida nasida.

50:46 Binahen ni soara on: Nunga patu Babel! Pola humuntal tano on, jala tarbege do angguhanggukki di tongatonga ni angka bangso parbegu.

Jeremia 51

51:1 Songon on do hata ni Jahowa: Ida ma, ahu pahehehon dompak Babel dohot dompak halak na maringan di tongatonga ni angka alongku, sada alogo pangago.

51:2 Jala ahu paborhathon tu Babel * halak pamurpuri, angka na mamurpuri ibana, dohot mangarumari tanona, ai tungkumonna do humaliang di ari hinamagona i.

51:3 Dompak halak na manintak, sintahan ni panintak ma siorna, jala dompak na mangalithon bajubajuna partahanan; jala unang olani hamu angka dolidoli di nasida, siaphon hamu ma sandok paranganna.

51:4 Asa marragean halak na tartullang di tano ni halak Kasdim, jala halak na tartiham di alamannasida.

51:5 Ai ndada laos * na mabalu Israel manang Juda pasombuon ni Debatana, Jahowa Zebaot, * gok sapata ni mudar do tahe tanonasida i maradophon na badia ni Israel.

51:6 Maporus ma hamu sian tongatonga ni Babel, jala ganup paluahon hosana be, asa unang siap hamu bahenon ni hajahatonna, ai tingki partubolan do i di Jahowa, pamaloson do binahenna tu nasida.

51:7 * Panginuman sere hian do nian Babel di tangan ni Jahowa, na pamabuk sandok isi ni tano on. Nunga minum angka bangso parbegu sian anggurna, umbahen laos lalaen angka bangso parbegu i.

51:8 * Tompuna i marumpak Babel jala matapor! Andungi hamu ma ibana jala buat hamu miak na hushus daon ni bugangna, anggiat tung malum hilalaonna.

51:9 Naeng do nian pamalumonnami Babel, hape ndang hadaonan. Antong tadingkon hamu ma i, mardalan ma hita ganup mulak tu tanona be! Ai nunga sahat ro di langit uhum na madabu, jala nunga tolhas ro di angka ombun.

51:10 Nunga diparuar Jahowa angka hatigorannami. Beta hita asa itabaritahon di Sion jadijadian ni Jahowa, Debatanta i!

51:11 Tajomi ma angka sumbia, gohi hamu ma parnangkatan! Nunga dipahehe Jahowa tondi ni angka raja sian * Madai, ai dompak Babel do tahina laho mangagohonsa, ai * partubolan ni Jahowa do i, partubolon ala ni jorona.

51:12 Pajongjong ma partonggol dompak angka parik ni Babel, bahen ma parhalan, pajongjong ma angka parhal padiri ma angka pangaropan! Ai laluhonon ni Jahowa ma songon na sinangkapna, naung nilumbahonna hian dompak angka isi ni Babel.

51:13 Ho ale * na maringan di lambung ni aek godang, pararta godang! Nunga ro ajalmu, belokbelok ni pangomoanmu.

51:14 Nunga pola marmangmang Jahowa Zebaot tu dirina: Molo dung hugoki ho dohot jolma songon sihapor toropna, ingkon marende aling nasida dompak ho.

51:15 Ibana na manjadihon tano on marhitehite gogona, ibana paojakkon liat portibi on marhitehite habisukonna, jala dipahembang langit i marhitehite hapistaranna.

51:16 Binahen ni soarana marhasak angka aek di toru ni langit, jala manaek angka ombun sian ujung ni tano on; ibana manjadihon angka hilap gabe udan, jala diparuar alogo sian parpeopanna.

51:17 Na bodo do saluhut jolma, ndang marparbinotoan; tung tarurak do saluhut situang ganaganaan, ai sipaotooto do tuanganna, jala ndang adong hosana di bagasan.

51:18 Alogo sambing nasida, jadijadian haliluon; jumpang tingki partubolon tu nasida, siap ma nasida.

51:19 Ndang songon angka nasida anggo ibana partalian ni si Jakkob, ai ibana do sijadi sandok na adong dohot marga ni partalianna, Jahowa Zebaot do goarna.

51:20 * Nanggar do ho nian di ahu, sinjata tu hamusuon; marhitehite ho nunga huropuhi angka bangso parbegu jala hupidomhon marhitehite ho angka harajaon.

51:21 Marhitehite ho nunga huropuhi hoda dohot jolma parsihundulna; marhitehite ho tutu huropuhi hureta dohot jolma parsihundulna.

51:22 Marhitehite ho nunga huropuhi baoa dohot parompuan; marhitehite ho nunga huropuhi natuatua dohot na bajar; marhitehite ho nunga huropuhi dolidoli dohot namarbaju.

51:23 Marhitehite ho huhut nunga huropuhi parmahan dohot punguanna; marhitehite ho nunga huropuhi parumauma dohot horbona paninggala. Marhitehite ho nunga huropohi angka induk dohot wakilna.

51:24 Alai anggo nuaeng ahu ma * mamaloshon tu Babel dohot tu saluhut isi ni Kasdim sandok hajahatonnasida, angka na binahennasida tu Sion di adopanmuna, ninna Jahowa.

51:25 Ida ma, toruanku ma ho ale dolok na mangago, ninna Jahowa, ho na mangago sandok tano on; jala patoltolonku ma tanganku dompak ho, asa hugulang ho sian angka dolok batu, jala hubahen ho, gabe dolok api naung mintop.

51:26 Asa unang be adong buaton ni halak sian ho batu nanggo sada bahen batu parsuhi manang bahen batu ojahan, ingkon tarulang do ho ro di salelenglelengna, ninna Jahowa.

51:27 Patindang hamu ma partonggol di luat i; palu hamu ma sarune di tongatonga ni angka bangso parbegu, * parbadiai hamu ma angka bangso parbegu dompak nasida, marhara ma hamu tu harajaon Ararat, Mini dohot * Askenas mangalo nasida! Pabangkit hamu ma sada partogi ni parangan mangalo nasida, boan hamu ma nangkok angka hoda songon sihapor na marjumbak.

51:28 Parbadiai hamu ma bangso parbegu angka na mandopang nasida, angka raja sian Madai ro di angka indukna dohot saluhut wakilna ro di sandok tano ginomgomanna i.

51:29 Pola humuntal tano on jala raion ala dihajongjongkon Jahowa angka sangkapna taringot tu Babel laho mambahen tano Babel gabe halongonan soada pangisina nanggo sahalak.

51:30 Nunga mansadi marporang angka ulubalang sian Babel, juguk do nasida monjap di bagasan angka partanobatoan, nunga pesan habeguonnasida na sai laon, nunga tahuton nasida songon parompuan, nunga dipagalak halak jabu inganannasida i, nunga diponggolhon angka ransangna.

51:31 Mardapotdapot do suruan marlojongi, mardapotdapot huhut siboan barita laho mamaritahon tu raja sian Babel naung patui hutana di partalpahan.

51:32 Naung dapot dohot angka hatariparan jala naung marsik angka ambar binahen ni api, jala naung godoron roha ni halak parmusu.

51:33 Ai songon on do hata ni Jahowa Zebaot, Debata ni Israel: Tudoshon pardegean do boru Babel, tingki pangaluntahan ni halak di ibana nuaeng. Otiknari nama jumpang ma tingki gotilon ibana.

51:34 Nunga suda dipangan, jala diropuhi si Nebukadnesar, raja sian Babel ahu, nunga dibahen ibana ahu songon saoan na rumar, nunga dipolgak ahu songon pamolgak ni ulok naga, nunga digohi butuhana sian hasoloan ni rohangku, nunga tung diumbang ahu.

51:35 Sai manginona tu Babel ma pangarupaon tu ahu dohot tu sibukku, ninna pangisi ni Sion, mudarhu pe sai manginona ma tu isi ni Kasdim, ninna Jerusalem.

51:36 Dibahen i songon on do hata ni Jahowa: Ida ma, ahu ma mangkasuhuthon badam, jala ahu martubolhon sipartubolhononmu, jala ahu mambahen marsik lautnasida, jala ahu pahiang mualna.

51:37 Ia Babel ingkon gabe timbunan batu, parasaran ni ulok naga, gabe hasonggoton dohot sirehereheon pangisina nanggo sahalak.

51:38 Ingkon rap nasida marauang songon angka singa jala marngungung, songon anak ni singa.

51:39 Ia dung mohop dihilala nasida, ahu ma mambahen sada panggalangon di nasida, jala pamabuhonku nasida, asa marolopolop nasida laos tarpodom ro di salelenglelengna, jala ndang be tarsunggul, ninna Jahowa.

51:40 Ahu ma manogihon nasida tuat songon anak ni birubiru tu pamotongan, birubiru tunggal rap dohot hambing tunggal.

51:41 Oe nunga patu hape * Sesak, nunga pesan hape hamuliaon ni sandok tano on! Nunga gabe halongonan hape Babel di tongatonga ni angka bangso parbegu.

51:42 Nunga binsat hape laut i mangalantap Babel, nunga hona lingkup hape binahen ni gunsang ni galumbangna.

51:43 Nunga gabe halongonan hape angka hutana, gabe tano hasang adaran, tano na soada be pangisina, na so tarbolus jolma be nanggo sada halak.

51:44 Marlulu ma ahu dohot dompak Bel di Babel jala toltolanku ma sian pamanganna naung pinolgakna, jala ndang be marrongoman angka bangso parbegu mandapothon ibana. Nunga marobo huhut parik ni Babel.

51:45 Ruar ma hamu sian tongatongana ho ale bangsongki, jala dipalua be ma hosana maradophon parpiarpiar ni rimas ni Jahowa.

51:46 Unang pola godoron rohamuna manang mabiar hamu umbege barita na mehet di luat i; ai masisoluhan do barita i sian taon na sada tu taon muse, taringot tu pangarupaon di luat i, pangarajai sama pangarajai maralo.

51:47 Dibahen i, ida ma, na ro do angka ari sogot, marlulu ma ahu dompak angka ganaganaan di Babel, gabe tarurak ma sandok tanona i jala saluhut angka na tartullang sian nasida, ingkon marragean di tongatongana.

51:48 Alai ingkon * marsuraksurak ma mida Babel langit i dohot tano on ro di isina sudena, ai sian utara do ro pangago dompak nasida, ninna Jahowa.

51:49 Marragean do najolo halak Israel dibahen Babel suang songon i ingkon marragean halak isi ni sandok luat Babel i.

51:50 Hamu ale angka na malua sian podang, laho ma hamu, unang sulon hamu! Paingotingot hamu Jahowa sian na dao jala * malungun rohamuna di Jerusalem!

51:51 Nunga tarurak hami, ai nunga hubege hami insahinsak, tung haurahon do manghungkupi bohinami, ai nunga masuk halak sileban tu bagasan habadiaon ni joro ni Jahowa.

51:52 Dibahen apala i, ida ma, na ro do angka ari sogot, ninna Jahowa, marlulu ma ahu dompak angka ganaganaannasida, jala di sandok tanona marongrong angka halak na tartullang.

51:53 Tung sura pe manaek Babel sahat ro di langit, jala tung sura sapsap bire partanobatoanna, sai ro do sian ahu angka pangago dompak ibana, ninna Jahowa.

51:54 Tarbege do soara angguhangguk sian Babel jala hajepolon godang sian tano ni halak Kasdim.

51:55 Ai Jahowa sandiri mangago Babel, jala ibana umpesanhon sian i soara hariburon. Jala marhasak do galumbangna, songon angka aek magodang, pola marsaringar tu na dao soara hagunturonna i.

51:56 Ai ro do dompak Babel sada pangago, gabe tartangkup ma angka ulubalangna, diponggolhon angka siorna, ai Debata * partubol do Jahowa, sai na baloshononna do.

51:57 Ahu ma * pamabukkon angka indukna, angka panuturina, angka pangarajai, angka wakilna dohot angka ulubalangna, asa tung tarpodom nasida nasida ro di salelenglelengna, jala ndang be tarsunggul, ninna rajai, Jahowa Zebaot goarna.

51:58 Songon on do hata ni Jahowa Zebaot: Parik ni Babel angka na bidang i ingkon magargar do, jala bahalna angka na timbo i, ingkon purunon dohot api; jadi sayang boti ma na hinangaluthon ni angka bangso, jala suda panganon ni api na hinangaluthon ni angka bangso i.

51:59 On do hata na tinonahon ni panurirang Jeremia tu si Seraia, anak ni * si Neria, tubu ni si Maaseia uju ibana dongan ni si Sedekia. Raja sian Juda, tu Babel, paopattaonhon hinarajaonna i. Alai induk pature pangulonan do si Seraia i.

51:60 Nunga disurathon si Jeremia hian saluhut jea siparoon dope tu Babel tu bagasan sada buku, luhut tahe hata i angka naung sinuratna i dompak Babel.

51:61 Dung i ninna si Jeremia ma tu si Seraia: Ia dung tolhas ho tu Babel, ingkon tangkas jahaonmu luhut hata i.

51:62 Jala dohononmu ma: Ale Jahowa, nunga pola marlumba ho dompak inganan on, naeng siaphononmu, asa unang adong maringan disi nang jolma nang pinahan, ingkon gabe halongonan do i ro di salelenglelengna.

51:63 Ia dung tolhas dijaha ho buku on, rahuti ma tusi sada batu jala reongkon tu tongatonga ni Euprat.

51:64 Jala dohononmu ma: Ingkon songon i lonong Babel, jala ndang be hehe maradophon hamagoan siparoonku tusi, asa laos pidom. Intap ni ma angka hata panurirangon ni si Jeremia.

Jeremia 52

52:1 Marumur duapulu sada taon si Sedekia di na bangkit raja ibana, jala sampulu sada taon lelengna ibana mangarajai di Jerusalem jala goar ni inana do Nai Humuntal, boru ni si Jeremia sian Libna.

52:2 Jala diulahon ibana do sogo ni roha ni Jahowa, sandok songon na binahen ni si Joiakim na jolo.

52:3 Ai masa pe i ala ni rimas ni Jahowa do mida Jerusalem dohot mida Juda, pola nasida dipabali sian adopan ni bohina. Jadi manggunturi ma si Sedekia dompak raja sian Babel.

52:4 Alai tole pasiataonhon hinarajaonna i, di bulan sipaha sampulu di ari pasampuluhon, ro ma si Nebukadnesar, raja sian Babel, ibana dohot sandok paranganna mandopang Jerusalem, laos ditungkum huta i jala dibahen partanobatoan humaliang.

52:5 Jadi lam tarsosak ma huta i sahat ro di pasampulusada taonhon hinarajahon ni raja Sedekia.

52:6 Tole muse paopatbulanhon di ari sia marpotirpotir ma haleon di bagasan huta i, jala ndang adong be sipanganon tu situan na torop isi ni luat i.

52:7 Dung i dibongoti ma huta i, jadi maporus ma sude halak sialo musu jala ruar sian huta i bornginna i mangihutihut dalan laho tu bahal di holangholang ni na dua parik hombarhon porlak ni rajai; alai humaliang huta i do anggo halak Kasdim, jadi diihuthon nasida ma dalan laho tu adaran.

52:8 Dung i dieak parangan ni halak Kasdim ma rajai sian puji, jala dapot nasida ma si Sedekia di adaran Jeriko ianggo sandok paranganna nunga mampar sian lambungna.

52:9 Jadi ditangkup nasida ma rajai jala diboan ibana nangkok tu jolo ni raja sian Babel, tu Ribla di tano Hamat, laos didabu uhumna tu ibana disi.

52:10 Dung i diseati raja sian Babel ma angka anak ni si Sedekia di adopan ni matana ro di saluhut induk ni Juda diseati di Ribla.

52:11 Dung i dipitungi ma ia mata ni si Sedekia, jala dirante ibana dohot dua rante tombaga; jala didokkon raja sian Babel boanon ibana tu Babel, jala dipasahat ibana tu bagas hurungan sahat ro di ari hamamatena.

52:12 Tole muse pasampulu arihon di bulan sipaha lima, i ma pasampulu sia taonhon hinarajahon ni raja Nebukadnesar raja sian Babel, ro ma tu Jerusalem si Nebusaradan, induk ni angka parangan, na jongjong di jolo ni raja sian Babel.

52:13 Jala disurbu joro ni Jahowa dohot bagas ni rajai ro di luhut bagas di Jerusalem, jala saluhut bagas angka na bolon disurbu dohot api.

52:14 Saluhut parik humaliang Jerusalem pe dilohai sandok parangan ni halak Kasdim do angka na rap dohot induk ni parangan i.

52:15 Ianggo deba sian halak na pogos di bangso i dohot pasipasi ni bangso i, angka na tading di huta i dohot angka na bali tu raja sian Babel ro di pasipasi ni angka pande, tarbuang do diboan si Nebusaradan, induk ni angka parangan i.

52:16 Alai anggo deba sian halak na pogos isi ni tano i, tinggal do dibahen si Nebusaradan, induk ni angka parangan i, bahen angka tukang porlak anggur dohot bahen angka parumauma.

52:17 Alai anggo tiang tombaga, angka na di joro ni Jahowa dohot angka hundulan ro di tobat haksa na di joro ni Jahowa, diponggolhon halak Kasdim do jala diboan saluhut tombaga i tu Babel.

52:18 Tole angka hudon dohot angka siuksiuk, angka raut dohot saoan, angka balanga dohot sandok ulaula tombaga, angka na pinangkena marulaon na badia, dibuat nasida do.

52:19 Diboan induk ni angka parangan i do huhut angka mangkuk dohot angka parapiapian, angka saoan dohot angka hudon, angka parpalitoan dohot angka balanga ro di angka pinggan pasu, angka na sian sere manang sian perak.

52:20 Tole tiang na dua i tobat sisadasada i ro di lombu tombagana sampulu dua i, angka ondolanna di toru, angka * na pinauli ni raja Salomo tu joro ni Jahowa, tung na so tardasing do tombaga ni saluhut angka ulaula i dibahen godangna.

52:21 Ia angka tiang i sampulu ualu asta timbona sadasada, jala sampulu dua asta lilitna humaliang, jala hapalna opat jari do, ai marruang do.

52:22 Jala tombaga do uluna di ginjang jala lima asta do timbo ni uluna sadasada, jala marrungkung jala mardalimo uluna humaliang, luhutna i tombaga do. Laos songon i do tiang paduahon i dohot angka dalimona.

52:23 Alai siapulu onom do torop ni dalimo i tungkan desa na opat i saluhut angka dalimo i saratus do di rungkungna i humaliang.

52:24 Dung i dibuat induk ni angka parangan i ma sintua ni malim * Seraia dohot si Sepania, malim paidua dohot na tolu halak sijaga bahal.

52:25 Sian huta pe dibuat do sada halak parhalado na parentahon halak sialo musu dohot pitu halak sian angka na marhalado di jolo ni rajai angka na jumpang di bagasan huta i dohot juaratulis i, induk ni angka parangan, na manurati goar ni bangso isi ni tano i bahen parangan, angkup ni onompulu halak sian bangso isi ni tano i, angka na jumpang di tongatonga ni huta i.

52:26 I ma angka na binuat ni si Nebusaradan, induk ni angka parangan i, manogihon nasida tu Ribla tu jolo ni raja sian Babel.

52:27 Dung i dibunu raja sian Babel ma nasida, gabe mate nasida di Ribla, di tano Hamat. Jadi tarboan ma halak Juda sian tanona tu habuangan.

52:28 On ma bilangan ni bangso na binuangkon ni si Nebukadnesar: Papitu taonhon hinarajaonna i tolu ribu duapulu tolu halak Jahudi.

52:29 Pasampulu ualu taonhon hinarajahon ni si Nebukadnesar sian Jerusalem: Ualu ratus tolupulu dua halak.

52:30 Paduapulu tolu taonhon hinarajahon ni si Nebukadnesar dibuangkon si Nebusaradan, induk ni angka parangan i: Pitu ratus opatpulu lima halak Jahudi. Opat ribu onom ratus do bilangan ni halak saluhutna.

52:31 Tole muse patolupulu pitu taonhon, dung tarbuang si Joiakin, raja sian Juda, paduapulu lima arihon, bulan hurung, dipabangkit Epilmerodak, raja sian Babel ma, di taon hababangkitna i gabe raja, ulu ni si Joiakin, raja sian Juda, jala diparuar ibana sian bagas hurungan.

52:32 Jala basar do hata ni rajai tu ibana, jala huminsat habangsana dibahen sian habangsa ni raja angka donganna i di Babel.

52:33 Disalin huhut pangkeanna hian di hurungan, jala mangan sagusagu di jolo ni rajai ibana tongtong saleleng mangolu.

52:34 Jala balanjona raja sian Babel i do pasingkophon tongtong ariari saleleng mangolu ibana sahat ro di ari hamamatena.